ក្រុមហ៊ុនចិន ចង់សិក្សាលទ្ធភាពលើគម្រោងអភិវឌ្ឍន៍ប្រព័ន្ធដឹកជញ្ជូនតាមរថភ្លើងអាកាស នៅរាជធានីភ្នំពេញ

ក្រុមហ៊ុន Beijing Urban Construction Group នៅទីក្រុងប៉េកាំង ចង់សិក្សាលទ្ធភាពលើគម្រោងអភិវឌ្ឍន៍ប្រព័ន្ធដឹកជញ្ជូនតាមរថភ្លើងអាកាស (Sky Train) នៅរាជធានីភ្នំពេញ ខណៈរាជធានីភ្នំពេញនៅប្រឈមទៅនឹងការកកស្ទះចរាចរណ៍ បើទោះបីសេវាដឹកជញ្ជូនរថយន្តក្រុងសាធារណៈរបស់រដ្ឋបាលរាជធានីភ្នំពេញបានដំណើរការយ៉ាងសកម្មក្តី។

ការបង្ហាញពីបំណងនេះបានធ្វើឡើងកាលពីព្រឹកថ្ងៃទី ៦ មិថុនា នេះ ក្នុងជំនួបសម្ដែងការគួរសម និង ពិភាក្សាការងាររវាង លោក ឃួង ស្រេង អភិបាល នៃគណៈអភិបាលរាជធានីភ្នំពេញ និង លោក វ៉ាង ហៃឈិន (WANG HAI CHEN) ទីប្រឹក្សាជាន់ខ្ពស់ ក្រុមហ៊ុនសាងសង់ទីក្រុងប៉េកាំង តំណាងក្រុមហ៊ុន Beijing Urban Construction Group នៅសាលារាជធានីភ្នំពេញ។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា ការមកជួបសម្ដែងការគួរសមនេះ គឺ ក្រុមហ៊ុន Beijing Urban Construction Group មានបំណង ចង់សិក្សាលទ្ធភាពលើគម្រោងអភិវឌ្ឍន៍ប្រព័ន្ធដឹកជញ្ជូនតាមរថភ្លើងអាកាស (Sky Train) នៅរាជធានីភ្នំពេញ។

ក្នុងឱកាសនោះ លោក ឃួង ស្រេង មានប្រសាសន៍ថា សម្រាប់រដ្ឋបាលរាជធានីភ្នំពេញ ស្វាគមន៍ឲ្យក្រុមហ៊ុនធ្វើការសិក្សាលទ្ធភាពលើគម្រោងអភិវឌ្ឍន៍ប្រព័ន្ធដឹកជញ្ជូនតាមរថភ្លើងអាកាស (Sky Train) នៅរាជធានីភ្នំពេញ ដោយសារតែការងារពាក់ព័ន្ធនឹងប្រព័ន្ធចរាចរណ៍នេះ ជាចក្ខុវិស័យដែលកំពុងព្យាយាមដោះស្រាយឲ្យកាន់តែល្អប្រសើរឡើង ខណៈរាជធានីភ្នំពេញ បាននិងកំពុងប្រឈមទៅនឹងការកកស្ទះចរាចរណ៍ដែរនោះ៕
អត្ថបទ ៖ ស្រីរ័ត្ន