កាស៊ីណូសិង្ហបុរី និងម៉ាឡេស៊ីរំពឹងបន្តរីកចម្រើន​ដោយសារកំណើនអ្នកលេងចិន

របាយការណ៍ពីក្រុមហ៊ុនទីផ្សារ S&P Global បាន​រកឃើញថា វិស័យកាស៊ីណូ និងហ្គេម​ក្នុងប្រទេសសិង្ហបុរី ម៉ាឡេស៊ី និងហ្វីលីពីន នឹងនៅ​តែបន្តរីកចម្រើនដោយសារតែកំណើនអ្នកលេងពីប្រទេសចិន បើ​ទោះ​បីជា​មានការព្រួយបារម្ភអំពីពន្ធគយ និងបញ្ហា​ប្រឈមផ្សេងៗក៏ដោយ​។ នេះបើតាមការចុះផ្សាយរបស់កាសែត The Business Times។

ប្រាក់ចំណូលសរុប​ពីការលេងល្បែងក្នុងកាសីណូនៅសិង្ហបុរី ម៉ាឡេស៊ី និងហ្វីលីពីន រំពឹងថានឹង​កើនឡើងជិតដល់ ឬលើស​កម្រិតមុន​វិបត្តិកូវីដ១៩ ដែល​ជំរុញដោយ​កំណើនអ្នកទៅលេង និងភាពរឹងមាំនៃទីផ្សារក្នុងស្រុក។ ​នេះបើតាម S&P Global ។

ការស្ទុះងើបឡើងវិញនៃកាស៊ីណូ ត្រូវបានជំរុញបន្ថែមទៀតដោយការវិលត្រឡប់របស់ភ្ញៀវទេសចរចិន​មកកាន់តំបន់អាស៊ីអាគ្នេយ៍ ខណៈចំនួន​ភ្ញៀវទេសចរចិន​ទៅសិង្ហបុរី និងម៉ាឡេស៊ី កើនឡើងដោយ​កម្រិតមុនកូវីដ។ ​

អ្នកវិភាគរបស់ S&P Global លោកស្រី Ong Hwee Yee បាននិយាយថា ទីផ្សារហ្គេមលំដាប់ថ្នាក់ខ្ពស់បន្តជំរុញប្រាក់ចំណូលក្នុងឧស្សាហកម្មកាស៊ីណូ ដោយសារអ្នកលេង​មានៗ មិនសូវរងផលប៉ះពាល់ដោយសារកម្សោយសេដ្ឋកិច្ច ហើយបន្តចូលលេង។ ​​

យ៉ាងណាមិញ S&P បាននិយាយថា ក្នុងតំបន់អាស៊ីប៉ាស៊ីហ្វិក​ទាំងមូលក្រៅពីសិង្ហបុរី ម៉ាឡេស៊ី និងហ្វីលីពីន​ ​អាច​នឹ​ងបន្តជួប​បញ្ហាដោយសារតែបញ្ហាច្បាប់ទម្លាប់។

លោកស្រី Ong បាន​និយាយថា ទីផ្សារដូចជា​កម្ពុជានឹងជួបប្រទះនឹងភាព​យឺតយ៉ាវនៃការងើបឡើងវិញនៃប្រាក់ចំណូលពីវិស័យកាស៊ីណូ។ ​លោកស្រីថា កាស៊ីណូនៅកម្ពុជា ដែលពឹងផ្អែកខ្លាំងលើអ្នកលេងចិន បានទទួលរងផលប៉ះពាល់យ៉ាងធ្ងន់ធ្ងរដោយការបង្រ្កាបរបស់​ចិន លើប្រតិបត្តិករកាស៊ីណូ​ពាក់ព័ន្ធនឹងការលាងលុយ និងអំពើពុករលួយ។ នៅថៃឯណោះវិញ ច្បាប់កាស៊ីណូស្របច្បាប់ ត្រូវបាន​សភាដកចេញ ក្រោយមាន​បញ្ហា​ចម្រូងចម្រាស់ និងវិបត្តិនយោបយាក្នុងស្រុកថៃ​។

យ៉ាងណាក្ដី យោងតាមរបាយការណ៍របស់ក្រុមហ៊ុនស្រាវជ្រាវឥណ្ឌា Market Data Forecast ​ការលេងល្បែងអនឡាញ​ក្នុងតំបន់អាស៊ីប៉ាស៊ីហ្វិក ​រំពឹង​ថានឹងឈានដល់ ២០,៩ ប៊ីលាន​ដុល្លារឆ្នាំនេះ កើនឡើង ១២,៨ ភាគរយ ពីឆ្នាំមុន ដោយ​សារតែ​ការរីកចម្រើនផ្នែកបច្ចេកវិទ្យា និងការផ្លាស់ប្តូរចំណូលចិត្តអ្នក​លេង៕