មន្ត្រីជំនាញ៖ «ការរស់នៅស្អាត ហូបស្អាត និងផឹកស្អាត» នៅតែជាវិធានការដ៏ល្អបំផុតក្នុងការបង្ការការឆ្លងមេរោគផ្សេងៗ

មន្ត្រីជំនាញសុខាភិបាល បានលើកឡើងថា «ការរស់នៅស្អាត ហូបស្អាត និងផឹកស្អាត» នៅតែជាវិធានការដ៏ល្អបំផុត និងមានប្រសិទ្ធភាពបំផុតក្នុងការបង្ការការឆ្លងមេរោគផ្សេងៗ ពិសេសជំងឺរាគរូស និងការពុលចំណីអាហារ។

លោកវេជ្ជបណ្ឌិត ញឹប អង្គាបុស្ស ប្រធានមន្ទីរពេទ្យកុមារជាតិ បានមានប្រសាសន៍នៅព្រឹកថ្ងៃទី១ឧសភានេះ ដោយបានអំពាវនាវដល់ប្រជាពលរដ្ឋត្រូវបន្តអនុវត្តវិធានការ «ការរស់នៅស្អាត ហូបស្អាត និងផឹកស្អាត» ឱ្យបានខ្ជាប់ខ្ជួនដូចជាការរស់នៅស្អាតត្រូវរស់នៅប្រកបដោយអនាម័យ បរិស្ថានស្អាតកន្លែងការងារ និងលំនៅដ្ឋានត្រូវស្អាតមិនមានធូលី ផ្សែង
ឬទឹកស្អុយ ក្លិនអាក្រក់ និងឧស្សាហ៍លាងសំអាតដៃជាមួយសាប៊ូ និងទឹកឬអាកុលឱ្យបានស្អាត។ លើសពីនេះត្រូវហូបស្អាតត្រូវបរិភោគចំណីអាហារណាដែលមានអនាម័យលាងសំអាតអាហារចម្អិន និងគ្របទុកដាក់ម្ហូបអាហារឱ្យបានត្រឹមត្រូវ និងផឹកស្អាតត្រូវបរិភោគទឹកដែលគ្មានមេរោគ ដូចជាទឹកដាំពុះ និងទឹកបរិសុទ្ធដែលមានការផលិតតាមស្តង់ដាខ្ពស់។

លោកវេជ្ជបណ្ឌិត បានបន្តថា «ពេលប្រជាពលរដ្ឋអនុវត្តវិធានការទាំងបីនេះបានខ្ជាប់ខ្ជួន នឹងជួយបន្ថយការឆ្លងមេរោគ
ផ្សេងៗធ្វើឱ្យសុខភាពល្អកាត់បន្ថយការចំណាយក្នុងព្យាបាលជំងឺ និងអាចប្រកបរបរចិញ្ចឹមជីវិតបានកាន់តែប្រសើរព្រមទាំងធ្វើឱ្យជីវភាពគ្រួសារកាន់តែរីកចម្រើន»។ លោកវេជ្ជបណ្ឌិតបានបន្ថែមទៀតថា ក្រៅពីនេះប្រជាពលរដ្ឋត្រូវលាងសំអាតដៃឱ្យបានត្រឹមត្រូវ ព្រោះថាវាអាចកាត់បន្ថយការចម្លងរោគផ្សេងៗរហូតដល់ទៅ៧០%បើទោះបីជាការលាងដៃជាវិធីមួយសាមញ្ញតែជាវិធីមួយចាំបាច់សម្រាប់មនុស្សគ្រប់ៗគ្នា ។

លោកវេជ្ជបណ្ឌិតបានបន្តទៀតថា «បច្ចុប្បន្ននេះនរណាក៏បានលាងដៃដែរតែមានមនុស្សមួយចំនួនលាងដៃមិនបានត្រឹមត្រូវ​បណ្តាលឱ្យឆ្លងរោគផ្សេងៗមកពីលាងមិនស្អាតនេះ។ ដូចនេះការប្រារព្វពិធីនេះដើម្បីបង្ហាញពីរបៀបលាងសំអាតដៃដល់មាតាបិតាកុមារ និងកុមារដែលបាននាំកូនមកពិគ្រោះជំងឺ ឬសម្រាកនៅមន្ទីរពេទ្យឱ្យបានយល់ដឹងដើម្បីធ្វើឱ្យការលាងដៃបានស្អាតល្អ និងបន្តផ្សព្វផ្សាយទៅសមាជិកក្រុមគ្រួសារនៅផ្ទះ ឬសហគមន៍កាត់បន្ថយការឆ្លងជំងឺផ្សេងៗ»។

លោកវេជ្ជបបណ្ឌិតបានបន្ថែមថា «ដៃរបស់យើងតែងតែប៉ះពាល់ទៅនឹងវត្ថុផ្សេងៗហើយមានភ្ជាប់មេរោគចូលទៅក្នុងខ្លួន
យើងហើយមេរោគទាំងនោះនឹងបន្តទៅចម្លងដល់អ្នកផ្សេងទៀតនៅពេលដែលយើងមិនបានលាងសំអាតដៃឱ្យបានត្រឹមត្រូវទេនោះ»។ លោកវេជ្ជបណ្ឌិតបានបន្ថែមថា «រៀងរាល់ថ្ងៃបុគ្គលិកយើងខិតខំប្រឹងប្រែងយ៉ាងហ្មត់ចត់ដើម្បីធានាឲ្យ
មានសុវត្ថិភាពសម្រាប់អ្នកជំងឺ ជាពិសេសកុមារដែលកំពុងទទួលការថែទាំនៅក្នុងមន្ទីរពេទ្យ។ តែទោះជាយើង បានខិតខំជាប្រចាំថ្ងៃរួចហើយក៏ដោយ យើងនៅតែដឹងថា ជំងឺឆ្លងនៅតែជាបញ្ហាដ៏ធ្ងន់ធ្ងរមួយមិនត្រឹមតែប៉ុណ្ណោះនៅក្នុងមន្ទីរពេទ្យ ប៉ុន្តែស្ថិតនៅក្នុងសហគមន៍ផងដែរដែលអនាម័យមិនល្អអាចបណ្តាលឲ្យមានជំងឺដែលអាចការពារ»។

លោកវេជ្ជបណ្ឌិតបានបញ្ជាក់ថា ដូចនេះការលាងដៃមិនមែនធ្វើតែនៅមន្ទីរពេទ្យទេ ពោលគឺត្រូវធ្វើនៅតាមផ្ទះនិងទី​សាធារណៈផ្សេងៗ ព្រោះថាមេរោគមិនមែនមានតែនៅក្នុងមន្ទីរពេទ្យទេគឺមានគ្រប់ទីកន្លែងដែលមិនស្អាតនិងមិនមានអនាម័យ៕

អត្ថបទ៖ សំអឿន