កម្ពុជា-នីហ្សេរីយ៉ា ចង់ឱ្យមានការផ្លាស់ប្ដូរវគ្គបណ្ដុះបណ្ដាលយោធារវាងប្រទេសទាំងពីរ

កម្ពុជា និងនីហ្សេរីយ៉ា បានបង្ហាញបំណងចង់ឱ្យមានការផ្លាស់ប្ដូរវគ្គបណ្ដុះបណ្ដាលយោធារវាងប្រទេសទាំងពីរ ដើម្បីជាការពង្រឹងដល់ទំនាក់ទំនង និងកិច្ចសហប្រតិបត្តិការរវាងកងទ័ពកម្ពុជា-នីហ្សេរីយ៉ា។

បំណងនេះត្រូវបានបង្ហាញឡើងដោយអគ្គមេបញ្ជាការកងទ័ពរបស់កម្ពុជា និងទីប្រឹក្សាយោធាប្រទេសនីហ្សេរីយ៉ាប្រចាំកម្ពុជា ដែលមាននិវេសនដ្ឋាននៅទីក្រុងគូឡាឡាំពួរ ប្រទេសម៉ាឡេស៊ី ក្នុងពេលជួបពិភាក្សាការងារ កាលពីព្រឹកថ្ងៃទី៥ ខែមិថុនា ឆ្នាំ២០២៥។ នាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ បានស្វាគមន៍ដំណើរបំពេញទស្សនកិច្ចរបស់ឧត្តមសេនីយ៍ទោ RAZAQ KOLAWOLE SHITTU ដោយជឿជាក់ថា ដំណើរទស្សនកិច្ចនេះ នឹងជួយពង្រឹងដល់ទំនាក់ទំនង កិច្ចសហប្រតិបត្តិការរវាងកងទ័ពប្រទេសទាំងពីរ។

លោកឧត្តមសេនីយ៍ទោ RAZAQ KOLAWOLE SHITTU ទីប្រឹក្សាយោធានីហ្សេរីយ៉ា លើកឡើងថា ប្រទេសទាំងពីរកំពុងបង្កើនទំនាក់ទំនងជាមួយគ្នា ហើយអ្វីដែលពិសេសនោះ គឺនីហ្សេរីយ៉ា និងកម្ពុជា កំពុងអភិវឌ្ឍន៍ដូចគ្នា ដោយសង្ឃឹមថា ប្រទេសទាំងពីរនឹងផ្តល់ឱកាសដល់ការចែករំលែកបទពិសោធន៍ និងចំណេះដឹងឱ្យគ្នាបានច្រើន។

ទីប្រឹក្សាយោធានីហ្សេរីយ៉ា បានបង្ហាញការចាប់អារម្មណ៍លើការងារបណ្ដុះបណ្ដាល ដែលនីហ្សេសេរីយ៉ា និងកម្ពុជា មានវិទ្យាស្ថានបណ្ដុះបណ្ដាលជាច្រើន។ ដោយហេតុនេះ ប្រទេសនីហ្សេរីយ៉ា ស្វាគមន៍ដល់យោធិន នៃកងយោធពលខេមរភូមិន្ទ ដែលមានបំណងចង់ទៅបណ្ដុះបណ្ដាលនៅប្រទេសនីហ្សេរីយ៉ា បើប្រទេសទាំងពីរមានកិច្ចព្រមព្រៀងជាមួយគ្នា។

ចំណុចនេះ នាយឧត្តមសេនីយ៍ វង្ស ពិសេន បានអរគុណចំពោះការលើកឡើងនេះ ព្រោះនេះជាការចង់បានរបស់អគ្គបញ្ជាការ ក្នុងការបណ្ដុះបណ្ដាលធនធានមនុស្ស។ តែចំពោះមុខគប្បីត្រូវធ្វើការសម្របសម្រួលនៅថ្នាក់ក្រសួងការពារជាតិជាមុន ទើបកិច្ចសហប្រតិបត្តិការនេះប្រព្រឹត្តទៅបានរលូន និងល្អប្រសើរ៕