អនុប្រធានម្នាក់របស់គណបក្សយុវជនកម្ពុជា បានប្រកាសដើរចេញពីបក្ស

អនុប្រធានម្នាក់របស់គណបក្សយុវជនកម្ពុជា គឺលោក ផន ផល្លា បានប្រកាសដើរចេញពីគណបក្ស ក្រោមមូលហេតុថា ត្រូវផ្លាស់ប្តូរការងារថ្មីសម្រាប់ខ្លួនឯង។ នេះបើយោងតាមលិខិតមួយច្បាប់របស់លោក ផន ផល្លា ចុះតាំងពីថ្ងៃទី១២ ខែតុលា ឆ្នាំ២០២៣ ដែលទើបផ្សព្វផ្សាយនាពេលថ្មីៗនេះ។

តាមរយៈលិខិតដាក់តាមលោក ជា សារ៉ាក់ ដែលជាអគ្គលេខាធិការគណបក្ស គឺលោក ផន ផល្លា បានប្រាប់លោក ពេជ្រ ស្រស់ ប្រធានគណបក្សយុវជនកម្ពុជា ថា លោកសូមលាឈប់ពីតួនាទីទាំងអស់នៅក្នុងគណបក្សយុវជនកម្ពុជា ដោយសារលោក ត្រូវផ្លាស់ប្តូរការងារថ្មីសម្រាប់ខ្លួនឯង ក្នុងរយៈពេល៥ឆ្នាំម្តង។

មុនការប្រកាសលាលែងនេះ លោក ផន ផល្លា មានតួនាទីជាអនុប្រធានគណបក្ស អនុប្រធានគណៈកម្មាធិការអចិន្ត្រៃយ៍គណបក្ស ប្រធានគណៈពង្រឹងខេត្តព្រៃវែង និងជាប្រធានមូលនិធិគណបក្សយុវជនកម្ពុជា។ ទន្ទឹមនេះ លោកអនុប្រធានរូបនេះ ក៏បានបង្ហាញការអរគុណដល់គណបក្សយុវជនកម្ពុជា សម្រាប់រយៈពេល៥ឆ្នាំមកនេះ ជាពិសេសអរគុណលោក ពេជ្រ ស្រស់ ប្រធានគណបក្ស ក៏ដូចជាមិត្តរួមការងារ និងអ្នកគាំទ្របក្សយុវជនកម្ពុជាទាំងអស់។

នៅពេលកន្លងមក ក៏មានសមាជិកមួយចំនួនរបស់គណបក្សយុវជនកម្ពុជានេះ បានដើរចេញពីគណបក្សផងដែរ ជាអាទិ៍ លោក ឯម សុខសុវណ្ណ ដែលជាអតីតអគ្គលេខាធិការគណបក្ស ជាដើម។ ក្រោយការលាលែងពីគណបក្សយុវជនកម្ពុជា លោក ឯម សុខសុវណ្ណ ក៏បានស្នើក្រសួងមហាផ្ទៃ ដើម្បីបង្កើតគណបក្សថ្មី តែមិនត្រូវបានក្រសួងអនុញ្ញាតឡើយ៕