អភិបាលខេត្តកណ្តាល ថ្លែងអំណរគុណពលរដ្ឋ ដែល​ចូលរួម​គាំទ្រ​រាជរដ្ឋាភិបាល​កសាង​គម្រោង​ព្រែកជីកហ្វូណនតេជោ

កណ្តាល ៖ លោក គួច ចំរើន អភិបាលនៃគណៈអភិបាលខេត្តកណ្ដាល ក្នុង​នាម​រាជរដ្ឋាភិបាល​ជួប​សំណេះសំណាល​ជា​មួយ​ប្រជាពលរដ្ឋ ថ្លែង​អំណរ​គុណ​នូវ​ទឹកចិត្ត​ដ៏​ប្រពៃ​ថ្លៃថ្លា​របស់​បងប្អូនប្រជាពលរដ្ឋទាំងអស់ ដែល​បាន​ចូល​រួម​គាំទ្រ​ជាមួយ​រាជរដ្ឋាភិបាល ដែលមានក្បាល ដី​ពាក់ព័ន្ធ​ជា​មួយ​គម្រោង​ព្រែកជីកហ្វូណនតេជោ ដោយ​មាន​ការ​ចូលរួម​ពី​ក្រុម​ការងារអន្តរក្រសួង នៅ​បរិវេណ​វត្តព្រែកពោធិ៍ ក្នុងឃុំត្រើយស្លា ស្រុកស្អាង ខេត្តកណ្តាល។

ក្នុង​នោះ​លោកអភិបាលខេត្តបានបញ្ជាក់ថា ក្រុមការងារអន្តរក្រសួង បានសិក្សាធ្វើ​យ៉ាងណាឱ្យផ្លូវទឹកនេះ បើក​នាវា​ចូល​បាន ហើយ​រងផលប៉ះពាល់តិចតួចបំផុត លើបងប្អូនប្រជាពលរដ្ឋ ដោយ​បញ្ចៀស​នូវ​ផល​វិបាក​របស់​ប្រជាពលរដ្ឋ ហើយ​ប្រសិន​បើ​ការ​ប៉ះពាល់កាន់តែច្រើន ការលំបាករបស់ប្រជាពលរដ្ឋ និងបំណងក៏កាន់តែច្រើនផងដែរ។

ហើយនៅពេលព្រែកជីករបស់យើង សាងសង់រួចរាល់នោះ នឹង​ផ្ដល់​អត្ថប្រយោជន៍​ក្នុង​ការ​ទាក់​ទាញ​អ្នក​វិនិយោគទាំងក្នុង និងក្រៅប្រទេស ដើម្បីរកស៊ីនៅក្នុងប្រទេសរបស់យើង ហើយបង្កើតការងារកាន់តែច្រើនជូនបងប្អូនប្រជាពលរដ្ឋខ្មែររបស់យើង។

ធានាដល់ការផ្គត់ផ្គង់ត្រីសាច់ និងធ្វើការនេសាទបាននៅក្នុងតំបន់ព្រែកជីកនេះ ពិសេសព្រែកជីកនេះអាចទាក់ទាញដល់ភ្ញៀវទេសចរណ៍ នៅពេលដែលព្រែកជីកនេះសាងសង់រួច ហេដ្ឋារចនាសម្ព័ន្ធជាច្រើនត្រូវបានសាងសង់ ដែលអាចទាក់ទាញដល់ភ្ញៀវទេសចរណ៍មកកម្សាន្តសប្បាយ និងបង្កើតការងារជាច្រើនជូនបងប្អូនប្រជាពលរដ្ឋយើង និងលើកកម្ពស់ជីវភាពរបស់បងប្អូនប្រជាពលរដ្ឋនៅក្នុងតំបន់ឱ្យកាន់តែល្អប្រសើរឡើយ។

លោក​អភិបាលខេត្ត បន្ត​ថា កម្ពុជារបស់យើងបានខិតខំ​ប្រឹងប្រែងធ្វើឱ្យប្រទេសរបស់យើង មានឯករាជ្យភាពលើការដឹកជញ្ជូនតាមផ្លូវទឹក ដូចនេះរាជរដ្ឋាភិបាលកម្ពុជា ដោយខិតខំធ្វើយ៉ាងណាឱ្យប្រទេសរបស់យើងមានផ្លូវទឹកដោយខ្លួនឯង ដូច្នេះរាជរដ្ឋាភិបាលរបស់យើងខិតខំធ្វើយ៉ាងណាឱ្យគម្រោងព្រែកជីកហ្វូណនតេជោនេះទទួលបានជោគជ័យ។

ជាមួយគ្នានោះផងដែរ ក្រុមការងារអន្តរក្រសួង ក៏បានពន្យល់ពីលក្ខខណ្ឌបច្ចេកទេស ការសាងសង់ព្រែកជីកហ្វូណនតេជោ រួមមានជម្រៅ ទំហំព្រែកជាក់ស្ដែង និងការពង្រីកនៅតំបន់នៃការបទនាវាផងដែរ។ ព្រមទាំងបានធ្វើការពន្យល់ពីលក្ខខណ្ឌក្នុងការសងផលប៉ះពាល់ ជូនដល់ប្រជាពលរដ្ឋ ដោយក្នុងនោះប្រជាពលរដ្ឋទាំងអស់ដែលរងផលប៉ះពាល់ដោយគម្រោងនេះ នឹងទទួលបានការដោះស្រាយផលប៉ះពាល់ពីរាជរដ្ឋាភិបាលគ្រប់ៗគ្នា បន្ទាប់ពីក្រុមការងារចុះពិនិត្យ និងវាយតម្លៃជាក់ស្ដែងនៅលើទីតាំងផ្ទាល់៕

អត្ថបទ ៖ ម៉េង