ស្ពាន​ឆ្លង​ទន្លេភ្ជាប់​ទៅ​ផ្លូវល្បឿនលឿន ដីឥដ្ឋ-ថ្មគរ ឈានទៅ​​ខួងគ្រឹះ ខណៈ​មាន​​ការ​សង់ស្ពាន​ដែកបណ្តោះអាសន្ន​សម្រួល​ការ​ងារសាងសង់

បើតាម​មន្រ្តីអ្នកនាំពាក្យក្រសួង​សាធារណការ​និង​ដឹកជញ្ជូន​ លោក ផន រឹម បាន​បង្ហាញពីសកម្មភាព​សាងសង់​ស្ពាន​ឆ្លង​ទន្លេមេគង្គ​ដីឥដ្ឋ-ថ្មគរ ភ្ជាប់ទៅផ្លូវល្បឿនលឿនភ្នំពេញបាវិត ដែលមកទល់ពេលនេះការដ្ឋានសាងសង់ស្ពានដីឥដ្ឋ-ថ្មគរ កំពុងដំណើរការយ៉ាងមមាញឹក រួមទាំងការងាររណបមួយចំនួនទៀត ដើម្បីធានាការសាងសង់តាមផែនការដែលបានគ្រោងទុក។

ជាមួយការ​បង្ហាញពីសកម្មភាព​ដំណើរការ​សាងសង់ មន្រ្តី​អ្នកនាំពាក្យ​ក្រសួង​​សាធារណការ​និង​ដឹកជញ្ជូន ក៏​បានរំលេចសំណង់ស្ពានដែកបណ្តោះអាសន្នដែល​សាងសង់​ជំនួសឱ្យការប្រើប្រាស់សាឡង់ សម្រាប់ដំណើរការខួងចាក់គ្រឹះ​សាង​សង់​ស្ពានដីឥដ្ឋ-ថ្មគរ។

បើតាម​មន្រ្តីអ្នកនាំពាក្យក្រសួង​សាធារណការ​និង​ដឹកជញ្ជូន​ ស្ពាន​ដីឥដ្ឋ-ថ្មគរ ស្ថិតក្នុងឃុំដីឥដ្ឋ ស្រុកកៀនស្វាយ និងឃុំថ្មគរ ស្រុកល្វាឯម ខេត្តកណ្តាល គឺជាគម្រោងដ៏សំខាន់ និងមានអត្ថន័យបំផុត សម្រាប់ការតភ្ជាប់, សេដ្ឋកិច្ច, ការដឹកជញ្ជូន និងសង្គម ពីភាគខាងត្បូង និងខាងកើត រាជធានីភ្នំពេញ ដោយភ្ជាប់មហាវិថី ស៊ី ជីនពីង (ក្រវាត់ក្រុងទី៣) ត្រង់ចំណុចផ្លូវជាតលេខ១ និងត្រើយខាងកើតភ្ជាប់ទៅផ្លូវល្បឿនលឿនភ្នំពេញ-បាវិត។

ស្ពានដីឥដ្ឋ-ថ្មគរ ជាប្រភេទស្ពានបេតុងប្រវែង ១.៦០០ ម៉ែត្រ, ទទឹង ២៦ ម៉ែត្រ និងផ្លូវតភ្ជាប់ទាំងសងខាងពីក្បាលស្ពានប្រវែង ២.១០០ ម៉ែត្រ,ទទឹង ២៦ ម៉ែត្រ ក្រាលAC កម្រាស់ ១០ សង់ទីម៉ែត្រ រួមទាំងការសាងសង់ផ្លូវប្តូរទិសចរាចរណ៍​(Interchange) ចំនួន ១ កន្លែង និងផ្លូវក្រោមស្ពាន (Underpass) ចំនួន ២ កន្លែង៕