សន្តិសុខសង្គម

កម្លាំងគណៈបញ្ជាការឯកភាពខេត្តត្បូងឃ្មុំ បើកប្រតិបត្តិការបង្ក្រាបទីតាំងឧក្រិដ្ឋកម្មអនឡាញ នៅកាស៊ីណូ ជិតច្រកត្រពាំងផ្លុង ចាប់ខ្លួនមនុស្ស ៤៤៨ នាក់

បានផុស

១១ ខែ មុន

នៅ

ថ្ងៃសៅរ៍ ១៩ កក្កដា ២០២៥

ដោយ

ទីតាំងជង្រុកឧក្រិដ្ឋកម្មអនឡាញ ១ កន្លែង នៅកាស៊ីណូ XAMAT ភូមិត្រពាំងផ្លុងទី ១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ជិតច្រកទ្វារអន្តរជាតិត្រពាំងផ្លុង ត្រូវបានកម្លាំងគណៈបញ្ជាការឯកភាពរដ្ឋបាលខេត្តត្បូងឃ្មុំ បើកប្រតិបត្តិការបង្ក្រាប កាលពីល្ងាចថ្ងៃទី ១៨ ខែកក្កដា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈរបាយការណ៍របស់ លោក ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ និងជាប្រធានគណៈបញ្ជាការឯកភាពរដ្ឋបាលខេត្ត គឺ នៅព្រឹកថ្ងៃទី ១៩ ខែកក្កដា ឆ្នាំ ២០២៥ នេះ ប្រតិបត្តិការបង្ក្រាបទីតាំងខាងលើ ក៏មានការចូលរួមសម្របសម្រួលនីតិវិធីពី លោក ងិន ពេជ ព្រះរាជអាជ្ញា នៃអយ្យការអមសាលាដំបូងខេត្តត្បូងឃ្មុំ។

ជាលទ្ធផល រកឃើញបុគ្គលិកសរុបរួម ៤៤៨ នាក់ ស្រី ១៤៤ នាក់ ក្នុងនោះមាន ជនជាតិវៀតណាម សរុប ៣៥០ នាក់ ស្រី ១០៤ នាក់ និងជនជាតិខ្មែរសរុប ៩៨ នាក់ ស្រី ៤០ នាក់ ព្រមទាំងសម្ភារៈបម្រើបទល្មើសឆបោកតាមអនឡាញ Online Scam។

ជាចំណាត់ការ បុគ្គលិកជាជនជាតិវៀតណាម និងជនជាតិខ្មែរ ត្រូវបានឃាត់ខ្លួនដោយកម្លាំងចម្រុះ ក្រោមការសម្របសម្រួលពី ព្រះរាជអាជ្ញា បានធ្វើការសាកសួរ និងបន្តឃាត់ខ្លួនទុកនៅនឹងទីតាំងខាងលើតែម្តង ដោយសារបុគ្គលិកមានចំនួនច្រើន និងមានដាក់កម្លាំងចម្រុះ ដើម្បីការពារនៅជុំវិញទីតាំង។

លុះព្រឹកថ្ងៃទី ១៩ ខែកក្កដា ឆ្នាំ ២០២៥ ព្រះរាជអាជ្ញា នៃអយ្យការអមសាលាដំបូងខេត្តត្បូងឃ្មុំ ដឹកនាំសម្របសម្រួលកម្លាំងចម្រុះស្នងការដ្ឋាននគរបាល និងកងរាជអាវុធហត្ថខេត្ត បានបន្តអនុវត្តតាមនីតិវិធី រួមមាន ការសួរនាំ និងពិនិត្យសារធាតុញៀនលើជនជាតិវៀតណាម និងជនជាតិខ្មែរទាំងអស់៕

អត្ថបទ និង រូបភាព ៖ ឡេក ចាន់ពេជ្រ