ព័ត៌មានជាតិ

កម្ពុជាប្តេជ្ញារក្សាគម្របព្រៃឈើឲ្យបាន ៦០% នៅត្រឹមឆ្នាំ ២០៥០

បានផុស

២ years មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

រដ្ឋមន្រ្តីក្រសួងបរិស្ថានបានអះអាងពីការដាក់ចេញផែនការរបស់ប្រទេសកម្ពុជា ក្នុងការរក្សាគម្របព្រៃឈើឲ្យបាន ៦០% ត្រឹមឆ្នាំ ២០៥០។

រដ្ឋមន្រ្តីក្រសួងបរិស្ថានលើកឡើងនេះនៅក្នុងកម្មវិធីវេទិកា «ពិភពលោកស្តីពីសកម្មភាពអាកាសធាតុ» ដែលរៀបចំឡើងនៅព្រឹកមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងថា នៅត្រឹមឆ្នាំ ២០៥០ កម្ពុជាមិនត្រឹមដាក់ផែនការជាប្រទេសអព្យាក្រឹតកាបូន គឺនឹងរក្សាឲ្យមានគម្របព្រៃឈើឲ្យបាន ៦០%។

ជាមួយបច្ចុប្បន្នភាពនៃការដាំដើមឈើមួយលានដើម គឺមិនគ្រប់គ្រាន់នោះទេ។ នេះបើតាមលោករដ្ឋមន្រ្តី។

មានកិច្ចការជាច្រើនទៀតដែលត្រូវអនុវត្តដើម្បីធានាថានៅឆ្នាំ ២០៥០ កម្ពុជានឹងមានគម្របព្រៃឈើ ៦០%។ លោក អ៊ាង សុផល្លែត បានលើកពីការដាក់ចេញយុទ្ធសាស្រ្តចក្រា ដើម្បីធ្វើឲ្យកម្ពុជាមានភាពស្អាតនិងបៃតង។

លោកថា ការខិតខំទាំងនេះដើម្បីបម្រើប្រយោជន៍ដល់កូនចៅជំនាន់ក្រោយ ដែលនឹងចងចាំអ្វីដែលយើងបានធ្វើ បន្សល់ទុកជាកេរតំណែល។

ទាក់ទងការទប់ស្កាត់ការកាប់បំផ្លាញព្រៃឈើ លោក អ៊ាង សុផល្លែត បានលើកពីការដាក់ចេញការអនុវត្តច្បាប់ឲ្យបាន ១០០%។ លោកថា ក្នុងទិដ្ឋភាពផ្នែកច្បាប់ ក្រសួងបរិស្ថាននឹងធ្វើការជាមួយគណៈមេធាវីកម្ពុជា និងអង្គភាពប្រឆាំងអំពើពុករលួយ បន្ថែមលើកិច្ចសហការជាមួយអាជ្ញាធរមូលដ្ឋាន ដើម្បីទប់ស្កាត់បទល្មើសការបំផ្លាញធនធានធម្មជាតិឲ្យមានប្រសិទ្ធភាព។

ថ្មីៗនេះក្រសួងបរិស្ថាន បានផ្តល់ផែនទីតំបន់ការពារធម្មជាតិដល់មន្រ្តីនៅថ្នាក់ក្រោមជាតិ ដើម្បីងាយស្រួលក្នុងការគ្រប់គ្រង ការពារ និងអភិរក្សធនធានធម្មជាតិ។ តាមរយៈផែនទីនឹងធានាការប្រើប្រាស់ដីក្នុងតំបន់ការពារធម្មជាតិឱ្យមានសុវត្ថិភាព។

លោក អ៊ាង សុផល្លែត បានគូសបញ្ជាក់ថា ការផ្តល់ផែនទីនឹងបង្កើនប្រសិទ្ធភាពដល់ការការពារ ធានាបានការប្រើប្រាស់ដីក្នុងតំបន់ការពារធម្មជាតិមានសុវត្ថិភាព ក៏ដូចជាកាត់បន្ថយទំនាស់ដីដែលគ្រប់គ្រងដោយរដ្ឋ និងដីកម្មសិទ្ធិឯកជនរបស់ពលរដ្ឋ។

លោកថា តាមរយៈផែនទីបានកំណត់ច្បាស់លាស់ ដែលអាជ្ញាធរមូលដ្ឋាននឹងមិនពិបាកពិនិត្យទីតាំងដីរបស់រដ្ឋ ដោយអាចឆែកមើលទៅលើកម្មវិធី (App) ហើយពលរដ្ឋក៏អាចទាញកម្មវិធីយកទៅប្រើប្រាស់ ដើម្បីចៀសវាងចូលទៅទន្រ្ទានកាន់កាប់ដីរដ្ឋដោយខុសច្បាប់។

លោក អ៊ាង សុផល្លែត ក៏បានលើកបង្ហាញពីគោលបំណងក្នុងរយៈពេល ១០ ឆ្នាំខាងមុខ លោកចង់ឲ្យមានចលនាចូលរួមដាំដើមឈើនៅតាមដងផ្លូវ តាមសហគមន៍ឲ្យកាន់តែច្រើន ដើម្បីធ្វើឲ្យកម្ពុជាស្អាត មានភាពបៃតង ជាមួយបរិស្ថានស្រស់បំព្រង។ លោកក៏នឹងបង្កើតថ្នាលបណ្តុះកូនឈើបន្ថែមទៀត ដែលអាចបណ្តុះកូនឈើរាប់លានដើមយកទៅចែកចាយដល់ពលរដ្ឋយកទៅដាំ ដោយមិនបាច់ចំណាយថវិកា ដែលនឹងធ្វើឲ្យពលរដ្ឋកាន់តែដក់ចិត្តនិងស្រលាញ់ចូលរួមថែរក្សាព្រៃឈើ៕

Related Topics:លោក អ៊ាង សុផល្លែត

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា