ថ្ងៃនេះ ១០ ឆ្នាំមុន ជប៉ុនជួបគ្រោះមហន្តរាយធំៗពីរ

ប្រជាជននៅប្រទេសជប៉ុនកំពុងចងចាំអ្នកដែលបានស្លាប់កាលពី ១០ ឆ្នាំមុននៅពេលមានការរញ្ជួយដី និងរលកយក្សស៊ូណាមិបានវាយប្រហារភាគឦសានប្រទេសជប៉ុន និងបង្កជាមហន្តរាយនុយក្លេអ៊ែរ ។ ពិធីរំឭកខួបជាតិមួយត្រូវបានធ្វើឡើងនៅទីក្រុងតូក្យូ ។

ប្រជាជនត្រូវបានគេសង្កេតឃើញភាពស្ងប់ស្ងាត់មួយភ្លែតនៅម៉ោង ២ និង ៤៦ នាទីថ្ងៃត្រង់ជាពេលវេលាពិតប្រាកដនៃការរញ្ជួយដីកម្រិត ៩ រ៉ិចទ័របានវាយប្រហារ ។

ការរញ្ជួយនេះបានបង្កើតរលកយក្សស៊ូណាមិដែលមានកម្ពស់ជាង ១០ ម៉ែត្រដោយបានសម្លាប់មនុស្ស ១៥,៩០០ នាក់ ។ មនុស្ស ២,៥២៥ នាក់ផ្សេងទៀតនៅតែមិនរាប់បញ្ចូលនៅឡើយ ខណៈមនុស្ស ៣,៧៧៥ នាក់បានស្លាប់ដោយសារហេតុការណ៍ពាក់ព័ន្ធនេះនៅពេលក្រោមក ។

រដ្ឋាភិបាលបានរៀបចំពិធីរំឭកខួបនេះជារៀងរាល់ឆ្នាំនៅថ្ងៃទី ១១ ខែមីនាដោយចាប់ផ្តើមពីឆ្នាំ ២០១២ ។ ប៉ុន្តែព្រឹត្តិការណ៍នេះត្រូវបានលុបចោលកាលពីឆ្នាំមុន ហើយចំនួនអ្នកចូលរួមត្រូវបានកំណត់នៅក្នុងឆ្នាំនេះដោយសារតែជំងឺរាតត្បាត ។

ទន្ទឹមនោះនេះជាលើកទី ១ ហើយដែលព្រះចៅអធិរាជ Naruhito និងអធិរាជីនី Masako បានចូលរួមក្នុងពិធីរំឭកប្រចាំឆ្នាំ ។ កន្លងមកទ្រង់ទាំងពីរក៏បានយាងទៅទស្សនាតំបន់ដែលរងផលប៉ះពាល់ចាប់តាំងពីគ្រោះមហន្តរាយ និងបានផ្តល់ពាក្យលើកទឹកចិត្តដល់អ្នកនៅរស់មុនពេលព្រះចៅអធិរាជ Naruhito បានឡើងគ្រងរាជ្យនៅឆ្នាំ ២០១៩ ។

នៅក្នុងពិធីនោះព្រះចៅអធិរាជមានព្រះបន្ទូលថា “បេះដូងរបស់ទ្រង់ឈឺចាប់នៅពេលដែលទ្រង់គិតពីអ្នកដែលបានតស៊ូរស់នៅនាពេលកន្លង ។ ខ្ញុំជឿជាក់ថា យើងទាំងអស់គ្នារក្សាខ្លួនឲ្យមានសាមគ្គីភាព និងរក្សាឆន្ទៈជារៀងរហូតដើម្បីឈរជាមួយប្រជាជនដែលរងទុក្ខដូច្នេះវឌ្ឍនភាពនៃការកសាងឡើងវិញនឹងទទួលបានផ្លែផ្កាជាបន្តបន្ទាប់ចាប់ពីពេលនេះតទៅ ។ ខ្ញុំរួមជាមួយអធិរាជីនិចង់បន្តស្តាប់សម្លេងរបស់អ្នកដែលរស់នៅក្នុងតំបន់រងគ្រោះ និងនៅជិតពួកគេ” ។

ចំណែកលោកនាយករដ្ឋមន្រ្តីជប៉ុន Suga Yoshihide បាននិយាយថា ប្រជាជន ២,០០០ នាក់នៅតែរស់នៅក្នុងលំនៅដ្ឋានបណ្តោះអាសន្ន ទោះបីជាការកសាងឡើងវិញកំពុងឈានចូលដំណាក់កាលចុងក្រោយក៏ដោយ ។ លោកបានសង្កត់ធ្ងន់លើការប្តេជ្ញាចិត្តរបស់រដ្ឋាភិបាលក្នុងការដឹកនាំកិច្ចខិតខំប្រឹងប្រែងកសាងឡើងវិញ ។

លោក Suga បាននិយាយថា “រដ្ឋាភិបាលនឹងបន្តផ្តល់ការគាំទ្រឥតឈប់ឈរដល់ប្រជាពលរដ្ឋដែលរងផលប៉ះពាល់ ។ នៅក្នុងតំបន់ដែលរងផលប៉ះពាល់ដោយគ្រោះមហន្តរាយនុយក្លេអ៊ែរដែលត្រូវការជំនួយរយៈពេលពីពាក់កណ្តាលទៅរយៈពេលវែងរដ្ឋាភិបាលនឹងជំរុញវិធានការដើម្បីលើកកម្ពស់ជីវភាពរស់នៅរបស់ប្រជាជនឲ្យវិលត្រឡប់ទៅផ្ទះវិញ និងការជំរុញធ្វើឲ្យប្រសើរឡើងនៃឧស្សាហកម្ម ។ យើងនឹងខិតខំឲ្យអស់ពីសមត្ថភាពដើម្បីកសាង និងស្តារឡើងវិញនូវរោងចក្រនុយក្លេអ៊ែរ Fukushima និងបំពេញបន្ថែមការកសាងឡើងវិញនៃតំបន់ Tohoku ។

លោកបានបន្ថែមទៀតថា ប្រវត្តិសាស្ត្រគ្រោះមហន្តរាយធម្មជាតិរបស់ប្រទេសជប៉ុនបានបង្កើតភាពអត់ធន់សម្រាប់ប្រជាជនរបស់ខ្លួន ហើយបានប្តេជ្ញាថាប្រទេសនេះនឹងអនុវត្តតាមឧទាហរណ៍ពីអតីតកាលដើម្បីផ្ដល់ភាពក្លាហាន និងក្តីសង្ឃឹម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជប៉ុនពិចារណាប្រើសឺរ៉ាំងបូមវ៉ាក់សាំងបាន ៧ ដូសចេញពីមួយដប

ចុចអាន ៖ ដំណឹងល្អ! កម្ពុជា ស្ថិតក្នុងចំណោមប្រទេសអាស៊ីទាំង២៤ដែលជប៉ុនផ្តល់ជំនួយឥតសំណង សម្រាប់ផ្គត់ផ្គង់វ៉ាក់សាំងកូវីដ