ទីបំផុត ឃាតករសម្លាប់ Charlie Kirk​ សារភាពមូលហេតុ

យោងតាមការចេញផ្សាយរបស់ Daily Mail នៅថ្ងៃទី១៦ខែកញ្ញា ទីបំផុតមូលហេតុដែលឃាតករវ័យក្មេង Tyler Robinson អាយុ ២២ ឆ្នាំសម្លាប់ Charlie Kirk ត្រូវបានលាតដាងបន្ទាប់ពី FBI ជំរុញឲ្យ Robinson ​សារភាព ក្រោយរកឃើញ DNA របស់គេនៅលើកាំភ្លើងដែលប្រើក្នុងការបាញ់ប្រហារ។

នាយក FBI លោក Kash Patel បាននិយាយថា Robinson ដែលកន្លងបានបដិសេដមិនសហការជាមួយអ្នកស៉ើបអង្គេត ទីបំផុតបានសារភាពប្រាប់ពីមូលហេតុដែលរូបគេធ្វើ ព្រោះតែការស្អប់ខ្ពើមទៅលើ Kirk។ នៅពេលអ្នកស៉ើបអង្កេតសួរហេតុអ្វីបានជាគាត់ធ្វើ? Robinson បានឆ្លើយថាព្រោះតែ «ការស្អប់ខ្ពើមមួយចំនួនមិនអាចចរចាជាមួយបានទេ»។​ Robinson បានស្អប់ Kirkនិងឥទ្ធិពលនយោបាយរបស់គាត់យ៉ាងខ្លាំង ដោយរូបគេក៏ធ្លាប់ប្រាប់មិត្តភក្តិរបស់ខ្លួនថាបើមានឱកាសរូបគេនឹងសម្លាប់ Kirk។

នៅក្នុងឃាតកម្មនេះ FBI បានរងការរិះគន់យ៉ាងខ្លាំងចំពោះការដោះស្រាយ ព្រោះRobinson ត្រូវបានចាប់ខ្លួនជាង ៣០ ម៉ោងក្រោយមក ដោយសារតែឪពុករបស់គាត់ផ្ដល់ព័ត៌មានឲ្យ។ បើទោះបីអ្នកអភិរក្សមួយចំនួនបានរិះគន់ការដឹកនាំរបស់លោក Patel ជានាយក FBI តែអ្នកផ្សេងទៀតរួមទាំងប្រធានាធិបតី ដូណាល់ ត្រាំបានសរសើរ FBI ចំពោះការនាំជនសង្ស័យមកកាត់ទោស។

គួរបញ្ជាក់ថា Charlie Kirk អាយុ ៣១ ឆ្នាំគឺជាឥស្សរជនស្តាំនិយមដ៏ល្បីល្បាញនៅសហរដ្ឋអាមេរិក គាត់បានបង្កើតក្រុម Turning Point USA ដែលជាក្រុមដែលផ្សព្វផ្សាយគំនិតអភិរក្សនិយមនៅក្នុងបរិវេណមហាវិទ្យាល័យ និងជាសម្ព័ន្ធមិត្តជិតស្និទ្ធរបស់ប្រធានាធិបតី ដូណាល់ ត្រាំ។ ការស្លាប់របស់លោកបានធ្វើឲ្យមានការព្រួយបារម្ភពីអំពើហិង្សាលើអ្នកន​យោបាយអាមេរិក និងជំរុញឲ្យទាំង លោក​ត្រាំ​​និងថ្នាក់ដឹកនាំអាមេរិក​ផ្សេងទៀតបង្កើនការការពារផ្ទាល់ខ្លួន៕

អត្ថបទ៖ ប៊ុន សុភាព