ខាត់ សុឃីម ស្លុតចិត្ត ក្រោយទទួលដំណឹងគ្រូភ្លេងម្នាក់មរណភាពដោយជំងឺគាំងបេះដូង

តារាចម្រៀងពហុជំនាញអ្នកនាង ខាត់ សុឃីម បានសម្តែងការសោកស្តាយ និងក្តីរន្ធត់ចិត្តជាខ្លាំងបន្ទាប់ពីទទួលដំណឹងនៃការទទួលមរណភាពរបស់អ្នកភ្លេងម្នាក់ ដោយសារជំងឺគាំងបេះដូងគ្មានថ្ងៃវិលត្រឡប់វិញឡើយ។

អ្នកនាង ខាត់ សុឃីម បានឲ្យដឹងថា អ្នកភ្លេងដែលទទួលមរណភាពមានឈ្មោះ និល ច័ន្ទរតនា ខណ:ដំណឹងនេះបានធ្វើឲ្យអ្នកសិល្ប:និងមិត្តភក្តិរួមអាជីពបង្ហាញការចូលរួមសោកស្តាយជាពន់ពេក។

តាមរយៈសំណេរពីគណនីហ្វេសប៊ុក អ្នកនាង ខាត់ សុឃីម បានរៀបរាប់ថា “ដៃភ្លេងម្នាក់ទៀតហើយ (គាំងបេះដូង) មិត្តភក្តិដែលស្គាល់ និងរាប់អានគាត់ សូមចូលរួមបុណ្យសពគាត់ផងធ្លាប់ជួបប្អូន ធ្លាប់លេងភ្លេងឲ្យបងច្រៀង សូមប្អូនធ្វើដំណើរទៅកាន់ឋានសុខ”។

បើតាមប្រភពពីអ្នកសិល្ប:ដូចគ្នា បានបញ្ជាក់ដែរថា លោក និល ច័ន្ទរតនា បានទទួលមរណភាពកាលពីព្រឹកថ្ងៃពុធ ១៣កើត ខែកក្តិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៣ ខែវិច្ឆិកា ឆ្នាំ២០២៤ ដោយរោគាពាធ។ ជាមួយខ្លឹមសារនេះ ចាត់ជាដំណឹងជម្រាបជូនដល់ញាតិមិត្តជិតឆ្ងាយនៃសពផងដែរ។

ប្រភពបានឲ្យដឹងបន្ថែមទៀតថា ពេលនេះសពលោក និល ច័ន្ទរតនា បានកំពុងតម្កល់និងធ្វើបុណ្យតាមប្រពៃណី នៅផ្ទះភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្តាល។ ដំណឹងមរណទុក្ខដ៏ក្រៀមក្រំខាងលើនេះ គេឃើញមានការចែករំលែកនិងការចូលរួមរំលែកទុក្ខយ៉ាងសោកសៅជាមួយក្រុមគ្រួសារនៃសពផងដែរ៕ អត្ថបទ៖ ចាន់រ៉ា