រដ្ឋបាលរាជធានី​ ផ្តល់​ជូន​ចង្ក្រាន​ហ្គាស​ធុន​តូច​និងកំប៉ុងហ្គាសរាប់ពាន់កំប៉ុង ដល់វីរកងទ័ពជួរមុខស្រុកអន្លង់វែង ខេត្ដឧត្ដមានជ័យ

ភ្នំពេញ ៖ អំណោយ​សប្បុរស​ជននានា តាមរយៈរដ្ឋបាលរាជធានីភ្នំពេញ ដែល​មាន​ដូច​ជា​ចង្ក្រាន​ហ្គាស​ធុនតូច​ និង កំប៉ុងហ្គាសរាប់ពាន់កំប៉ុងព្រមទាំងខ្ទឹមសផងនោះ ត្រូវបានរដ្ឋបាលរាជធានីភ្នំពេញ យកមកផ្ដល់ជូនដល់មូលដ្ឋានវីរៈកងទ័ពជួរមុខ នៅខ្សែបន្ទាត់ព្រំដែនកម្ពុជា-ថៃ នាស្រុកអន្លង់វែង ខេត្ដឧត្ដមានជ័យ។

ពិធីប្រគល់និងទទួលបានធ្វើឡើង នាថ្ងៃទី៣០ ខែកក្ដដា ឆ្នាំ២០២៥នេះ ដឹកនាំដោយ​លោក អុីមរ៉ន ហាស្សាន់ អភិបាលរងរាជធានីភ្នំពេញ តំណាង លោក ឃួង ស្រេង អភិបាលរាជធានីភ្នំពេញ ផ្ដល់ជូន លោក​ឧត្ដមសេនីយឯក ចន្ទ័ លំផាត អនុប្រធានគណកម្មាធិការគ្រប់គ្រងគ្រោះហន្ដរាយ តំណាង ឯកឧត្តម កិត្តិសង្គហបណ្ឌិតទេសរដ្ឋមន្ដ្រី គន់ គីម ប្រធានគណកម្មាធិការគ្រប់ គ្រង គ្រោះហន្ដរាយ និងលោកងួន ទ្ធីរិទ្ធ អភិបាល ស្រុកអន្លង់វែង នៅស្រុកអន្លង់វែង។

អំណោយសប្បុរសជននានា តាមរយៈរដ្ឋបាលរាជធានីភ្នំពេញ ដែលបានប្រគល់ជូនពេលនេះ មានដូចជាចង្ក្រានហ្គាសធន់តូច សម្រាប់ចល័តចំនួន ៣០០០ចង្ក្រាន,កំប៉ុងហ្គាស៦០០០ កំប៉ុង និងខ្ទឹមសចំនួន ៥០០គីឡូក្រាម។

ឧត្ដមសេនីយ៍ឯក ច័ន្ទ លំផាត បានថ្លែងនូវការអរគុណយ៉ាងជ្រាលជ្រៅចំពោះ លោក ឃួង ស្រេង អភិបាលរាជធានីភ្នំពេញ តាម​រយៈ​លោក អុីមរ៉ន ហាស្សាន់ ដែលបានដឹកនាំអំណោយសប្បុរសជន ជា​ចង្ក្រាន​ហ្គាស​តូច​ចល័ត យកមកផ្ដល់ជូនវីរកងទ័ពជួរមុខ នៅខ្សែបន្ទាត់ព្រំដែនទិសអន្លង់វែង ខេត្ដឧត្ដមានជ័យ នាពេលនេះ គឺចំពេលដែលបងប្អូនវីរៈកងទ័ពកំពុងខ្វះខាត ចង្ក្រានហ្គាសតូចចល័ត សម្រាប់ចំអិនអាហារ ប្រចាំថ្ងៃ ដែលងាយស្រួលចល័ត។ អំណោយទាំងនេះពិតជាបានបង្ហាញឱ្យឃើញពីសាមគ្គីភាពជាធ្លុងមួយ ខ្មែរ ស្រលាញ់ខ្មែរ យ៉ាងពិតប្រាកដ។

លោក អុីមរ៉ន ហាស្សាន់ ក្នុងឱកាសនោះ ក៏បានអរគុណផងដែរចំពោះទឹកចិត្តសប្បុរសជននានា នៅរាជធានីភ្នំពេញ ដែលតែងតែចូលរួមចែករំលែកនូវធនធានតាមលទ្ធលភាពរៀងៗខ្លួន ដើម្បីឧបត្ថម្ភដល់វីរកងទ័ពជួរមុខ ដែលពួកគាត់មានការខ្វះខាត និង​ត្រូវ​ការ​សម្រាប់ជីវភាពនៅអង្គភាព រួម​ការងារអាវុធ ក្នុងបុព្វហេតុការពារទឹកដីនៃមាតុភូមិរបស់យើង ។ នេះពិតជាបានបង្ហាញឱ្យឃើញពីសាមគ្គីភាពជាធ្លុងមួយខ្មែរស្រលាញ់ខ្មែរ។ ខ្ញុំសូមអរគុណនូវទឹកចិត្តរបស់ បងប្អូនប្រជាពលរដ្ឋយើង និងសប្បុរសជនក្នុងស្មារតីខ្មែរ ជួយខ្មែរ ។ ក្នុងនាមសមរភូមិក្រោយរដ្ឋបាលរាជធានីភ្នំពេញ នៅតែបន្ដជួយបងៗកងទ័ពជួរមុខ ជាបន្តបន្ទាប់ទៀត។

សូម​បញ្ជាក់​ថា រដ្ឋបាល​រាជធានីភ្នំពេញ​បាន​នាំ​យក​អំណោយសប្បុរសជន ជាគ្រឿង​ឧបភោគបរិភោគ និងសម្ភារៈ ប្រើប្រាស់​មក​ឧបត្ថម្ភ ដល់វីរកងទ័ពតាមបន្ទាត់ព្រំដែនជួរមុខ និងប្រជាពលរដ្ឋ​ដែល​ទទួល​ផល​ប៉ះពាល់​ដោយសារ​សង្គ្រាម​ឈ្លានពាន​របស់​សត្រូវ​មក​លើ​ដែន​អធិបតេយ្យ​ភាពរបស់កម្ពុជា នាពេលនេះជាលើកទី៦ នៅខេត្តឧត្តរមានជ័យ៕

ដោយ ៖ ស្រីរ័ត្ន