រដ្ឋមន្ត្រីក្រសួងការងារ អំពាវនាវពលករខ្មែរនៅថៃមកធ្វើការនៅកម្ពុជាវិញ ព្រោះមិនខ្វះការងារធ្វើ និងបានប្រយោជន៍ច្រើនជាង

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អំពាវនាវពលករខ្មែរនៅក្នុងប្រទេសថៃមកធ្វើការនៅប្រទេសកម្ពុជាវិញ ដោយអះអាងថា ពលករនឹងទទួលបានផលប្រយោជន៍ពីការធ្វើការនៅប្រទេសកម្ពុជា ច្រើនជាងការធ្វើការនៅប្រទេសថៃ។

បើតាម រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កម្មករធ្វើការនៅរោងចក្រក្នុងប្រទេសកម្ពុជា ទទួលប្រាក់ឈ្នួលអប្បបរមាបូកជាមួយនិងអត្ថប្រយោជន៍ រួមនិងការថែមម៉ោងផ្សេងៗ គឺអាចទទួលបាន ៣០០ដុល្លារក្នុងមួយខែ។

ក្រៅពីប្រាក់ឈ្នួលប្រចាំខែ កម្មករនិយោជិតក៏ទទួលបានប័ណ្ណអត្ថប្រយោជន៍ផ្សេងទៀតពី​របប​សន្តិសុខ​សង្គម (ប.ស.ស.​) ដែលជួយទំនុកបម្រុងកម្មករលើការថែទាំសុខភាព ទាំងពេលកំពុងធ្វើការ និងពេលចូលនិវត្តន៍។​ ហើយតាមរយៈ​របប​សន្តិសុខ​សង្គមនេះ កម្មករនិយោជិតនឹងទទួលបានប្រាក់សោធននិវត្តន៍ផងដែរ។

រដ្ឋមន្ត្រីក្រសួងការងារ គូសបញ្ជាក់ថា ប័ណ្ណនេះ​មានតម្លៃទាំងពេលបច្ចុប្បន្ន និងពេលអនាគត។ ជាពិសេស ពេលកំពុងធ្វើការ បើមានគ្រោះថ្នាក់ចៃដន្យណាមួយកើតឡើង កម្មករនិយោជិតមិនចាំបាច់ចេញថវិកាពីហោប៉ៅរបស់ខ្លួននោះឡើយ ព្រោះនោះជាបន្ទុកក្រុមហ៊ុន និង ប.ស.ស. ដែលរ៉ាប់រងចេញថ្លៃព្យាបាលជូនដោយឥតគិតថ្លៃ ខណៈពេលកំពុងព្យាបាល ក៏ទទួលបាននូវប្រាក់បៀវត្សផងដែរ។ ជាងនេះទៅទៀត ពេលបងប្អូនឈឺ ​ប.ស.ស.នឹង​ចេញថ្លៃព្យាបាលហើយពេលកំពុងព្យាបាល ក៏ទទួលបានប្រាក់បៀវត្សដូចគ្នា។

ដោយឡែក ប្រសិនបើពលករខ្មែរធ្វើការនៅប្រទេសគេ គឺអាចធ្វើបានតែនៅវ័យពេញកម្លាំងប៉ុណ្ណោះ ប៉ុន្តែបើដល់វ័យចំណាស់ នោះនឹងត្រូវត្រឡប់មកប្រទេសកំណើតវិញជាក់ជាពុំខាន ឯការចំណាយលើការថែទាំសុខភាព ក៏ដូចជារស់នៅប្រចាំថ្ងៃជាបន្ទុកផ្ទាល់របស់ពលករ។ ប៉ុន្តែ បើធ្វើការនៅប្រទេសកម្ពុជា ពលករខ្មែរអាចមានទាំងថ្លៃឈ្នួលការងារ មានទាំងការមើលថែទាំសុខភាពដោយឥតគិតថ្លៃ និងមានទាំងប្រាក់សោធននិវត្តន៍នៅវ័យចំណាស់។ នេះបើតាមប្រសាសន៍លើកឡើងរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។

ទន្ទឹមនឹងការលើកឡើងខាងលើនេះ លោក ហេង សួរ ក៏បានអំពាវនាវទៅកាន់បងប្អូនពលករខ្មែរ ដែលកំពុងនៅប្រទេសថៃ ដោយស្នើរឱ្យត្រឡប់មកធ្វើការនៅប្រទេសកំណើតវិញ ដោយអះអាងថា កម្ពុជា មិនខ្វះការងារឱ្យធ្វើនោះទេ។ ជាក់ស្តែង រាជរដ្ឋាភិបាលកម្ពុជា ក៏បានត្រៀមខ្លួនទទួលស្វាគមន៍បងប្អូនពលករ ហើយព្រមទាំងមានការងារសមរម្យសម្រាប់ជូនផងដែរ៕