តើមនុស្សប្រភេទណាជឿហោរាសាស្ត្រច្រើនជាងគេបំផុត?

ភាគច្រើនបំផុតនៃអ្នកជឿលើការទាយ ឬហោរាសាស្ត្រ គឺជាក្រុមមនុស្សដែលមានចំណេះដឹងទាប មិនសូវមានការពិចារណាល្អិតល្អន់និងការគិតហ្មត់ចត់។ លើសពីនេះទៀត ពួកគេ គឺជាមនុស្សដែលរឹតរួតដោយជំនឿអរូបិយ មិនទទួលបានព័ត៌មានគ្រប់គ្រាន់ ខ្វះសុភនិច្ឆ័យ និងជាមនុស្សដែលមានបញ្ហាច្រើន ហើយ​មិនអាចដោះស្រាយបាន​ដោយខ្លួនឯង។ ជាទូទៅ ពួកគេ ជាមនុស្សមានវិបត្តិផ្ទួនៗនៅក្នុងជីវិត ឬជាមនុស្សដែល​បរាជ័យធ្ងន់ធ្ងរនៅក្នុងជីវិត ​ឬក្នុងការងារ​ផ្សេងៗ ហើយមិនអាចជួយខ្លួនឯងបាន។

ផ្ទុយទៅវិញ ក្រុមមនុស្សដែលមិនសូវមានចំណេះដឹងរឹងមាំ ហើយបានក្លាយខ្លួនជាអ្នកមានជោគជ័យជាបន្តបន្ទាប់ក្នុងកម្រិតធំបំផុត ជាពិសេស ជោគជ័យខាង​ទ្រព្យសម្បត្តិ ឬ​អំណាច ក៏ជាក្រុមមនុស្សដែលជឿខ្លាំងលើការទាយ ឬហោរាសាស្ត្រដែរ។ ដោយ​សារតែភាពជោគជ័យរបស់ពួកគេ​មានទំហំធំពេក និងការទទួលបានជោគជ័យនោះដោយងាយស្រួលពេក ដែលជាមូលហេតុធ្វើឱ្យពួកគេគិតថា អ្វីដែលគេទទួលបាននោះ​ មិនមែនជាផល​នៃ​ការ​ខិតខំប្រឹងប្រែងរបស់ខ្លួនទេ គឺអាចមកពីព្រេងវាសនា ព្រហ្មលិខិត ការបន់ស្រន់ ការបួងសួង ​ ឬព្រះប្រទាន។ មនុស្សបែបនេះ មិនគ្រាន់តែជឿលើ​ការទាយ ឬហោរាសាស្ត្រ​ប៉ុណ្ណោះទេ ប៉ុន្តែ ពួកគេក៏ជាអ្នកជឿលើជំនឿ​អរូបិយ ជឿលើអធិធម្មជាតិ និងកម្លាំងក្រៅខ្លួនតាមរូបភាពផ្សេងៗដែរ។ការជឿរបស់ពួកគេ​អាចជះឥទ្ធិពលលើក្រុមមនុស្សទីមួយដែលបានរៀបរាប់ខាងលើ និងក្រុមមនុស្សដែលមានលក្ខណ:ប្រហាក់​ប្រហែលពួកគេ ឬក្រុមមនុស្សដែលស្ថិតក្នុងការ​សង្ស័យអំពីអាទិទេព ឬហោរាសាស្ត្រ​ដែរ៕

ដោយ៖ បណ្ឌិត ឈត ប៊ុនថង អ្នកជំនាញទស្សនវិជ្ជា