​លោក ម៉ាក្រុង៖ តំបន់​កូកាស​​ខាងត្បូង មិនគួរ​​ជាទីតាំង​​ប្រជែងគ្នា​របស់​មហាអំណាច​ទេ​​

ប្រធានាធិបតីបារាំង លោក អេម៉ានុយអែល ម៉ាក្រុង  បាននិយាយកាលពីថ្ងៃអង្គារ ទី៥ ខែឧសភា ថា តំបន់កូកាស​​​ភាគខាងត្បូង​ (South Caucasus) មិនគួរក្លាយជា «លំហនៃមហាអំណាចខាងក្រៅប្រជែងគ្នា» នោះទេ ផ្ទុយទៅវិញ ​វា​គួរតែដើរតួជា «ផ្លូវបំបែក» ដែលតភ្ជាប់រវាងអឺរ៉ុប អាស៊ីកណ្តាល និងមជ្ឈិមបូព៌ាវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីសារព័ត៌មាន​តួកគី Anadolu (AA) ប្រមុខរដ្ឋាភិបាលទីក្រុងប៉ារីស បានថ្លែងនៅក្នុងវេទិកា Yerevan Dialogue ថា តំបន់​កូកាសខាងត្បូង( (គឺជាតំបន់ភូមិសាស្ត្រដ៏សំខាន់មួយដែលស្ថិតនៅចន្លោះ សមុទ្រខ្មៅ និងសមុទ្រ Caspian រួមទាំងចំណុចប្រសព្វរវាងទ្វីបអឺរ៉ុប និងទ្វីបអាស៊ី ) មិនត្រូវក្លាយជាទីលានសម្រាប់មហាអំណាចប្រជែងឥទ្ធិពលគ្នា ឬជាកម្មវត្ថុនៃការដណ្តើមគ្នារបស់ចក្រភពណាមួយនោះទេ ប៉ុន្តែវាគឺជាតំបន់ដែលមានអធិបតេយ្យភាពផ្ទាល់ខ្លួន។

លោក ម៉ាក្រុង ក៏បានបញ្ជាក់ដែរ​ថា «ខ្ញុំដឹងថាអស់រយៈពេលជាយូរមកហើយ មនុស្សជាច្រើនជឿថា ជោគវាសនារបស់អាមេនី អាចស្ថិតនៅក្រោមអ្វីដែលគេហៅថា ស្លាបការពាររបស់រុស្ស៊ីតែប៉ុណ្ណោះ។ ប៉ុន្តែសង្រ្គាមឆ្នាំ ២០២០ បានបង្ហាញ​ថា​ ការការពារនេះ មិនគួរឲ្យទុកចិត្តដូចដែលមនុស្សជាច្រើនបានគិតនោះទេ»។ លោកបានបន្ថែមថា តំបន់កូកាស​ភាគខាងត្បូង ត្រូវបានគេមើលឃើញជាយូរមកហើយថា ជាតំបន់ដែលត្រូវបានកំណត់រូបរាងដោយមហាអំណាចខាងក្រៅ។

លោក ម៉ាក្រុង បានលើកឡើងទៀតថា ប្រទេសអាមេនីបានធ្វើការសម្រេចចិត្តដ៏ក្លាហាន និងចាំបាច់បំផុត តាមរយៈការជំរុញគំនិតផ្តួចផ្តើមសន្តិភាព និងការស្វែងរកដោយធ្វើឲ្យមានភាពប្រក្រតីនៃទំនាក់ទំនងជាមួយប្រទេសអាស៊ែបៃហ្សង់។ជាក់ស្ដែង ដំណើរការនេះបានជួយឲ្យគន្លងផ្លូវនយោបាយ និងសេដ្ឋកិច្ចរបស់ប្រទេសនេះមានស្ថិរភាព។

លោក ក៏បានអំពាវនាវឲ្យមានការបើកព្រំដែនតំបន់ឡើងវិញទាំងអស់ រួមទាំងព្រំដែនរវាងប្រទេសអាមេនី, អាស៊ែបៃហ្សង់ និងតួកគី ដោយអះអាងថា «ព្រំដែនត្រូវតែបើក គឺព្រំដែនទាំងអស់ ហើយត្រូវតែបើកឲ្យបានពេញលេញផងដែរ។ នេះគឺជាអ្វីដែលអាចដោះសោឱកាសសេដ្ឋកិច្ចពេញលេញ និងអនុញ្ញាតឲ្យមានផ្លូវនៃសន្តិភាព ជាជាងជម្លោះចក្រពត្តិនិយមនៅក្នុងតំបន់កូកាស​ខាងត្បូង»៕

អត្ថបទ៖ សាង ស្រីល័ក្ខ