រមណីយ​ដ្ឋានភ្នំសំពៅ គ្រោងសាងសង់សួនកម្សាន្តបន្ថែម និង​ចំណតរថយន្ត ក្រោយ​​​ក្លាយ​ជាគោល​ដៅទេសចរ​ចម្រុះ​ជាតិសាសន៍

ក្រោយរមណីយដ្ឋានភ្នំសំពៅបានសាងសង់កែលម្អជាបន្តបន្ទាប់ ភ្ញៀវចូលមកកម្សាន្ត ទាំងជាតិ និងអន្តរជាតិ បានកើនឡើងជាបន្តបន្ទាប់ក្នុងមួយថ្ងៃៗ។

រមណីយដ្ឋានភ្នំសំពៅមាន២គោលដៅ ដែលភ្ញៀវជាតិ និងអន្តរជាតិចូលចិត្តមកទស្សនាកម្សាន្ត ក្នុងនោះមាន ទស្សនាហ្វូងសត្វប្រចៀវនៅពេលល្ងាច និងដើរកម្សាន្តនៅតាមសួនច្បារ និងឡើងទៅទស្សនាកម្សាន្តគ្រប់ល្អាងនៅលើភ្នំផង។

អ្នកស្រី សួន ថាន ជាភ្ញៀវទេសចរក្នុងស្រុក មានទីលំនៅក្នុងឃុំគា ស្រុកម៉ោងឫស្សី ខេត្ត​បាត់ដំបង​បានលើកឡើងថា ភ្នំសំពៅពេលនេះមិនដូចពេលមុននោះទេ គឺមានការវិវឌ្ឍន៍ច្រើនណាស់ ខណះកាលគ្រាមុនអ្នកស្រីឡើងទៅវត្តលើភ្នំស្ងាត់ជ្រងុំ ហើយតាមជើងភ្នំ មានសភាពអាប់អ៊ួរទៅដោយតូបលក់ដូរ និងអ្នកសុំទានយ៉ាងច្រើនគ្រប់ច្រកល្ហក។ តែពេលនេះអ្នកស្រីឃើញហើយរីករាយក្នុងចិត្តស្ទើរមិនចង់ឈានជើងចេញ។

អ្នកស្រីថា “កាលគ្រានោះខ្ញុំបារម្ភពីការទុកដាក់ម៉ូតូនៅខាក្រោម តែបើផ្ញើអ្នកលក់នៅតាមជើងភ្នំគេយកថ្លៃ ហើយបច្ចុប្បន្នមានការអភិវឌ្ឍន៍ក្នុងការកែច្នៃយ៉ាងស្អាតបែបនេះ ក៏ត្រូវតែមានសាងសង់កន្លែងផ្ញើរថយន្តនិង ម៉ូតូទើបប្រសើរ ព្រោះខ្ញុំឃើញ​មានរថយន្តភ្ញៀវច្រើនណាស់នៅចតពាសវាលពាលកាល”។

ចំណែកអ្នកស្រី វ័ណ្ណថា បានឲ្យដឹងដែរថា កាលពីក្នុងអំឡុងឆ្នាំ១៩៩៥ អ្នកស្រីបានទៅវត្តលើភ្នំជាញឹកញាប់ រហូតដល់អ្នកស្រី បានជួយផ្តួចផ្តើមនិងចូលជាថវិការតាមរយះថវិការម្តាយរបស់អ្នកស្រីនៅប្រទេសបារាំង ដើម្បីសាងសង់ព្រះអង្គធំមួយអង្គនៅលើកំពូលភ្នំផងដែរ។

អ្នកស្រីបន្តថា “កាលណោះ​ទាំងជើងភ្នំ និងកំពូលភ្នំស្ងាត់ណាស់ ហើយមានមនុស្សតិចណាស់ ដែលឡើងទៅលើភ្នំ លុះពេលបានសាងសង់ព្រះអង្គធំ១អង្គបានរួចរាល់ ក៏មានមនុស្សម្នាឡើងទៅគោរពបានច្រើនគួសម”។

បើតាមមន្ត្រីរដ្ឋបាលខេត្តបាត់ដំបង​បានឲ្យដឹងថា បន្ទាប់ពីអនុវត្តគម្រោងសាងសង់កែលម្អក្នុងតំបន់រមណីយដ្ឋានប្រវត្តិសាស្ត្រ ភ្នំសំពៅ ដែលមានទីតាំងស្ថិតនៅភូមិភ្នំសំពៅកើត ឃុំភ្នំសំពៅ ស្រុកបាណន់ខេត្តបាត់ដំបង ដែលសម្រេចបានសមិទ្ធផលជាច្រើននាពេលកន្លងមកនេះ គឺមានការគាំទ្រពីសំណាក់បងប្អូនប្រជាពលរដ្ឋ ព្រមទាំងមានភ្ញៀវទេសចរជាតិនិងអន្តរជាតិ បានមកទស្ស នាកម្សាន្តសប្បាយរីករាយយ៉ាងច្រើនកុះករ ជារៀងរាល់ថ្ងៃ។

ដើម្បីឆ្លើយតបនិងកំណើនភ្ញៀវ​ទេសចរ​ នៅថ្ងៃទី៧ ខែឧសភា ឆ្នាំ២០២៥ លោក សុខ លូ អភិបាល នៃគណះអភិខេត្តបា នដឹកនាំក្រុមការងារជំនាញ និងអ្នកពាក់ព័ន្ធផ្សេងទៀត ចុះត្រួតពិនិត្យទីតាំងបរិវេណជើងភ្នំសំពៅ និងបន្តពិនិត្យស្ថានភាពនិង សណ្តាប់ធ្នាប់នៅរមណីយដ្ឋានប្រវត្តិសាស្ត្រ ភ្នំសំពៅ ដើម្បីរៀបចំពង្រឹងសន្តិសុខ គ្រប់គ្រងសណ្តាប់ធ្នាប់ និង របៀបរៀបរយ ទៅលើការលក់ដូរ ការរៀបចំពង្រីកផ្លូវ រៀបចំតុបតែងលម្អរ សាងសង់សួនច្បារបន្ថែម និងរៀបចំឱ្យមានចំណតរថយន្តជាដើម ដើម្បីអភិវឌ្ឍតំបន់នេះក្លាយជាតំបន់ទេសចរណ៍ដ៏មានសក្តានុពល និងជាគោលដៅទេសចរណ៍ដ៏ទាក់ទាញមួយក្នុងខេត្តអាចផ្តល់ផលប្រយោជន៍ ជួយលើកកម្ពស់សេដ្ឋកិច្ច ជីវភាពប្រជាពលរដ្ឋក្នុងខេត្តបាត់ដំបងបានកាន់តែល្អប្រសើរ និងយូរអង្វែង។

លោក ហម អរុណ អនុប្រធាននៃមន្ទីរទេសចរណ៍បាត់ដំបង​បានឲ្យដឹងថា តាមរយះការគាំទ្រពីប្រជាពលរដ្ឋនៅក្នុងមូលដ្ឋានរួមនិងភ្ញៀវ ជាតិនិងអន្តរជាតិដែលបានមកទស្សនាកម្សាន្តហ្វូងសត្វប្រចៀវកាន់តែមានចំនួនច្រើនក្នុងមួយថ្ងៃៗរដ្ឋបាលខេត្តគ្រោងនឹង​សាងសង់សួនកម្សាន្តបន្ថែម ក្នុងនោះក៏មានសាងសង់ចំណតរថយន្តផងដែរ ងាយស្រួលសម្រាប់ភ្ញៀវមកកម្សាន្តឲ្យមានភាពកក់ក្តៅ និងមានទំនុកចិត្តខ្ពស់លើទ្រព្យសម្បត្តិរបស់ពួកគេ៕

អត្ថបទ÷សៅ សារិទ្ធ