សាលារៀនវត្តបូព៌ ឱ្យសិស្សចេញពីរៀនមុនកន្លះម៉ោង និងចូលរៀនយឺតកន្លះម៉ោងព្រោះអាកាសធាតុក្តៅពេក

សាលាបឋមសិក្សាវត្តបូព៌ ស្ថិតនៅខេត្តសៀមរាប បានចេញសេក្តីជូនដំណឹងដល់ អាណាព្យាបាលសិស្ស ព្រមទាំងសិស្សានុសិស្សទាំងអស់ នៅថ្ងៃទី២៨ ខែមេសា ឆ្នាំ២០២៤ ដោយអនុញ្ញាតឱ្យសិស្សវេនព្រឹកចេញពីរៀនមុន ៣០នាទី និងសិស្សរៀនវេនរសៀលចូលរៀនយឺត ៣០នាទី ដោយសារតែអាកាសធាតុក្តៅខ្លាំង។

នៅក្នុងសេចក្តីជូនដំណឹង “ស្តីអំពីការផ្លាស់ប្តូរពេលវេលាសិក្សាក្នុងអំឡុងពេលអាកាសធាតុក្តៅ” គណៈគ្រប់គ្រងសាលារៀនវត្តបូព៌បានបញ្ជាក់ថា ព្រោះតែមួយរយៈនេះអាកាសធាតុក្តៅ សាលារៀនអនុញ្ញាត និងកំណត់ពេលចេញ និងចូលរៀនរបស់សិស្សមួយរយៈ។ ជាមួយគ្នានេះ សិស្សរៀនពេលព្រឹកអនុញ្ញាតឱ្យចេញទៅផ្ទះនៅម៉ោង ១០៖៣០នាទី រីឯសិស្សរៀនពេលរសៀលអនុញ្ញាតឱ្យចូលរៀនម៉ោង១៖៣០នាទី។ កាលវិភាគមួយរយៈ ដែលសាលាបានរៀបចំនេះ នឹងអនុវត្តចាប់ពីថ្ងៃទី២៩ ខែមេសា ឆ្នាំ២០២៤តទៅ។

សូមជម្រាបថា សាលាបឋមសិក្សាវត្តបូព៌ ស្ថិតនៅភូមិវត្តបូព៌ សង្កាត់សាលាកំរើក ក្រុង​សៀមរាប ខេត្តសៀមរាប ដែលជាសាលារៀនមួយត្រូវបានទទួលស្គាល់ថា ជាសាលាគំរូ មានវិន័យល្អ ទាំងការរៀបចំសណ្តាប់ធ្នាប់ ឯកសណ្ឋានរបស់គ្រូ រួមទាំងសិស្សានុសិស្សផង។ រយៈពេលជាងមួយខែនេះ ពោលគឺឈានចូលដល់រដូវក្តៅ អាកាសធាតុនៅកម្ពុជាមានកម្តៅក្តៅខ្លាំង ហើយអាចប៉ះពាល់ដល់សុខភាពដូចគ្នាប្រសិនជាពលរដ្ឋមិនបានមើលថែសុខភាពបានល្អ ជាពិសេសចំពោះកុមារ និងចាស់ជរាងាយរងគ្រោះបំផុត។

ជុំវិញអាកាសធាតុក្តៅនេះ សាលាបឋមសិក្សាវត្តបូព៌ ក៏បានយកចិត្តទុកដាក់ខ្ពស់ចំពោះសិស្សដែលកំពុងសិក្សានៅទីនោះ។ ក្រៅពីអនុញ្ញាតចំពោះម៉ោងចេញ និងចូលរៀន សាលាក៏បានបាញ់ទឹកនៅជុំវិញបរិវេណសាលា មិនថានៅមុខថ្នាក់រៀន ឬ លើដំបូលនោះនេះដើម្បីជួយកាត់បន្ថយកម្តៅមួយកម្រិតសម្រាប់សិស្សានុសិស្សងាយស្រួលក្នុងការរៀនសូត្រ៕