រដ្ឋាភិបាលថៃ ត្រៀមអនុវត្តវិធានការបញ្ចុះតម្លៃទំនិញ អគ្គិសនី ប្រេងម៉ាស៊ូត និងចែកប្រាក់ ១ម៉ឺនបាត 

រដ្ឋាភិបាលថៃ ត្រៀមអនុវត្តនូវវិធានការមួយចំនួន ដែលមានគោលបំណងកាត់បន្ថយតម្លៃទំនិញ និងជំរុញសេដ្ឋកិច្ច បន្ទាប់ពីកិច្ចប្រជុំគណៈរដ្ឋមន្ត្រីលើកដំបូង គ្រោងធ្វើឡើងនៅសប្តាហ៍ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអនុរដ្ឋមន្ត្រីក្រសួងហិរញ្ញវត្ថុលោក Julapun Amornvivat បានឲ្យដឹងថា វិធានការទាំងនេះ នឹងរួមបញ្ចូលទាំងការបញ្ចុះតម្លៃប្រេងម៉ាស៊ូត និងអគ្គិសនីផងដែរ។

រដ្ឋាភិបាលកំពុងពិចារណាកាត់បន្ថយពន្ធលើការនាំចេញប្រេងម៉ាស៊ូត ដើម្បីកាត់បន្ថយតម្លៃលក់រាយប្រេងម៉ាស៊ូតនៅលើទីផ្សារ ក៏ដូចជាផ្អាកការសងបំណុលរបស់រដ្ឋាភិបាល ដល់អាជ្ញាធរអគ្គិសនីថៃ (Egat) សម្រាប់ការឧបត្ថម្ភថ្លៃអគ្គិសនីក្នុងគ្រួសារផងដែរ។

រីឯ​​សន្យា​របស់​គណបក្ស​ភឿ​ថៃ ​ក្នុង​ការ​ផ្តល់​ប្រាក់​ឌីជីថល​ចំនួន ១០,០០០ បាតវិញ​នោះ, អនុប្រធាន​ស្តីទី​របស់​គណបក្ស និង​ជា​សមាជិក​គណៈកម្មាធិការ​គោលនយោបាយបក្ស លោក Kitti Limsakul ​និយាយ​ថា ប្រាក់​នេះ​នឹង​ត្រូវ​ផ្តល់ឲ្យ​២-៣លើក មិនមែនផ្តល់ឲ្យ​ទាំង​អស់​ក្នុង​ពេល​តែ​មួយ​នោះ​ទេ។

លោក Kitti និយាយថា គោលនយោបាយនេះ អាចត្រូវបានអនុវត្ត ព្រោះវាមិនប្រឆាំងនឹងបទប្បញ្ញត្តិរបស់ធនាគារកណ្តាលថៃ (BoT) ដូចដែលចោទប្រកាន់ដោយអ្នកខ្លះឡើយ។

ទន្ទឹមនោះ ប្រភពមួយបានឲ្យដឹងថា រដ្ឋមន្ត្រីដឹកជញ្ជូនលោក Suriya Jungrungreangkit កំពុងរៀបចំពន្លឿនផែនការរបស់គណបក្ស ដើម្បីកំណត់តម្លៃសំបុត្រធ្វើដំណើរទូទាំងបណ្តាញផ្លូវដែកអគ្គិសនីរបស់ទីក្រុងបាងកក ក្នុងអត្រាថេរ ២០បាតសម្រាប់ការធ្វើដំណើរមួយលើក។

លោក Suriya ក៏មានបំណងពង្រីកសមត្ថភាពរបស់អាកាសយានដ្ឋានសុវណ្ណភូមិ ដុនមឿង ភូកេត និងអាកាសយានដ្ឋានក្នុងតំបន់ផ្សេងទៀតផងដែរ ដើម្បីគាំទ្រដល់ឧស្សាហកម្មអាកាសចរណ៍ និងផ្សព្វផ្សាយទេសចរណ៍របស់ប្រទេស៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ លោក សេតថា អាចឲ្យកសិករថៃ ផ្អាកសងបំណុល៣ឆ្នាំ ដើម្បីជំរុញវិស័យកសិកម្ម ជួយសេដ្ឋកិច្ច