កីឡា

រ៉ុន សុខជា អាចនឹងជាសៈស្បើយចូលជួយក្រុមស្នងការរាជធានីភ្នំពេញបានវិញនៅជុំទី២ តេជោលីគ

បានផុស

១ ខែ មុន

នៅ

ថ្ងៃចន្ទ ១ មិថុនា ២០២៦

ដោយ

កីឡាករ រ៉ុន សុខជា អាចនឹងជាសៈស្បើយពីរបួសស្នារបស់ខ្លួន និងអាចចូលជួយក្រុមបាល់ទះស្នងការរាជធានីភ្នំពេញបានពេញលេញវិញ នៃការប្រកួតវិលជុំសន្សំពិន្ទុក្នុងជុំទី២ អំឡុងថ្ងៃទី១៩ ខែមិថុនា ពានរង្វាន់តេជោលីគ លើកទី៣ ឆ្នាំ២០២៦ ។

កីឡាករ រ៉ុន សុខជា

នេះបើតាមកិច្ចសម្ភាសកីឡាករ រ៉ុន សុខជា ថាស្ថានភាពរបួសស្នាពីមុនមកនេះឥលូវជាសៈស្បើយសឹងតែ ៩៩% ទៅហើយ។ រូបគេអាចនឹងចូលជួយក្រុមរបស់ខ្លួនបានវិញនៅក្នុងការប្រកួតវិលជុំសន្សំពិន្ទុជុំទី២ ឆាប់ៗខាងមុខនេះដែលជាវគ្គសំខាន់។

កីឡាករ រ៉ុន សុខជា បន្ថែមទៀតថា បន្ទាប់ពីជាសៈស្បើយវិញនេះគឺរូបគេមិនបណ្ដោយនោះឡើយ ពោលនឹងខំប្រឹងប្រែងហ្វឹកហាត់ ឬប្រកួតឲ្យបានល្អឡើងវិញ។ យ៉ាងណារូបគេមិនបណ្ដោយឲ្យសមត្ថភាពរបស់ខ្លួនធ្លាក់ចុះទៅតាមការរបួស ឬការអាក់ខានប្រកួតនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទះស្នងការរាជធានីភ្នំពេញ

បញ្ជាក់ដែរថា ស្មាត់ឆ្វេងរបស់ក្រុមស្នងការរាជធានីភ្នំពេញ រ៉ុន សុខជា បន្ទាប់ពីជួយក្រុមរបស់ខ្លួនឲ្យឈ្នះពានរង្វាន់សម្ដេចក្រឡាហោម នៅដើមឆ្នាំ២០២៦ នេះមកគឺរូបគេមានរបួសស្នាផងដែរ និងបន្តព្យាបាលរហូតមកដល់ពេលនេះ។ ក្នុងការប្រកួតតេជោលីគ លើកទី៣ ឆ្នាំ២០២៦ នៃវគ្គវិលជុំសន្សំពិន្ទុជុំទី១ អំឡុង ៤-៥ប្រកួតកន្លងទៅនេះរូបគេបានបង្ហាញមុខក្នុងទីលានខ្លះដែរ ប៉ុន្តែហាក់ធ្វើមិនសូវបានល្អ ឬមិនមានសមត្ថភាពលេងបាន ១០០% នោះឡើយដោយសារតែរបួសស្នារបស់គេ។ ការប្រកួតវិលជុំសន្សពិន្ទុជុំទី១ នេះនៅសល់តែ ២ប្រកួតទៀតប៉ុណ្ណោះនឹងបញ្ចប់ការប្រកួតហើយ និងបន្តជុំទី២ នៅថ្ងៃទី១៩ ខែមិថុនា ឆ្នាំ២០២៦ ខាងមុខ៕

អត្ថបទដោយ៖ នួន ស៊ីណា