សេដ្ឋកិច្ច

ចម្ការទុរេន ចំនួន ១១២ កន្លែង បំពេញតាមគោលការណ៍អាចនាំចេញទៅទីផ្សារប្រទេសចិន

បានផុស

២ សប្តាហ៍ មុន

នៅ

ថ្ងៃអង្គារ ៨ កក្កដា ២០២៥

ដោយ

កាលពីថ្ងៃទី០៥ ខែកក្កដា ឆ្នាំ២០២៥ កន្លងទៅនេះ អគ្គរដ្ឋបាលគយចិន (GACC) អាចសម្រេចចជាផ្លូវការអនុញ្ញាតឱ្យកម្ពុជានាំចេញផ្លែទុរេនស្រស់ទៅកាន់ប្រទេសចិន ក្នុងនោះ មានចម្ការទុរេនចំនួន ១២២កន្លែង ត្រូវបានអនុញ្ញាតឱ្យនាំចេញផ្លែទុរេនស្រស់ពីកម្ពុជាទៅកាន់ប្រទេសចិនជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជា បានទទួលការអនុញ្ញាតជាផ្លូវការពីអគ្គរដ្ឋបាលគយចិន (GACC) ដើម្បីចាប់ផ្តើមធ្វើការនាំចេញផ្លែទុរេនស្រស់ ដោយផ្ទាល់ទៅកាន់ទីផ្សារប្រទេសចិន ស្របតាមពិធីសារដែលបានចុះហត្ថលេខាកាលពីខែមេសា។ សេចក្តីសម្រេចនេះធ្វើឡើងបន្ទាប់ពី GACC បានវាយតម្លៃ និងយល់ព្រមលើសំណើចុះបញ្ជីចម្ការទុរេន ចំនួន ១១២កន្លែង និងរោងចក្រវេចខ្ចប់ចំនួន ៣០កន្លែង ដែលបានបំពេញតាមគោលការណ៍កសិកម្មល្អ (GAP) លក្ខខណ្ឌភូតគាមអនាម័យ និងស្តង់ដាសុវត្ថិភាពចំណីអាហាររបស់ប្រទេសចិន។

ទន្ទឹមនេះ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យ កម្ពុជាថ្មី ដឹងបន្ថែមថា ទីផ្សារចិន គឺជាទីផ្សារដ៏ធំសម្រាប់ការនាំចេញផលិតផលកសិកម្មពីកម្ពុជា ហើយអ្វីដែលយើងអាចទទួលបានរហូតមកដល់ពេលនេះ គឺការអនុញ្ញាតឱ្យមានការនាំចេញនូវផ្លែទុរេនស្រស់ជាផ្លូវការទៅកាន់ទីផ្សារប្រទេសចិនផ្ទាល់។

លោកថា ការអនុញ្ញាតឱ្យនាំចេញទុរេនស្រស់នេះ ដោយសារតែដំណាំនេះគឺជា ដំណាំដែលមានតម្លៃបន្ថែមខ្ពស់ ហើយជាដំណាំដែលមានសក្ដានុពលខ្ពស់ផងដែរ។

ចំពោះលើការនាំចេញទុរេនស្រស់ទៅចិន លោក ឃឹម ហ្វីណង់ បានអះអាងថា កម្ពុជាក៏កំពុងរំពឹងទុកថា ទីផ្សារនេះនិងបានជួយពង្រីកនូវការធ្វើផលិតកម្មទុរេននៅកម្ពុជាបន្ថែមទៀត បន្ថែមពីនេះកម្ពុជាក៏មានការរំពឹងទុកខ្ពស់ពាក់ព័ន្ធនិងកសិផលដទៃទៀតដែលកំពុងរងចាំនូវការអនុញ្ញាតជាផ្លូវការពីសំណាកគយចិនផងដែរ។

អ្នកនាំពាក្យរូបនេះបានបញ្ជាក់ថា សមិទ្ធផលទាំងអស់នេះកើតចេញពីការខិតខំប្រឹងប្រែងរបស់ក្រសួងកសិកម្មក្នុងការចរចា រហូតដល់សម្រេចបាននូវការរៀបចំចុះពិធីសារពាក់ព័ន្ធនិងអនាម័យ និងភូតគាមអនាម័យដែលជាការបើកផ្លូវដ៏សំខាន់សម្រាប់ការនាំចេញកសិផលពីកម្ពុជា ទៅកាន់ទីផ្សារប្រទេសចិនដោយផ្ទាល់ផងដែរ។

ជាមួយគ្នានេះ លោក ហេង ឆេងលី ប្រធានសហគមន៍ទុរេនបែកអន្លូង ប្រាប់ កម្ពុជាថ្មី ថា អគ្គនាយកដ្ឋាន កសិកម្មនៃក្រសួងកសិកម្មជ្រើសរើសយកចម្ការចំនួន ១០ ខណៈសហគមន៍របស់លោកបានស្នើចុះបញ្ជីសម្រាប់ការបញ្ជាក់វិញ្ញាបនបត្រការអនុវត្តកសិកម្មល្អ(Cam-GAP)។

លោក ហេង ឆេងលី បញ្ជាក់ថា ចម្ការសហគមន៍របស់លោកប្រមាណជាង ៦០ បន្ថែមទៀត គ្រោងនឹងរៀបចំចុះបញ្ជី ដើម្បីថ្នាក់ជាតិចុះពិនិត្យកែតម្រូវ មុនពេលចិនមកត្រួតពិនិត្យ។ បើតាមលោក ឆេងលី ប្រសិនបើទុរេនកម្ពុជាមានឱកាសនាំចេញទៅទីផ្សារចិន កាន់តែល្អសម្រាប់ទុរេនយើងសម្រាប់កសិករគាត់មានជម្រើសច្រើន។

សូមជម្រាបថា មកដល់បច្ចុប្បន្ននេះ ផ្លែទុរេនស្រស់គឺជាកសិផលទី៩ របស់កម្ពុជា ដែលត្រូវបានអនុញ្ញាតឱ្យនាំចេញដោយផ្ទាល់ទៅកាន់ប្រទេសចិន បន្ទាប់ពីអង្ករ និងកញ្ចុងអង្ករ ចំណិតដំឡូងមីក្រៀម គ្រាប់ពោត ផ្លែចេក ផ្លែស្វាយ ផ្លែមៀន ម្រេច និងផ្លែដូង៕

ដោយ៖ ឌិន ថារី