សេដ្ឋកិច្ច

បារាំងទាញការវិនិយោគបរទេសជាង ១៦ ប៊ីលានដុល្លារពីកិច្ចប្រជុំជំនួញប្រចាំឆ្នាំ«ជ្រើសរើសបារាំង»

បានផុស

២ years មុន

នៅ

ថ្ងៃចន្ទ ១៣ ឧសភា ២០២៤

ដោយ

ប្រធានាធិបតីបារាំង លោក អេម៉ាញូអែល ម៉ាក្រុង (Emmanuel Macron) បាននិយាយថា កិច្ចប្រជុំកំពូលជំនួញប្រចាំឆ្នាំ «ជ្រើសរើសបារាំង» ដែលចាប់ផ្ដើមនៅថ្ងៃចន្ទនេះ នឹងទាក់ទាញការវិនិយោគបរទេសចំនួន ១៥ ប៊ីលានអឺរ៉ូ (១៦,២ ប៊ីលានដុល្លារ)។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ាក្រុង បាននិយាយថា ការវិនិយោគបរទេសសរុបទាំង ១៥ ប៊ីលានអឺរ៉ូ បានមកពីគម្រោងអាជីវកម្មចំនួន ៥៦ ផ្សេងៗគ្នា ដែលគ្របដណ្ដប់លើវិស័យសំខាន់ៗរួមមានបច្ចេកវិទ្យា បញ្ញាសិប្បនិម្មិត (AI) និងហិរញ្ញវត្ថុ។

គួរគូសបញ្ជាក់ថា កិច្ចប្រជុំ «ជ្រើសរើសបារាំង» ធ្វើឡើងដើម្បីស្រូបយកការវិនិយោគបរទេសទៅក្នុងប្រទេសបារាំង ដោយឆ្នាំមុន វាបានទាក់ទាញការវិនិយោគបរទេសប្រមាណ ១៣ ប៊ីលានអឺរ៉ូ។ បារាំងរៀបចំកិច្ចប្រជុំនេះឡើង ក្នុងបំណងជាក់ស្ដែងដើម្បីពង្រឹងកេរ្តិ៍ឈ្មោះក្រុងប៉ារីសជាមជ្ឈមណ្ឌលពាណិជ្ជកម្មឈានមុខគេនៅអឺរ៉ុប ខណៈប្រទេសដែលមានសេដ្ឋកិច្ចធំជាងគេទី២នៅតំបន់ចាយប្រាក់អឺរ៉ូមួយនេះ ប្រឈមមុខនឹងឱនភាពថវិកា ហើយកំណើនសេដ្ឋកិច្ចក្នុងត្រីមាសទី ១ ក៏ស្ថិតនៅលើសន្ទុះស្ដួចស្ដើង។

កាលពីចុងសប្តាហ៍កន្លងទៅ បារាំងបាននិយាយថា ក្រុមហ៊ុនពាណិជ្ជកម្មអេឡិចត្រូនិក Amazon នឹងប្រកាសការវិនិយោគ ១,២ ប៊ីលានអឺរ៉ូនៅក្នុងកិច្ចប្រជុំកំពូល ក្រោយក្រុមហ៊ុនវេជ្ជសាស្រ្តឈានមុខគេ Pfizer Inc. និង AstraZeneca បានប្រកាសពីការវិនិយោគដែលមានតម្លៃសរុបជិត ១ ប៊ីលានដុល្លារ។

នៅថ្ងៃចន្ទនេះផងដែរ រដ្ឋមន្ត្រីហិរញ្ញវត្ថុបារាំង លោក Bruno Le Maire នឹងរៀបចំកិច្ចប្រជុំទទួលនាយកប្រតិបត្តិរបស់ធនគារវិនិយោគ JPMorgan ធនាគារ Goldman Sachs ធនាគារ Morgan Stanley និងធនាគារអាមេរិក ក្នុងចំណោមក្រុមហ៊ុនផ្សេងៗទៀត៕

Related Topics:ប្រទេសបារាំង