កវីឯក ជ័យ ចាប វិលមកកម្ពុជាវិញហើយ ក្រោយស្ថានភាពជំងឺធូរស្រាល

ក្រោយសម្រាកព្យាបាល ២សប្តាហ៍ នៅវៀតណាម ឥឡូវនេះ លោកបណ្ឌិត ជ័យ​ ចាប​ សាស្ត្រាចារ្យបង្រៀនកំណាព្យ និងអក្សរសាស្ត្រខ្មែរ ដែលគាត់ស្គាល់ថា ស្តេចកំណាព្យ​ រហ័សនាម ចាបពូក​ ឈឺបានមកដល់ទឹកដីកម្ពុជាវិញហើយ។ នេះបើតាមលោក ព្រឿង ប្រណិត ប្រធានសមាគមអ្នកនិពន្ធខ្មែរ បានបញ្ជាក់នៅរសៀលថ្ងៃនេះ។

តាមរយៈសំណេរលើគណនីបណ្តាញទំនាក់ទំនងសង្គម លោកបានរៀបរាប់ថា រំភើចិត្ត ពេលឃើញសុខភាពលោកគ្រូបានប្រសើរ និងត្រឡប់មកដល់មាតុប្រទេសវិញដោយសុវត្ថិភាព។

លោកថា លោកគ្រូនៅតែគិតគូដល់ការងារទាំងឡាយទាំងពួង…លោកគ្រូប្រាប់ថា «សូមរវល់តាមភារកិច្ចរៀងៗខ្លួនចុះ» សិស្សក៏ជម្រាបវិញ សូមសម្រាកថែសុខភាព លោកគ្រូមានកម្លាំងសិស្សនឹងលេងលោកគ្រូទៀត។

គួររម្លឹកថា លោកបណ្ឌិត ជ័យ​ ចាប​ ឈឺធ្ងន់​ ត្រូវសង្គ្រោះបន្ទាន់នៅប្រទេសវៀតណាម កាលពីជាង ២សប្តាហ៍មុន។ យ៉ាងណា ដេីម្បីរួមចំណែកចែករំលែកទទួលបន្ទុកជាមួយគ្រួសារកវីនិពន្ធល្បីឈ្មោះរូបនេះ លើថ្លៃព្យាបាល សមាជិកសមាគមអ្នកនិពន្ធ​ខ្មែរ​ ក៏ដូចជាសប្បុរស ក៏បានរួមចំណែកជាថវិកាទៅតាមលទ្ធភាពដល់គ្រួសារលោក ខណៈក្រុមការងារសមាជិកង្នកនិពន្ធខ្មែរ ក៏បានទៅសួរសុខទុក្ខដោយផ្ទាល់ដល់មន្ទីរពេទ្តនៅវៀតណាមផងដែរ។