ព័ត៌មានជាតិ

រោងចក្រចំនួន ៦០ បំពាក់ឧបករណ៍តាមដានគុណភាពទឹក ផ្តល់សញ្ញាណព្រមានភ្លាមៗបើមានការបំពុលបរិស្ថាន

បានផុស

១ ថ្ងៃ មុន

នៅ

ថ្ងៃសៅរ៍ ៦ មិថុនា ២០២៦

ដោយ

មកដល់បច្ចុប្បន្ននេះមានរោងចក្រចំនួន ៦០ បានបំពាក់ឧបករណ៍តាមដានគុណភាពទឹក ដើម្បីការពារការលួចបង្ហូរទឹកកខ្វក់ ឬសារធាតុពុលដែលមិនបានធ្វើប្រព្រឹត្កកម្មចូល ក្នុងប្រភពទឹក ឬទីសាធារណៈ។ នេះបើតាមរដ្ឋមន្រ្តីក្រសួងបរិស្ថានថ្លែងនៅក្នុងទិវាបរិស្ថានជាតិ និងបរិស្ថានពិភពលោក ៥ មិថុនា ២០២៦ កាលពីម្សិលមិញនេះ។

«ក្រុមហ៊ុនចំនួន ៦០ ទីតាំង បានបំពាក់រួចរាល់ និងក្រុមហ៊ុនចំនួន ៧២ ទីតាំងបានចុះកិច្ចសន្យាបំពាក់ឧបករណ៍តាមដានស្វយប្រវត្ត ដើម្បីទប់ស្កាត់ការបញ្ចេកទឹកកខ្វក់ចូលប្រភពទឹកសាធារណៈ»។ លោក អ៊ាង សុផល្លែត បញ្ជាក់។

លោកអះអាងថា តាមរយៈប្រព័ន្ធតាមដានគុណភាពទឹកនេះ នឹងផ្តល់សញ្ញាគ្រប់នាទីនៅពេលមានការបង្ហូរទឹកកខ្វក់ចូលប្រភពទឹក ដែលអាជ្ញាធរនឹងអាចចាត់វិធានការឆ្លើយតបបានភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងនៅក្នុងទិវាបរិស្ថានជាតិ និងបរិស្ថានពិភពលោក ៥ មិថុនា ២០២៦ ក្រោមប្រធានបទ៖ «សំណល់សូន្យ (Zero Waste)» កាលពីរសៀលថ្ងៃទី ៥ ខែមិថុនា ឆ្នាំ២០២៦ លោក អ៊ាង សុផល្លែត រដ្ឋមន្ត្រីក្រសួងបរិស្ថាន ក៏បានរំលេចពីសមិទ្ធផលសំខាន់ៗក្នុងរយៈពេលជាងពីរឆ្នាំនេះ បន្ទាប់ពីក្រសួងប្រកាសដាក់ឱ្យប្រើប្រាស់ «យុទ្ធសាស្រ្តចក្រាវិស័យបរិស្ថាន» ស្របតាមយុទ្ធសាស្រ្តបញ្ចកោណដំណាក់កាលទី១ របស់រដ្ឋាភិបាល នីតិកាលទី៧។

រដ្ឋមន្ត្រីក្រសួងបរិស្ថានបានអះអាង តាមរយៈយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ!» យុទ្ធនាការ «កម្ពុជាស្អាត ខ្មែរធ្វើបាន!» បានកាត់បន្ថយការនាំចូលនិងការផលិតថង់ប្លាស្ទិកនៅក្នុងប្រទេសបានប្រមាណ ៨៣%។

ខណៈយុទ្ធនាការផ្លូវជាតិគ្មានសំណល់ប្លាស្ទិកមានផ្លូវជាតិ ៦៤ ខ្សែ ស្មើនឹង ៩៤,១២% នៃចំនួនផ្លូវជាតិសរុប ៦៨ ខ្សែ ត្រូវបានសម្អាត។

បើតាមលោករដ្ឋមន្រ្តី យុទ្ធនាការទាំងអស់នេះបានក្លាយជាចលនាជាតិមួយដ៏សំខាន់ ដែលកំពុងផ្លាស់ប្តូរឥរិយាបថប្រជាជនស្រលាញ់បរិស្ថាន៕