ការពារ​ជើង​ឯក​នៅ​តៃវ៉ាន់ វិសាខា ប៉ះ ក្រុមខ្លាំងកូរ៉េខាងត្បូង ជា​ជើង​ឯក​លីគ​៥សម័យ

ក្រុមបាល់ទះ Cheonan Hyundai Capital Skywalkers មកពីប្រទេស កូរ៉េខាងត្បូង ត្រូវបានចាត់ទុកជាគូប្រជែងដ៏ខ្លាំងបំផុតរបស់ក្រុមបាល់ទះ វិសាខា នៅក្នុងពានរង្វាន់ Win Streak Volleyball Invitational (WSVI) 2025 នៅតៃវ៉ាន់។

ការរៀបចំពានរង្វាន់ WSVI ឆ្នាំ ២០២៥ នេះហាក់មានការប្រែប្រួលច្រើន ដោយសារមានការចូលរួមសុទ្ធតែក្រុមខ្លាំងៗនៅក្នុងតំបន់អាស៊ី។ ជាក់ស្តែងក្រុមស្ថិតនៅពូល A ជាមួយ វិសាខា មាន Hyundai Capital Skywalkers (កូរ៉េខាងត្បូង), MBSA Pelican (ម៉ាឡេស៊ី) និង Men’s Volleyball Team for FISU (តៃវ៉ាន់)។ ចំណែកពូល B វិញមាន Win Streak  (តៃវ៉ាន់), Jarkata (ឥណ្ឌូណេស៊ី), Nakhornatchasima (ថៃ) និង Korea Armed Force (កូរ៉េខាងត្បូង)។

ក្នុងចំណោមគូប្រជែងទាំង ៣ នៅក្នុងពូល A របស់ក្រុមការពារតំណែងជើងឯក វិសាខា គឺក្រុម Skywalkers ត្រូវបានគេចាត់ទុកជាគូប្រជែងដ៏ខ្លាំងក្លាបំផុត ខណៈពួកគេទើបតែបានឈ្នះជើងឯកលីគកំពូលកូរ៉េខាងត្បូង (V-League) កាលពីពេលថ្មីៗនេះ។

ក្រុម Skywalker នេះ គឺធ្លាប់លើកពានលីគ និងខាប់ របស់ប្រទេស កូរ៉េខាងត្បូងសឹងតែរាប់ភ្លេចហើយ។ ពួកគេធ្លាប់ឈ្នះពាន V-League ៥ លើក រដូវកាល ២០០៥-២០០៦, ២០០៦-២០០៧, ២០១៦-២០១៧, ២០១៨-២០១៩ និង ២០២៤-២០២៥។ មិនត្រឹមតែប៉ុណ្ណោះពួកគេធ្លាប់ឈ្នះពាន Korea Volleyball Super League ៥ លើក និងពាន Kovo Cup ៥ លើក ក្នុងឆ្នាំ ២០០៦, ២០០៨, ២០១០, ២០១៣ និង ២០២៤។

អ្វីដែលចាប់អារម្មណ៍មួយទៀត គឺពួកគេមានគ្រូបង្វឹកជាសញ្ជាតិ បារាំង លោក Philippe Blain ដែលជាអតីតគ្រូជម្រើសជាតិ បារាំង និងជប៉ុន។ ចំណែកកីឡាកររបស់ពួកគេទាំង ២០ នាក់វិញ មានបរទេស ២ នាក់ គឺកីឡាករសញ្ជាតិ ចិន Xinpeng Deng និងអ្នកវាយផ្តាច់ដ៏ឆ្នើមសញ្ជាតិ គុយបា Leonardo Martinez និងក្រៅពីនោះសុទ្ធតែជាកីឡាករសញ្ជាតិ កូរ៉េខាងត្បូង។

សូមបញ្ជាក់ជាថ្មីថា ក្រុមបាល់ទះ វិសាខា នឹងត្រូវប្រកួតវគ្គ​សន្សំពិន្ទុ​ក្នុង​ពូល​ចំនួន​ ៣ ប្រកួត ដោយប្រកួតទី ១ ជួបជាមួយក្រុម MBSA Pelican នៅថ្ងៃទី ៣០ ខែ មេសា, ប្រកួតទី ២ ត្រូវជួបជាមួយក្រុមតៃវ៉ាន់​ Men’s Volleyball Team for FISU នៅថ្ងៃទី ១ ខែ ឧសភា និងប្រកួតទី ៣ ជួប Sky Walkers នៅថ្ងៃទី ២ ខែ ឧសភា៕

អត្ថបទ៖ សេម កុសល