ព័ត៌មានជាតិ

ចិនធានាដល់ការផ្គត់ផ្គង់ប្រេង ឧស្ម័ន និងជីកសិកម្មដល់កម្ពុជា

បានផុស

២ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

សាធារណរដ្ឋប្រជាមានិតចិនបានប្រកាសគាំទ្រដល់កម្ពុជាលើការផ្គត់ផ្គង់ប្រេង ឧស្ម័ន និងជីកសិកម្មក្នុងអំឡុងពេលដែលកម្ពុជាកំពុងជួបការលំបាកផ្នែកសន្តិសុខថាមពល និងកង្វះជី។ នេះបើតាមលទ្ធផលនៃជំនួបរវាងរដ្ឋមន្ត្រីការបរទេសកម្ពុជាលោកឧបនាយករដ្ឋមន្ត្រី ប្រាក់ សុខុន និងរដ្ឋមន្ត្រីការបរទេសចិនលោក វ៉ាង យី នៅទីក្រុងញ៉ូវយ៉ក សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីប្រកាសព័ត៌មានថ្ងៃទី២៨ ខែឧសភា ឆ្នាំ២០២៦ ក្រសួងការបរទេសឱ្យដឹងថា ក្នុងជំនួបរវាងរដ្ឋមន្ត្រីកាបរទេសកម្ពុជា និងរដ្ឋមន្ត្រីការបរទេសចិនកាលពីថ្ងៃទី២៧ ខែឧសភា ភាគីទាំងពីរបានវាយតម្លៃខ្ពស់លើកិច្ចសហប្រតិបត្តិការ និងគាំទ្រគ្នាលើឆាកអន្តរជាតិរវាងប្រទេសទាំងពីរ ខណៈដែលរដ្ឋមន្ត្រីការបរទេសចិនបាន ប្ដេជ្ញាគាំទ្រដល់កម្ពុជាលើការផ្គត់ផ្គង់ប្រេង ឧស្ម័ន និងជីកសិកម្ម ក្នុងអំឡុងពេលដែលកម្ពុជាកំពុងជួបការលំបាកផ្នែកសន្ដិសុខថាមពល និងកង្វះជី។

គួរឱ្យដឹងផងដែរថា បន្ទាប់ពីមានសង្គ្រាមអាមេរិក អ៊ីស្រាអ៊ែល និងអ៊ីរ៉ង់កាលពីចុងខែកុម្ភៈកន្លងទៅបានធ្វើឱ្យប៉ះពាល់ជាខ្លាំងដល់សន្ដិសុខថាមពលពិភពលោកដែលធ្វើឱ្យតម្លៃប្រេង និងឧស្ម័នកើនឡើង បង្កឱ្យមានផលប៉ះពាល់ដល់ការដឹកជញ្ជូនសាកល និងរារាំងដល់ដំណើរការអភិវឌ្ឍនៃបណ្ដាប្រទេសនានាផងដែរ។

ប្រទេសកម្ពុជាជាប្រទេសដែលពឹងផ្អែកទាំងស្រុងលើការនាំចូលប្រេង និងឧស្ម័នដើម្បីបំពេញតម្រូវការក្នុងស្រុកដែលជាមធ្យមកម្ពុជាត្រូវការប្រេងប្រមាណ២០ម៉ឺនលីត្រក្នុងមួយខែនេះបើតាមទិន្នន័យពីឆ្នាំ២០២៣។ ដោយឡែកកម្ពុជានាំចូលជីកសិកម្មពីបរទេសមានទំហំប្រមាណ៤២០លានដុល្លារក្នុងឆ្នាំ២០២៥កន្លងទៅ៕

អត្ថបទដោយ ហ៊ុន សិរីវឌ្ឍន៍