កីឡា

សមិទ្ធផលធំ៣របស់ សុខ ធី ក្នុងអាជីពប្រដាល់ត្រឹមដាច់ឆ្នាំ២០២៣

បានផុស

២ years មុន

នៅ

ថ្ងៃអង្គារ ២ មករា ២០២៤

ដោយ

កីឡាករល្អក្បាច់រហស្សនាម«មនុស្សឈើ» សុខ ធី ទទួលបានខ្សែក្រវាត់អន្តរជាតិ១គ្រឿងទៀត បន្ទាប់ពីបានឈ្នះកីឡាករចិន ឈឹង ហ្វូហឹង ដោយពិន្ទុកាលពីថ្ងៃសៅរ៍ ទី៣០ ខែធ្នូ ឆ្នាំ២០២៣។ នេះជាសមិទ្ធផលធំទី៣ដែលរូបគេសម្រេចបានក្នុងអាជីពប្រដាល់របស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមិទ្ធផលទី១ គឺខ្សែក្រវាត់គុនខ្មែរអន្តរជាតិដែលរូបគេបានឈ្នះកាលពីឆ្នាំ២០១៨នៅសង្វៀនបាយ័ន។ ខ្សែក្រវាត់លើកដំបូងនេះមានបេក្ខភាព៨រូបគឺកីឡាករកម្ពុជា៤រូប និងកីឡាករបរទេស៤រូប។ នៅវគ្គផ្តាច់ព្រ័ត្រ អ្នកលេងគុនខ្មែររូបនេះបានឈ្នះ ឡុង ជិន ដោយពិន្ទុដើម្បីទទួលបានខ្សែក្រវាត់គុនខ្មែរអន្តរជាតិអមដោយប្រាក់រង្វាន់៦ពាន់ដុល្លារអាមេរិក។

បន្ទាប់មក សុខ ធី មិនបានប្រកួតដណ្តើមខ្សែក្រវាត់ទៀតទេដោយបានត្រឡប់ទៅប្រទេសថៃវិញ។ រូបគេបានប្រកួតនៅប្រទេសថៃ និងបានចេញទៅប្រកួតនៅសង្វៀនធំ ONE Championship។ ក្រោយសម័យកាលវិបត្តិកូវីដ-១៩ រូបគេក៏នៅតែមិនសូវបានប្រកួតញឹកញាប់នៅក្នុងប្រទេសថៃ។ នៅឆ្នាំ២០២៣រឹតតែមិនបានឱកាសប្រកួត បន្ទាប់ពីគុនខ្មែរត្រូវបានដាក់បញ្ចូលក្នុងកីឡាស៊ីហ្គេម លើកទី៣២ នៅប្រទេសកម្ពុជា។

ស្របពេលខ្វះខាតប្រាក់ចំណូលផ្គត់ផ្គង់គ្រួសារដោយសារមិនបានឡើងប្រកួត សុខ ធី បានសម្រេចនាំប្រពន្ធ និងកូនមកប្រទេសកម្ពុជាដើម្បីបន្តអាជីពប្រដាល់នាប៉ុន្មានខែចុងក្រោយនៃឆ្នាំ២០២៣។ រូបគេបានចូលរួមជាមួយក្លិបប្រដាល់របស់ឧកញ៉ា ស្រី ចាន់ថន។

បន្ទាប់ពីស្នាក់នៅកម្ពុជាមួយរយៈពេល សុខ ធី ក៏ទទួលបានឱកាសជាបន្តបន្ទាប់។ កាលពីខែតុលា ឆ្នាំ២០២៣ រូបគេទទួលបានឱកាសប្រកួតដណ្តើមពានម៉ារ៉ាតុងដែលមានបេក្ខភាព៤រូបក្នុងនោះមានកីឡាកររុស្ស៊ី និងប្រេស៊ីលផងដែរ។

នៅជុំទី១ សុខ ធី បានឈ្នះកីឡាកររុស្ស៊ីដោយពិន្ទុ និងបានឡើងទៅកាន់វគ្គផ្តាច់ព្រ័ត្រដោយបានយកឈ្នះដោយពិន្ទុលើកីឡាករប្រេស៊ីលហ្វឹកហាត់នៅកម្ពុជា អាឡិច ដើម្បីទទួលបានពានរង្វាន់ម៉ារ៉ាតុងដែលអាចចាត់ទុកជាសមិទ្ធផលធំទី២ក្នុងអាជីពរបស់ខ្លួន។

ក្រៅពីខ្សែក្រវាត់២គ្រឿង និងពានរង្វាន់ម៉ារ៉ាតុង សុខ ធី ធ្លាប់បានឈ្នះមេដាយមាសក្នុងព្រឹត្តិការណ៍កីឡាជាតិឆ្នាំ២០១៨ ដោយពេលនោះបានយកឈ្នះជើងខ្លាំង ឈុត សេរីវ៉ាន់ថង នៅវគ្គផ្តាច់ព្រ័ត្រ។

ជារួមការប្រឡូកអាជីពរយៈពេលជិត១០ឆ្នាំកន្លងទៅ សុខ ធី ទទួលបានសមិទ្ធផលសំខាន់ៗក្នុងអាជីពនៅប្រទេសកម្ពុជា ថ្វីបើរូបគេមានកេរ្តិ៍ឈ្មោះល្បីដំបូងចេញពីប្រទេសថៃ។ ស្ថិតនៅក្នុងវ័យក្មេង រូបគេនៅមានអនាគតវែងឆ្ងាយ ស្របពេលសមត្ថភាពរបស់ខ្លួនកំពុងឡើងខ្លាំង៕

អត្ថបទ៖ វីរបុត្រ

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា