សង្គ្រោះជីវិតប្រជាជនផង ការពារជាតិផង អគ្គបញ្ជាការ បរិច្ចាគថវិកាជាង២៧៥លានរៀល ជូនមូលនិធិគន្ធបុប្ផាកម្ពុជា

អនុប្រធានប្រតិបត្តិនៃក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា បានដឹកនាំក្រុមការងារនៃអង្គភាពប្រតិបត្តិនៃមូលនិធិគន្ធបុប្ផាកម្ពុជា លោកស្រី ប៉ែន សុបភា បានទទួលជួបសំណេះសំណាល និងទទួលថវិកាបរិច្ចាគប្រចាំត្រីមាសទី១ ឆ្នាំ២០២៦ ចំនួន ២៧៥ ៧៥៥ ០០០ រៀល ពីនាយឧត្តមសេនីយ៍ វង្ស វាសនា អគ្គមេបញ្ជាការរង នៃកងយោធពលខេមរភូមិន្ទតំណាងអគ្គមេបញ្ជាការនៃកងយោធពលខេមរភូមិន្ទ។

មូលនិធិគន្ធបុប្ផាកម្ពុជា ថ្លែងអំណរគុណយ៉ាងជ្រាលជ្រៅជូន អគ្គមេបញ្ជាការនៃកងយោធពលខេមរភូមិន្ទ ចំពោះការបន្តគិតគូរ និងកៀរគរថវិកាបរិច្ចាគជាប្រចាំត្រីមាសនៃឆ្នាំនីមួយៗ ពីនាយទាហាន និងពលទាហាននៃអគ្គបញ្ជាការដ្ឋាននៃកងយោធពលខេមរភូមិន្ទ ជូនមូលនិធិគន្ធបុប្ផាកម្ពុជា ដើម្បីចូលរួមគាំទ្រកិច្ចដំណើរការរបស់មន្ទីរពេទ្យគន្ធបុប្ផាឱ្យអាចបន្តបេសកកម្មក្នុងការផ្ដល់សេវាពិនិត្យ និងព្យាបាលទារក និងកុមារ ដោយឥតគិតថ្លៃ ប្រកបដោយគុណភាព មិនមានការរើសអើង និងប្រកបដោយប្រសិទ្ធភាព។

មូលនិធិគន្ធបុប្ផាឱ្យដឹងថា ក្រៅពីការបំពេញតួនាទីការពារទឹកដី និងប្រជាជន, អគ្គបញ្ជាការដ្ឋាននៃកងយោធពលខេមរភូមិន្ទ ក្រោមការដឹកនាំរបស់ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានចូលរួមបរិច្ចាគដោយស្ម័គ្រចិត្តជូនមូលនិធិគន្ធបុប្ផាកម្ពុជា ចាប់តាំងពីឆ្នាំ២០២០ រហូតមកដល់បច្ចុប្បន្ន ដោយបានចូលរួមជាប្រចាំត្រីមាសក្នុង១ឆ្នាំៗ។

មូលនិធិគន្ធបុប្ផាកម្ពុជាកម្ពុជា អះអាងថា​ ក្នុងអំឡុងការឈ្លានពានយ៉ាងកំរោលរបស់យោធាថៃ លើដែនអធិបតេយ្យកម្ពុជា, មានទារក, កុមារ និងស្រ្តីមានផ្ទៃពោះ មកពីគ្រួសារវីរកងកម្លាំងកម្ពុជា និងក្រុមគ្រួសារភៀសសឹក ទទួលបានការយកចិត្តទុកដាក់ ពីសំណាក់ក្រុមគ្រូពេទ្យនៃមន្ទីរពេទ្យគន្ធបុប្ផា ក្នុងការពិនិត្យ និងព្យាបាល ក៏ដូចជាសេវាសម្ភព ដោយឥតគិតថ្លៃ និងប្រកបដោយគុណភាព។

ដើម្បីចូលរួមក្នុងបេសកកម្មសង្គ្រោះជីវិតកុមារ និងស្ត្រីនៅកម្ពុជា សប្បុរសជនអាចចូលរួមបរិច្ចាគតាមរយៈតំណនេះ ៖  https://epayment.acledabank.com.kh/wRx1Z4Gzqzi8zMDq/pay