ព័ត៌មានជាតិ

គម្រោងវិនិយោគអេកូទេសចរណ៍ ១៥ គម្រោងចាយទុនខ្ទង់លានដុល្លារ នៅខេត្តមណ្ឌលគិរី កំពុងឆ្លងកាត់ការពិនិត្យសម្រេច

បានផុស

៥ ខែ មុន

នៅ

ថ្ងៃពុធ ២៦ កុម្ភៈ ២០២៥

ដោយ

លោក ងិន សុវិមាន អភិបាលរងខេត្តមណ្ឌលគិរី បានបង្ហើបពីគម្រោងវិនិយោគតំបន់អេកូទេសចរណ៍ចំនួន ១៥ នៅខេត្តមណ្ឌលគិរី កំពុងស្ថិតនៅក្រោមការពិនិត្យវាយតម្លៃ ដើម្បីអាចឈានទៅដំណើរការនៅពេលខាងមុខ។

គម្រោងវិនិយោគទាំងនោះត្រូវបានរដ្ឋាភិបាលកំពុងពិនិត្យសិក្សា តាមរយៈការផ្តល់ដីសម្បទានក្រោម ១០ ហិកតាសម្រាប់ការអនុវត្តគម្រោងនីមួយៗ នៅដែនជម្រកធម្មជាតិដើម្បីអភិវឌ្ឍជាគោលដៅអេកូទេសចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងិន សុវិមាន អភិបាលរងខេត្តមណ្ឌលគិរី (ខាងឆ្វេង)

ក្នុងដំណើរបេកសកកម្មចុះទៅខេត្តមណ្ឌលគិរីកាលពីពេលថ្មីៗនេះដឹកនាំដោយក្លិបអ្នកកាសែតកម្ពុជា ឆ្លើយតបទៅសំនួរ «កម្ពុជាថ្មី» លោក ងិន សុវិមាន បានមានប្រសាសន៍ថា តាមតួលេខផ្លូវការដែលលោកទទួលបាន មានគម្រោងវិនិយោគចំនួន ១៥ ដែលអាជ្ញាធរខេត្តកំពុងសិក្សាវាយតម្លៃដើម្បីអនុញ្ញាតិឲ្យដំណើរការអភិវឌ្ឍជាតំបន់គោលដៅអេកូទេសចរណ៍។

បើតាមលោកអភិបាលរងខេត្ត កន្លងទៅខេត្តមណ្ឌលគិរីមានការវិនិយោគវិស័យអេកូទេសចរណ៍តែ ១ កន្លែងប៉ុណ្ណោះដែលកំពុងដំណើរការគឺនៅរមណីយដ្ឋានទឹកជ្រោះប៊ូស្រា។

ស្របតាមចក្ខុវិស័យរបស់រដ្ឋាភិបាល ដែលចង់ប្រែក្លាយខេត្តមណ្ឌលគិរីជាតំបន់អេកូទេសចរណ៍នៅភាគឦសាន លោកអភិបាលរងបានបញ្ជាក់ថា គម្រោងទាំងនោះក៏បានការយល់ព្រមពីក្រសួងបរិស្ថាន ហើយលោកសង្ឃឹមថានឹងទទួលបានការពិនិត្យវាយម្លៃនិងអនុញ្ញាតិឲ្យដំណើរការទៅមុខ។

ជាមួយគ្នានេះ លោក ងិន សុវិមាន បានឱ្យដឹងថា ក្រោមការយកចិត្តទុកដាក់ពីសំណាក់រាជរដ្ឋាភិបាលកម្ពុជា ដែលបានជំរុញឱ្យអ្នកឧកញ៉ា ឧកញ៉ា ក៏ដូចជាបណ្តាអ្នកមាននៅក្នុងស្រុកឱ្យចូលមកបណ្តាក់ទុនវិនិយោគឱ្យបានច្រើននៅក្នុងខេត្តភាគឦសាន ឃើញថាពេលបច្ចុប្បន្នក្នុងខេត្តមណ្ឌលគិរីមានលំហូរនៃការចូលមកវិនិយោគជាបន្តបន្ទាប់ទៅលើវិស័យកសិកម្មនៅក្នុងកម្រិតមួយខ្ពស់ ដោយមានការដាំដុះដំណាំកៅស៊ូនៅលើផ្ទៃជាច្រើនពាន់ហិតា និងឈានដល់ខ្ទង់ម៉ឺនហិតា។

បន្ថែមពីនេះលោកអភិបាលរងខេត្ត ក៏បានបង្ហើបឱ្យដឹងដែរថា បច្ចុប្បន្នរដ្ឋបាលខេត្តក៏កំពុងសិក្សារៀបចំបង្កើតឲ្យមានតំបន់សេដ្ឋកិច្ចពិសេស នៅក្នុងខេត្តមណ្ឌលគិរីផងដែរ៕