អ្នកនាំពាក្យក្រសួងកសិកម្ម បំភ្លឺលើតម្លៃគ្រាប់ស្វាយ​ចន្ទី បន្ទាប់ពីមាន​ការផ្សព្វផ្សាយព័ត៌មាន​មិនពិត

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា បច្ចុប្បន្ននេះ តម្លៃគ្រាប់ស្វាយ​ចន្ទីសើមស្ថិតក្នុងចន្លោះ ៤៥០០ រៀល ដល់ ៥០០០ រៀល ក្នុងមួយ​គីឡូក្រាមដែលជាថ្លៃល្អមួយបើធៀបទៅនឹងឆ្នាំកន្លងទៅ សម្រាប់ស្តង់ដារដូវកាល​ប្រមូលផល​ធំខែ​មីនា និងអាចផ្តល់ផលចំណេញក្នុងរង្វង់ ៣-៤លានរៀល ក្នុងមួយហិកតា អាស្រ័យលើទិន្នផល​ទាបឬខ្ពស់។

លោក ឃឹម ហ្វីណង់ បានលើកឡើង បន្ទាប់ពីក្រុម MMO ផ្សព្វផ្សាយព័ត៌មានមិនពិតថា តម្លៃគ្រាប់ស្វាយចន្ទីលក់បានត្រឹមតែ ៣៥០០ រៀល ក្នុងមួយគីឡូក្រាម ​ព្រោះចង់​បាន Likes និងShares ដែលធ្វើឱ្យមានការភន្ត័នច្រឡំ។

លោក ឃឹម ហ្វីណង់ ទទូចថា៖ «សូមផ្សព្វផ្សាយព័ត៌មានដែលត្រឹមត្រូវ និងគ្រប់ជ្រុងជ្រោយ ជៀសវាងបង្កឱ្យមានការភ្ញាក់ផ្អើល និងភ័ន្តច្រលំដល់បងប្អូនកសិករយើង។ ការចង់បានLikes និងShares តាមមធ្យោបាយបែបនេះ កំពុងធ្វើបាបដល់កសិករយើងដោយផ្ទាល់ផង​ និង​ប្រយោ​ល​​ផងទៅវិញទេ។ ចង់មិនចង់ នឹងធ្វើឱ្យមានការព្រួយបារម្ភដល់​កសិករអ្នកដាំស្វាយ​ចន្ទី និងអាច​រឹត​តែពិបាកដល់ពួកគាត់ក្នុងការចរចាថ្លៃជាមួយអ្នកទិញ»៕