ស្ពានដីឥដ្ឋ-ថ្មគរ ភ្ជាប់ទៅ​ផ្លូវ​ល្បឿនលឿន​ភ្នំពេញ-បាវិត ​សម្រេចបាន​ពាក់កណ្តាល​គម្រោង​ ​អនុវត្ត​លឿនជាង​ផែនការ

ស្ពានដីឥដ្ឋ-ថ្មគរ ដែលបើកការដ្ឋានសាងសង់រួមគ្នាជាមួយគម្រោងផ្លូវល្បឿនលឿនភ្នំពេញ-បាវិត គិតត្រឹមថ្ងៃទី ២២ ខែមេសា ឆ្នាំ២០២៦ សាងសង់​សម្រេចវឌ្ឍនភាពការងារ​បានប្រមាណ ៤៧,៦ % លឿនជាងផែនការ ២,៦០%។ នេះបើតាមលោក ផន រឹម មន្រ្តី​អ្នកនាំពាក្យក្រសួងសាធារណការ​ និង​ដឹកជញ្ជូន។

ស្ពានដីឥដ្ឋ-ថ្ម​គរ បាន​បើកការដ្ឋាន​សាងសង់​កាលពី​ថ្ងៃទី ៧ ខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

បើតាមលោក ផន រឹម គិតត្រឹមថ្ងៃទី២២ ខែមេសា ឆ្នាំ២០២៦ ការដ្ឋាន​សាងសង់ស្ពានដីឥដ្ឋ-ថ្ម​គរ សម្រេចបានវឌ្ឍនភាពការងារ ៤៧,៦ % លឿនជាងផែនការ ២,៦០% ខណៈ​ដែល​តាមផែនការ​គ្រោង​បញ្ចប់នៅ​ឆ្នាំ ២០២៧ ទន្ទឹម​ការដ្ឋាន​សាងសង់​ផ្លូវល្បឿនលឿន​ភ្នំំពេញ​បាវិត។

ស្ពានដីឥដ្ឋ-ថ្មគរ មានទីតាំងត្រើយខាងលិចស្ថិតក្នុងឃុំដីឥដ្ឋ ស្រុកកៀនស្វាយ និងត្រើយខាងកើតស្ថិតក្នុងឃុំថ្មគរ ស្រុកល្វាឯម ខេត្តកណ្តាល។

ស្ពាន​នេះជាគម្រោងដ៏សំខាន់សម្រាប់ការតភ្ជាប់ សេដ្ឋកិច្ច ការដឹកជញ្ជូន ពីភាគខាងត្បូងនិងខាងកើត រាជធានីភ្នំពេញ ដោយ​ភា្ជប់មហាវិថី ស៊ី ជីនពីង (ក្រវាត់ក្រុងទី៣) ត្រង់ចំណុចផ្លូវជាតិលេខ ១ និងត្រើយខាងកើតភ្ជាប់ទៅផ្លូវល្បឿន​លឿន​ភ្នំពេញ-បាវិត៕