ឧបនាយករដ្ឋមន្ត្រី ស៊ុន ចាន់ថុល៖ ការអភិវឌ្ឍហេដ្ឋារចនាសម្ព័ន្ធ ព្រំដែនកម្ពុជា-ថៃ ជាការផ្ដល់ផលប្រយោជន៍​ឱ្យប្រជាជនទាំងសងខាង

លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា ការអភិវឌ្ឍវិស័យហេដ្ឋារចនាសម្ព័ន្ធតាមខ្សែបន្ទាត់ព្រំដែន ដូចជា ផ្លូវជាតិលេខ៦៧ និង៦៨ ជាដើម ជាការរួមចំណែករក្សានូវសន្តិសុខ​សណ្តាប់ធ្នាប់នៅតាមបណ្តោយព្រំដែន និងបម្រើឱ្យផលប្រយោជន៍របស់ប្រជាជនប្រទេសទាំងសងខាង។

លោក ឧបនាយករដ្ឋមន្ត្រីបានលើកឡើងក្នុងឱកាស លោក ឆឺតគៀត អាត់ថៈកន (CHERDKIET ATTHAKOR) ឯកអគ្គរាជទូតថៃ ប្រចាំកម្ពុជា ចូលជួបសម្តែងការគួរសម និងជម្រាបលានៅថ្ងៃទី ០២ ខែកញ្ញា ឆ្នាំ ២០២៤ គ្រាដែលមន្ត្រីទូតរូបនេះនឹងបញ្ចប់បេសកកម្មការងារនៅកម្ពុជា នាពេលឆាប់ៗខាងមុខ។

លោកឧបនាយករដ្ឋមន្ត្រី បានបង្ហាញនូវជំនឿចិត្តថា ទំនាក់ទំនងមិត្តភាពដ៏ល្អប្រពៃរវាង រាជរដ្ឋាភិបាល និងប្រជាជនក្នុងនាមជាអ្នកជិតខាង នឹងបន្តនូវភាពភាពជិតស្និត និងល្អប្រសើរបន្ថែមទៀត ជាពិសេសលើកិច្ចការវិនិយោគ។

យោងតាមអគ្គនាយកដ្ឋានគយ និងរដ្ឋាករកម្ពុជា នៅក្នុងឆមាសទី១ ឆ្នាំ ២០២៤ ពាណិជ្ជកម្មកម្ពុជា-ថៃ សម្រេចបានទឹកប្រាក់ជាង ២,០៥ ពាន់លានដុល្លារ កើនឡើង ៦,៤% បើធៀបនឹងរយៈពេលដូចគ្នានៅឆ្នាំ ២០២៣។

ក្នុងនោះកម្ពុជានាំចេញទៅថៃ សម្រេចបានទឹកប្រាក់ជាង ៤៣៩ លានដុល្លារ ខណៈថៃនាំចូលមក មានទំហំទឹកប្រាក់ ១,៦១ ពាន់លានដុល្លារ៕