ចិនផ្ដល់ជំនួយ៣លានដុល្លារទៀតជួយដល់ជនភៀសសឹកកម្ពុជាដែលរងគ្រោះក្នុងជម្លោះព្រំដែន

ប្រធានាធិបតីចិន លោក ស៊ី ជីនពីង បានប្រកាសផ្ដល់ជំនួយជាថវិកាប្រមាណ៣លានដុល្លារទៀតដល់កម្ពុជាដើម្បីជួយដល់ពលរដ្ឋរងគ្រោះដោយសារបញ្ហាសង្គ្រាមនៅតំបន់ព្រំដែន ហើយកំពុងរស់នៅក្នុងជំរុំជនភៀសខ្លួន ពិសេសការស្ដារឡើងវិញនូវហេដ្ឋារចនាសម្ព័ន្ធដែលរងផលប៉ះពាល់ដោយគ្រាប់ផ្លោងរបស់យោធាថៃ។

ការប្រកាសផ្ដល់ជំនួយរបស់លោកប្រធានាធិបតី ស៊ី ជីនពីង គឺបានធ្វើឡើងនៅចំពោះមុខនាយករដ្ឋមន្រ្តីកម្ពុជា សម្ដេចធិបតី ហ៊ុន ម៉ាណែត ក្នុងជំនួបទ្វេភាគីនៅទីក្រុងធានជីន ប្រទេសចិន។

លោក មាស សុភ័ណ្ឌ អ្នកនាំពាក្យសម្តេចធិបតី បានថ្លែងឱ្យដឹងក្នុងសន្និសីទកាសែត នាពាក់កណ្តាលអាធ្រាត្រឈានចូលថ្ងៃទី២ ខែកញ្ញា ឆ្នាំ២០២៥ ក្រោយសម្តេចធិបតី បានដឹកនាំគណៈប្រតិភូជាន់ខ្ពស់រាជរដ្ឋាភិបាលត្រឡប់មកកម្ពុជាវិញ ថា«ឯកឧត្តមប្រធានាធិបតី បានប្រកាសផ្តល់ជំនួយមនុស្សធម៌ចំនួន២០លានយ៉ន់ ដល់កម្ពុជា ដើម្បីជួយស្តារឡើងវិញការខូចខាត និងជួយសម្រួលដល់ទុក្ខលំបាករបស់ប្រជាពលរដ្ឋដែលរងគ្រោះពីការប៉ះទង្គិចប្រដាប់អាវុធកាលចុងខែកក្កដាកន្លងទៅ»។

បើតាមលោក មាស សុភ័ណ្ឌ នៅក្នុងជំនួបនោះ ប្រធានាធិបតី ស៊ី ជីនពីង បានបញ្ជាក់ពីការគាំទ្ររបស់ចិនចំពោះកម្ពុជា ក្នុងការកសាង និងការពង្រឹងសមត្ថភាព អភិវឌ្ឍន៍ដោយម្ចាស់ការលើខ្លួនឯង និងគាំទ្រកម្ពុជា ក្នុងការការពារអធិបតេយ្យភាពជាតិរបស់ខ្លួន។

ពាក់ព័ន្ធជម្លោះព្រំដែនរវាងកម្ពុជា និងថៃ លោកប្រធានាធិបតីចិន បានគូសបញ្ជាក់បន្ថែមថា ប្រទេសចិនគាំទ្របទឈប់បាញ់រវាងកងទ័ពប្រទេសទាំងពីរ គាំទ្រយន្តការសង្កេតការណ៍បទឈប់បាញ់របស់អាស៊ាន និងគាំទ្រការបង្កើតក្រុមអ្នកសង្កេតការណ៍អាស៊ាន (AOT) ដែលដឹកនាំដោយប្រទេសម៉ាឡេស៉ីឱ្យបានឆាប់រហ័ស។ លោក មាស សុភ័ណ្ឌ ប្រាប់បន្ថែមឱ្យដឹងយ៉ាងដូច្នេះ។

ជាការកត់សម្គាល់ នេះជាជំនួយមនុស្សធម៌លើកទី២របស់រដ្ឋាភិបាលចិន ដែលមានគោលបំណងជួយលើកស្ទួយជីវភាពរស់នៅ និងលើកទឹកចិត្តដល់ប្រជាពលរដ្ឋកម្ពុជាដែលបានរងគ្រោះដោយសារបញ្ហាសង្គ្រាមនៅតំបន់ព្រំដែន។ កន្លងទៅ លោក វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា បានផ្ដល់ជំនួយជាថវិកាចំនួន១០ម៉ឺនដុល្លារដល់រដ្ឋបាលខេត្តឧត្តរមានជ័យ ដើម្បីជួយដល់ការរៀបចំមណ្ឌលសុវត្ថិភាពជនភៀសសឹក ការជួសជុលផ្ទះពលរដ្ឋ វត្តអារាម ដែលរងផលប៉ះពាល់ពីសង្គ្រាមឈ្លានពានរបស់កងទ័ពថៃមកលើកម្ពុជា។

ក្រៅពីជំនួយរបស់ចិន រដ្ឋាភិបាលជប៉ុនក៏បានផ្តល់ជំនួយសង្គ្រោះបន្ទាន់ដែលមានទឹកប្រាក់សរុបប្រមាណ១,៨លានដុល្លារអាមេរិក និងសហភាពអឺរ៉ុបផ្ដល់ជំនួយមនុស្សធម៌បន្ទាន់សរុបជាទឹកប្រាក់ប្រមាណ៨១៦,០០០ដុល្លារអាមេរិកសម្រាប់ជួយដល់ប្រជាជនដែលរងគ្រោះដោយជម្លោះនៅតាមព្រំដែនកម្ពុជា-ថៃ ផងដែរ៕

ដោយ៖ ធឿន វ៉ាន់សុង