យោងតាមអ្នកកាសែត អ៊ីតាលី លោក Fabrizio Romano បានឱ្យដឹង ថា បច្ចុប្បន្នមានក្លិបចំនួន ២ មកពីលីគទី ២ ប្រេស៊ីល កំពុងចង់បានអ្នកចាំទីវ័យ ៤០ ឆ្នាំ Vozinha រួមមានក្លិប Atlético Clube Goianiense និង Avaí FC។ ក្លិបទាំង ២ នេះ បានទាក់ទងដោយផ្ទាល់ទៅកាន់អ្នកចាំទីវ័យ ៤០ ឆ្នាំតែម្តង។

គិតត្រឹមពេលនេះ អ្នកចាំទី Vozinha មិនទាន់មានក្លិបថ្មីលេងនៅឡើយទេ បន្ទាប់ពីអស់សុពលភាពកុងត្រាជាមួយក្លិប Chaves នៃលីគទី ២ ប្រទេស​ព័រទុយហ្គាល់ កាលពីថ្ងៃទី ១ ខែ កក្កដា ឆ្នាំ ២០២៦។ ថ្វីដ្បិតបច្ចុប្បន្នអ្នកចាំទីរូបនេះមានវ័យចំណាស់ និងកំពុងក្លាយជាកីឡាករមិនមានតម្លៃខ្លួនក៏ដោយ ប៉ុន្តែរូបគេបានបង្ហាញសមត្ថភាពសឹងមិននឹកស្មាននៅ World Cup 2026។

អ្នក​ចាំទី Vozinha បានធ្វើឱ្យពិភពលោកភ្ញាក់ផ្អើលជាខ្លាំង តាមរយៈការជួយសង្គ្រោះបាល់ដល់ទៅ ៧ លើក អំឡុងការប្រកួត ដែល កាបវែរ ស្មើគ្នាជាមួយ អេស្ប៉ាញ ០-០។ រឿងដ៏ភ្ញាក់ផ្អើលបំផុត គឺរូបគេបានសង្គ្រោះបាល់បានចំនួន ៨ លើក រហូតជួយឱ្យ កាបវែរ ស្មើ អាហ្សង់ទីន នៅវគ្គ ៣២ ក្រុមក្នុងរយៈពេល ៩០ នាទី ១-១ ប៉ុន្តែបានចាញ់នៅម៉ោងបន្ថែម ១៥ នាទី ២ ដង ២-៣។

សមត្ថភាពដ៏អស្ចារ្យបែបនេះ បានធ្វើឱ្យពិភពលោកចាប់អារម្មណ៍ជាខ្លាំងទៅលើអ្នកចាំទី Vozinha ប៉ុន្តែអ្វីដែលសោកស្តាយ គឺកីឡាករមានវ័យ ៤០ ឆ្នាំទៅហើយ ដែលវ័យនេះកំពុងឈានដល់ពេលវេលាជិតនឹងបញ្ចប់អាជីព។ ដូច្នេះហើយ ទើបមិនមានក្លិបធំៗនៅ អឺរ៉ុប ចាប់អារម្មណ៍កីឡាកររូបនេះ៕

អត្ថបទ៖ សេម កុសល

The post ក្លិបនៅប្រេស៊ីល ២ កំពុងតាមចុះកុងត្រាយកអ្នកចាំទី Vozinha ក្រោយបង្ហាញសមត្ថភាពល្អនៅ World Cup appeared first on Kampuchea Thmey Daily.

នាយប់រំលងអាធ្រាត្រឈានចូលថ្ងៃទី ៧ ខែ កក្កដា ឆ្នាំ ២០២៦ នេះ ក្រុ​មបញ្ចខែល ព័រទុយហ្គាល់ នឹងត្រូវជួបជាមួយក្រុមគោជល់ អេស្ប៉ាញ ក្នុងវគ្គ ១៦ ក្រុមចុងក្រោយពានរង្វាន់ World Cup 2026។ ការប្រកួតនេះ ត្រូវបានចាត់ទុកជាជំនួបដ៏ធំ និងតឹងតែងបំផុតនៅវគ្គ ១៦ ក្រុមចុងក្រោយ។

ក្រឡេកទៅមើលប្រវត្តិជួបគ្នានាពេលអតីតកាល ក្រុមទាំង ២ ធ្លាប់ជួបគ្នាច្រើនលើកមកហើយ ពោលគឺចំនួន ៤១ លើក សម្រាប់ការប្រកួតគ្រប់កម្មវិធី។ ក្រុម អេស្ប៉ាញ មានស្ថិតិល្អជាង ដោយការប្រកួតទាំង ៤១ លើកនោះ បានឈ្នះចំនួន ១៨ លើក ស្មើ ១៦ លើក និងចាញ់ ៧ លើក។

រាប់ចាប់ពីឆ្នាំ ២០១០ មក ក្រុមទាំង ២ ធ្លាប់ជួបគ្នា ៩ លើក ក្នុងនោះ អេស្ប៉ាញ ឈ្នះ ៣ លើក ស្មើ ៤ លើក និងចាញ់ ២ លើក។ ក្នុងចំណោមការជួបគ្នា ៩ លើកចុងក្រោយនេះ គឺ អេស្ប៉ាញ ធ្លាប់ធ្វើឱ្យ ព័រទុយហ្គាល់ ទឹកភ្នែកក្នុងការប្រកួតសំខាន់ ២ លើក ខណៈ ព័រទុយហ្គាល់ វិញ ក៏ធ្លាប់ធ្វើឱ្យ អេស្ប៉ាញ ទឹកភ្នែកវិញ ១ លើកផងដែរ។

រម្លឹកប្រវត្តិជួបគ្នាកាលពីឆ្នាំ ២០១០ គឺ អេស្ប៉ាញ បានធ្វើឱ្យ ព័រទុយហ្គាល់ ហាលអាវពី World Cup 2010 ត្រឹមវគ្គ ១៦ ក្រុម បន្ទាប់ពីឈ្នះ ១-០។ ចំណែក នៅឆ្នាំ ២០១២ ក្រុមគោជល់ បានធ្វើឱ្យក្រុមរបស់ Cristiano Ronaldo ទឹកភ្នែកម្តងទៀតនៅក្នុងវគ្គពាក់កណ្តាលផ្តាច់ព្រ័ត្រពាន Euro បន្ទាប់ពីឈ្នះនៅវគ្គបាល់កាត់សេចក្តី ១១ ម៉ែត្រ ៤-២ ក្រោយរយៈពេល ១២០ នាទីស្មើគ្នា ០-០។

យ៉ាងណាមិញ ព័រទុយហ្គាល់ ក៏ធ្លាប់ធ្វើឱ្យ អេស្ប៉ាញ ស្រក់ទឹកភ្នែកវិញម្តងដែរ កាលពីឆ្នាំ ២០២៥ កន្លងទៅ ដែលជាជំនួបវគ្គផ្តាច់ព្រ័ត្រពាន Euro។ ជំនួបនេះ គឺជាការប្រកួតលើកចុងក្រោយរវាងក្រុមទាំង ២ ដោយពេលនោះ ព័រទុយហ្គាល់ បានឈ្នះនៅវគ្គបាល់កាត់សេចក្តី ១១ ម៉ែត្រ ៥-៣ បន្ទាប់ពី ១២០ នាទីស្មើគ្នា ២-២។

បើមើលអំពីការប្រកួតសរុប គឺ អេស្ប៉ាញ ធ្វើបានល្អជាង ប៉ុន្តែនេះគ្រាន់តែជារឿងអតីតកាលប៉ុណ្ណោះ។ ក្រឡេកមកមើលការប្រកួតនៅ World Cup 2026 នេះ គឺក្រុមទាំង ២ ធ្វើបានល្អម្យ៉ាងម្នាក់។ អេស្ប៉ាញ ឈរនៅលេខ ១ ក្នុងពូល H ដោយឆ្លងកាត់ ៣ ប្រកួត ឈ្នះ ២ និងស្មើ ១ ហើយពួកគេបន្តឈ្នះក្រុម អូទ្រីស នៅវគ្គ ១៦ ក្រុម ៣-០។

រីឯ ព័រទុយហ្គាល់ វិញ បានបញ្ចប់ការប្រកួតនៅក្នុងពូល K ដោយឈរលេខ ២ ក្នុងពូល បន្ទាប់ពីឆ្លងកាត់ ៣ ប្រកួត ឈ្នះ ១ និងស្មើ ២។ លុះឈានចូលវគ្គ ៣២ ក្រុម ពួក​គេបានឈ្នះក្រុម ក្រូអាត ក្នុងលទ្ធផលយ៉ាងតឹងតែង ២-១។

ក្រុមទាំង ២ សុទ្ធតែជាក្រុម ដែលមានចំណុចល្អរៀងៗខ្លួន ទាំងសមាសភាពកីឡាករ និង ស្ថិតិប្រកួត។ ដូច្នេះការប្រកួតរាត្រីនេះ នឹងក្លាយជាការប្រកួតដ៏កក្រើកបំផុតមួយនៅ World Cup 2026 ដែលអ្នកគាំទ្រមិនអាចរំលងបាន៕

អត្ថបទ៖ សេម កុសល

The post អេស្ប៉ាញ និង ព័រទុយហ្គាល់ ធ្លាប់​មាន​ប្រវត្តិ​ជូរ​ចត់​ទៅវិញទៅមក មុនប៉ះ​គ្នាយប់នេះ appeared first on Kampuchea Thmey Daily.

នៅ World Cup 2026 នេះ អាចនឹងក្លាយជាទីបញ្ចប់នៃអាជីពរបស់កីឡាករជាច្រើនជាមួយក្រុមជម្រើសជាតិ ប៉ុន្តែគិតត្រឹមពេលនេះ មានកីឡាករកំពូលៗចំនួន ៤ រូបហើយ ដែលបានប្រកាសជាផ្លូវការ។

កីឡាករបានប្រកាសដំបូងគេ គឺអ្នកចាំទីរបស់ក្រុមជម្រើសជាតិ អាល្លឺម៉ង់ Manuel Neuer។ អ្នកចាំទីរបស់ Bayern Munich វ័យ ៤០ ឆ្នាំរូបនេះ បានប្រកាសព្យួរស្រោមដៃពីក្រុមឥន្ទ្រីដែកកាលពីថ្ងៃទី ២ ខែ កក្កដា កន្លងទៅ បន្ទាប់ពី អាល្លឺម៉ង់ ធ្លាក់ពី World Cup 2026 ត្រឹមវគ្គ ៣២ ក្រុម។ សមិទ្ធផលដ៏ធំបំផុតរបស់អ្នកចាំទីរូបនេះ គឺបានជួយ អាល្លឺម៉ង់ លើកពាន World Cup ១ លើកកាលពីឆ្នាំ ២០១៤។

បន្ទាប់មកទៀត គឺខ្សែបម្រើរបស់ក្រុមជម្រើសជាតិ ក្រូអាត Luka Modric។ ខ្សែបម្រើវ័យ ៤០ ឆ្នាំ មិនទាន់បានប្រកាសជាផ្លូវការនៅឡើយទេ ប៉ុន្តែយោងតាមប្រភពពីអ្នកកាសែត Nicolò Schira បានអះអាង ថា កីឡាករបានសម្រេចចិត្តចូលនិវត្តន៍ពីជម្រើសជាតិហើយ បន្ទាប់ពីជួយក្រុម ក្រូអាត ឡើងត្រឹមវគ្គ ៣២ ក្រុមនៃ World Cup 2026។

ដោយឡែកកីឡាករឆ្នើមម្នាក់ទៀត ក៏ទើបតែប្រកាសចូលនិវត្តន៍ពីជម្រើសជាតិផងដែរ នោះគឺខ្សែប្រយុទ្ធរបស់ ប្រេស៊ីល Neymar Jr.។ Neymar បានសម្រេចចិត្តព្យួរស្បែកជើងពីជម្រើសជាតិ ប្រេស៊ីល បន្ទាប់ពីការប្រកួតចុងក្រោយទល់នឹងក្រុម ន័រវែស នាយប់រំលងអាធ្រាត្រឈានចូលថ្ងៃ ចន្ទ ទី ៦ ខែ កក្កដា។ Neymar និង ប្រេស៊ីល បានអស់ភារកិច្ចពី World Cup 2026 ត្រឹមវគ្គនេះហើយ បន្ទាប់ពីចាញ់ ន័រវែស ក្នុងលទ្ធផល ២-១។

ចុងក្រោយ មានកីឡាករកំពូលម្នាក់ទៀត គឺប្រធានក្រុម ព័រទុយហ្គាល់ Cristiano Ronaldo។ Ronaldo បានប្រកាសជាផ្លូវការហើយ នៅក្នុងសន្និសីទសារព័ត៌មានមុនការប្រកួតវគ្គ ១៦ ក្រុមទល់នឹងក្រុម អេស្ប៉ាញ ថា World Cup 2026 គឺជាការបង្ហាញខ្លួនឱ្យព័រទុយហ្គាល់លើកចុងក្រោយរបស់គាត់។

នេះគឺជាដំណឹងដ៏សោកសៅមួយ ដែលអ្នកគាំទ្រទូទាំងពិភពលោកមិនចង់ឮ ប៉ុន្តែពេលវេលាបានឈានមកដល់ទីបញ្ចប់ហើយសម្រាប់ម្ចាស់ពាន Ballon d’Or ៥ សម័យរូបនេះ។ ទោះបីជា ខ្សែប្រយុទ្ធវ័យ ៤១ ឆ្នាំបានប្រកាសបែបនេះក្តី ប៉ុន្តែគាត់មិនទាន់បានបញ្ជាក់ច្បាស់លាស់នៅឡើយទេ ថា គាត់នឹងចូលនិវត្តន៍ពីជម្រើសជាតិតែម្តង ឬក្រោយ World Cup 2026 នេះ អាចលេងជាមួយជម្រើសជាតិមួយរយៈទៀត មុនពេលចូលនិវត្តន៍ជាផ្លូវការ៕

អត្ថបទ៖ សេម កុសល

The post កំពូលកីឡាករ ៤ នាក់ បានប្រកាសព្យួរស្បែកជើង​ពី​ជម្រើសជាតិនៅ World Cup 2026 នេះ appeared first on Kampuchea Thmey Daily.

ក្រុមពពកស អាហ្សង់ទីន បានឡើងទៅកាន់វគ្គ ១៦ ក្រុមចុងក្រោយជាផ្លូវការហើយ បន្ទាប់ពីការប្រកួតវគ្គ ៣២ ក្រុមចុងក្រោយ កាលព្រឹកថ្ងៃទី ៤ ខែ កក្កដា ឆ្នាំ ២០២៦ បានយកឈ្នះលើក្រុម កាប់វែរ យ៉ាងតឹងតែងក្នុងលទ្ធផល ៣-២ បន្ទាប់ពីឆ្លងកាត់រយៈពេលដល់ទៅ ១២០ នាទី។

ប្រធានក្រុម Leo Messi នៅតែជាកម្លាំងចលករដ៏សំខាន់ ក្នុងការជួយជ្រុំជ្រែងក្រុម អាហ្សង់ទីន ដោយនៅក្នុងការប្រកួតនោះ កីឡាករវ័យ ៣៩ ឆ្នាំ បានស៊ុតបញ្ចូលទីមួយគ្រាប់យ៉ាងមានសារៈសំខាន់។ យ៉ាងណា ជុំវិញគ្រាប់បាល់ ១ គ្រាប់នេះ បានធ្វើឱ្យ Messi សាងកំណត់ត្រាថ្មីដល់ទៅ ៣ ឯណោះ។

កំណត់ត្រាទី ១ គឺ Messi បានក្លាយជាកីឡាករដំបូងគេ ដែលរកបានគ្រាប់បាល់បាន ២០ គ្រាប់នៅ World Cup។ បច្ចុប្បន្ន អតីតខ្សែប្រយុទ្ធក្រុម Barcelona កំពុងឈរជាកីឡាករមានគ្រាប់បាល់ច្រើនជាងគេនៅ World Cup ប៉ុន្តែវាទំនងជាមិនស្ថិតស្ថេរនោះទេ ដោយសារ Mbappe កំពុងតាមពីក្រោយកៀកមែនទែន ដោយពេលនេះមាន ១៨ គ្រាប់។

កំណត់ត្រាទី ២ គឺ ប្រធានក្រុមរបស់ក្រុមពពកស បានក្លាយជាកីឡាករដំបូងគេ ដែលអាចស៊ុតបញ្ចូលទីបានទល់នឹងជម្រើសជាតិ ១៤ ផ្សេងគ្ននៅ World Cup។ ក្រុមទាំង ១៤ នោះរួមមាន ម៉ុងតេណេក្រូ បូស្នៀ អ៊ីរ៉ង់ នីហ្សេរីយ៉ា អារ៉ាប៉ីសាអ៊ូឌីត ម៉ិកស៊ិក អូស្ត្រាលី ហូល្លង់ ក្រូអាត បារាំង អាល់ហ្សេរី អូទ្រីស ហ្ស៊កដានី និងកាប់វែរ។

កំណត់ត្រាទី ៣ គឺ Messi បានក្លាយជាកីឡាករដំបូងគេ ដែលអាចស៊ុតបញ្ចូលទីបានចំនួន ៨ ប្រកួតជាប់គ្នានៅ World Cup។ តាំងពី World Cup ឆ្នាំ ២០២២ មកដល់ ២០២៦ នេះ Messi រកបាន ១ គ្រាប់ទល់អូស្ត្រាលី, រកបាន ១ គ្រាប់ទល់ ហូល្លង់, រកបាន ១ គ្រាប់ទល់ ក្រូអាត, រកបាន ២ គ្រាប់ទល់ បារាំង, រកបាន ៣ គ្រាប់ទល់ អាល់ហ្ស៊េរី, រកបាន ២ គ្រាប់ទល់ អូទ្រីស, រកបាន ១ គ្រាប់ទល់ ហ្ស៊កដានី និងចុងក្រោយ រកបាន ១ គ្រាប់ទល់ កាបវែរ។

កំណត់ត្រា ២ ដំបូង ប្រហែលជានឹងមានកីឡាករមកបំបែកបាននាពេលអនាគត ប៉ុន្តែកំណត់ត្រាទី ៣ ប្រហែលជាពិបាករកអ្នកមកបំបែកខ្លាំងណាស់។ មូលហេតុលើកឡើងដូច្នេះ ដោយសារគ្រប់ការប្រកួតនៅ World Cup សុទ្ធតែជាការប្រកួតដ៏តឹងតែង ហើយការរកបានគ្រាប់បាល់បាន ៨ ប្រកួតជាប់គ្នាបែបនេះ នឹងមិនងាយមាននរណាធ្វើបានដូចនោះទេ៕

អត្ថបទ៖ សេម កុសល

The post Messi ស៊ុតមួយគ្រាប់ទល់កាប់វែរ បានសាងកំណត់ត្រាថ្មី៣ ខណៈមានកំណត់ត្រា១អាចពិបាករកអ្នកបំបែក appeared first on Kampuchea Thmey Daily.

ការប្រកួតវគ្គ ៣២ ក្រុមចុងក្រោយបានបញ្ចប់ជាស្ថាពរ នៅថ្ងៃទី ៤ ខែ កក្កដា ឆ្នាំ ២០២៦ នេះ ខណៈក្រុមមកពី អាស៊ី សរុប ៩ ក្រុម មិនមានក្រុមណាមួយបានឡើងដល់វគ្គ ១៦ ក្រុមចុងក្រោយនោះទេ។

មានក្រុម អាស៊ី ចំនួន ៧ បានធ្លាក់នៅវគ្គសន្សំពិន្ទុក្នុងពូល ដូចជា អ៊ីរ៉ង់ អ៊ីរ៉ាក់ ហ្ស៊កដានី កាតា អារ៉ាប៉ីសាអ៊ូឌីត កូរ៉េខាងត្បូង និង អ៊ុយបេគីស្ថាន។ ដោយឡែកនៅវគ្គ ៣២ ក្រុមចុងក្រោយ មានតែក្រុម អាស៊ី ២ ប៉ុណ្ណោះ គឺ ជប៉ុន និង អូស្ត្រាលី បានឡើងមកដល់។

ប៉ុន្តែពិតជាសោកស្តាយ ដែលក្រុមទាំង ២ នោះបានធ្លាក់អស់ទៅហើយ។ ក្រុមសាំម៉ូរ៉ៃ ជប៉ុន បានធ្លាក់ បន្ទាប់ពីចាញ់ ប្រេស៊ីល ១-២ ខណៈចុងក្រោយនេះ អូស្ត្រាលី បានចាញ់ អេហ្ស៊ីប នៅវគ្គបាល់កាត់សេចក្តី ១១ ម៉ែត្រ ២-៤ បន្ទាប់ពី ១២០ នាទីស្មើគ្នា ១-១។

ក្រឡេកទៅមើលក្រុមទាំង ១៦ ក៏ដូចជាគូប្រកួតនីមួយៗនៅវគ្គ ១៦ ក្រុមចុងក្រោយវិញ ក៏បានរកឃើញហើយដែរ ក្នុងនោះ កាណាដា ត្រូវជួប ម៉ារ៉ុក, ប៉ារ៉ាហ្គាយ ជួប បារាំង, អាមេរិក ជួប ប៊ែលហ្ស៊ិក, ព័រទុយហ្គាល់ ជួប អេស្ប៉ាញ។

ចំណែក ៤ គូទៀត គឺ ប្រេស៊ីល ជួប ន័រវែស, ម៉ិកស៊ិក ជួប អង់គ្លេស, ស្វីស ជួប កូឡុំប៉ី និង អាហ្សង់ទីន ជួប អេហ្ស៊ីប៕

អត្ថបទ៖ សេម កុសល

The post ក្រុមមកពី អាស៊ី ធ្លាក់ពី World Cup 2026 អស់គ្មានសល់ ត្រឹមវគ្គ ៣២ ក្រុម appeared first on Kampuchea Thmey Daily.

លោក Moriyasu ត្រូវបានគេចាត់ទុកជាគ្រូបង្វឹកដ៏ឆ្នើមម្នាក់ ទោះបីជាលោកមិនអាចជួយឱ្យ ជប៉ុន ឆ្លងផុត ប្រេស៊ីល ឡើងទៅកាន់វគ្គ ១៦ ក្រុមនៃព្រឹត្តិការណ៍ World Cup 2026 ក៏ដោយ។ នារយៈពេលប៉ុន្មានឆ្នាំចុងក្រោយនេះ ជប៉ុន ពិតជាបង្ហាញទម្រង់លេងល្អខ្លាំង ក្រោមការដឹកនាំរបស់លោក។

នៅក្នុងការប្រកួតទល់នឹងក្រុមជើងឯក World Cup ៥ សម័យ ប្រេស៊ីល កន្លងទៅ គឺ ជប៉ុន បានបង្ហាញទម្រង់លេងល្អគួរឱ្យកត់សម្គាល់ ទោះបរាជ័យ ២-១ ក៏ដោយ។ គិតត្រឹមពេលនេះ កិច្ចសន្យារបស់លោកបានផុតសុពលភាពហើយ ប៉ុន្តែលោកមិនទាន់បានសម្រេចចិត្តអំពីការបន្តកិច្ចសន្យាថ្មីនៅឡើយទេ។

ស្របពេលលោក Moriyasu មិនទាន់សម្រេចចិត្តបន្តកុងត្រាថ្មី ស្រាប់តែអតីតខ្សែប្រយុទ្ធរបស់ក្រុម AC Milan លោក Honda បានប្រកាសចង់ធ្វើជាបេក្ខភាពមួយរូប ដើម្បីដឹកនាំក្រុម ជប៉ុន ជំនួសគ្រូបង្វឹកបច្ចុប្បន្ន។ លោក Honda បានបង្ហោះសារនៅបណ្តាញសង្គម X ដូច្នេះ ថា៖ «នេះប្រហែលជាជាមតិដែលអាចបង្កភាពចម្រូងចម្រាស់ ប៉ុន្តែខ្ញុំចង់និយាយថា ខ្ញុំបានឃើញព័ត៌មានថា មានការផ្តល់សំណើបន្តកិច្ចសន្យារបស់លោក Moriyasu មួយឆ្នាំទៀត»។

អតីតគ្រូបង្វឹក កម្ពុជា ដែលបច្ចុប្បន្នមានវ័យ ៤០ ឆ្នាំបានបន្ត ថា៖ «ប្រសិនបើសំណើនោះគ្រាន់តែជាដំណោះស្រាយបណ្តោះអាសន្នទេ ព្រោះមិនទាន់មានបេក្ខជនផ្សេងសម្រាប់តំណែងគ្រូបង្វឹក នោះសូមផ្តល់ឱកាសឲ្យ ខ្ញុំ សាកល្បងរយៈពេលមួយឆ្នាំ។ បើខ្ញុំបរាជ័យក្នុងពានរង្វាន់ Asian Cup អ្នកអាចបណ្តេញខ្ញុំចេញពីតំណែងភ្លាមៗ ដោយមិនចាំបាច់មានការពន្យល់អ្វីឡើយ។ ខ្ញុំត្រៀមខ្លួនរួចជាស្រេចដើម្បីទទួល​យកការប្រកួតប្រជែងនេះ»។

លោក Honda បច្ចុប្បន្ន កំពុងតែទទួលតំណែងជាគ្រូបង្វឹកផង និងជាកីឡាករផងរបស់ក្រុម FC Jurong នៃប្រទេស សិង្ហបុរី។ ដោយឡែក កាលពីអតីតកាលវិញ លោកក៏ធ្លាប់មានបទពិសោធដឹកនាំក្រុមជម្រើសជាតិផងដែរ គឺបានដឹកនាំ កម្ពុជា ទាំងក្រុមធំ និងយុវជនអាយុក្រោម ២៣ ឆ្នាំពីឆ្នាំ ២០១៨ ដល់ ២០២៣៕

អត្ថបទ៖ សេម កុសល

The post លោក Honda ដាក់សំណើចង់ធ្វើគ្រូ ជប៉ុន ជំនួសលោក Moriyasu អមជាមួយលក្ខខណ្ឌដ៏ម៉ឺងម៉ាត់មួយ appeared first on Kampuchea Thmey Daily.

ក្រុមការពារតំណែងជើងឯក អាហ្សង់ទីន នឹងត្រូវជួបក្រុម កាបវែរ ក្នុងវគ្គ ៣២ ក្រុមចុងក្រោយ នាម៉ោង ៥ ព្រឹកថ្ងៃទី ៤ ខែ កក្កដា ឆ្នាំ ២០២៦។ មុនជំនួបនេះមកដល់ អ្នកវិភាគ ក៏ដូចជាអ្នកគាំទ្រទូទាំងពិភពលោក បានមើលឃើញ ថា កាបវែរ មិនអាចប្រៀបផ្ទឹមនឹង អាហ្សង់ទីន នោះទេ។

ទោះបីជាយ៉ាងណា ក្រុម កាបវែរ ជាក្រុមមួយ ដែលមិនអាចមើលរំលងបាននោះទេ ដ្បិតនេះទើបជាការបង្ហាញខ្លួនលើកដំបូងនៅ World Cup របស់ពួកគេក៏ដោយ។ ក្រុមប្រទេសកោះមកពីតំបន់ អាហ្វ្រិកខាងលិច មួយនេះ បានបង្ហាញសក្តានុពលរបស់ខ្លួនរួចហើយ តាមរយៈការប្រកួតនៅក្នុងពូល H ដែលសុទ្ធតែជាក្រុមខ្លាំងៗ ប៉ុន្តែនៅតែអាចឆ្លងផុតពូលបាន។

ថ្វីដ្បិត កាបវែរ ស្ថិតនៅក្នុងពូលមួយ ដែលគេរំពឹងទាល់តែសោះ ថា នឹងអាចឆ្លងផុតពូលបាន ដោយសារមានក្រុមខ្លាំងដូចជា អេស្ប៉ាញ និង អ៊ុយរូហ្គាយ ប៉ុន្តែពួកគេនៅតែអាចឆ្លងមកវគ្គ ៣២ ក្រុមបានយ៉ាងភ្ញាក់ផ្អើល។

គ្រប់យ៉ាងមិនមែនជារឿងចៃដន្យនោះទេ ប៉ុន្តែវាជាសមត្ថភាពរបស់ពួកគេ ដែលមានតំបន់ការពាររឹងមាំ។ ក្រុមនេះមិនសូវមានប្រយុទ្ធមុតស្រួចនោះទេ ប៉ុន្តែចំណុចពិសេសរបស់ពួកគេ គឺការពារ។ សូម្បីតែក្រុមគោជល់ អេស្ប៉ាញ ក៏មិនអាចទម្លុះសំណាញ់ទីរបស់ពួកគេបាននោះទេ។ កាបវែរ បានស្មើទាំង ៣ ប្រកួតនៅក្នុងពូល H ក្នុងនោះ អេស្ប៉ាញ ០-០, អ៊ុយរូហ្គាយ ២-២ និង អារ៉ាប៉ីសាអ៊ូឌីត ០-០។

ក្រឡេកមកមើលក្រុមជើងឯក ២០២២ អាហ្សង់ទីន វិញ កំពុងក្លាយជាក្រុមដ៏ខ្លាំងក្លាមួយនៅ World Cup 2026។ Messi នៅតែឈរជាបង្គោលដ៏សំខាន់របស់ក្រុមពពកសអាហ្សង់ទីន ដោយការប្រកួតនៅវគ្គចែកពូលកន្លងទៅ រកបានរហូតដល់ទៅ ៦ គ្រាប់។ ចំណែកកីឡាករផ្សេងទៀតក៏នៅតែល្អ ដូចជា Mac Allister, Rodrigo De Paul, Enzo Fernandes និង Julian Alvarez ជាដើម។

ប៉ុន្តែ អាហ្សង់ទីន ទំនងនឹងមិនងាយស្រួលនោះទេ សម្រាប់ការប្រកួតនៅវគ្គ ៣២ ក្រុមចុងក្រោយទល់នឹងក្រុម កាបវែរ ដោយសារពួកគេជាក្រុមពូកែការពារ។ ជាក់ស្តែង សូម្បី អេស្ប៉ាញ ដែលមានប្រយុទ្ធមុតស្រួច ដូចជា Lamine Yamal, Mikel Oyarzabal និង Nico Williams ក៏មិនអាចទម្លុះទីពួកគេបានដែរ៕

អត្ថបទ៖ សេម កុសល

The post ក្រុមការពារជើងឯក អាហ្សង់ទីន អាចរង​ហានិភ័យ ជួប កាបវែរ ក្រុមល្អការពារ appeared first on Kampuchea Thmey Daily.

ក្រុមរហស្សនាមបញ្ចខែល ព័រទុយហ្គាល់ បានកក់កៅអីឡើងទៅកាន់វគ្គ ១៦ ក្រុមចុងក្រោយជាផ្លូវការហើយ បន្ទាប់ពីឈ្នះក្រុម ក្រូអាត នៅវគ្គ ៣២ ក្រុមចុងក្រោយ នាព្រឹកថ្ងៃទី ៣ ខែ កក្កដា ឆ្នាំ ២០២៦ នេះក្នុងលទ្ធផល ២-១។

ខាង ក្រូអាត ជាអ្នករកគ្រាប់បាល់នាំមុខមុនដោយកីឡាករ Ivan Perisic។ បន្ទាប់មក ព័រទុយហ្គាល់ រកបានគ្រាប់បាល់វាយបក ២ គ្រាប់មកវិញ ដោយ Cristiano Ronaldo នៅនាទីទី ៦៨ តាមរយៈបាល់ប៉េណាល់ទី និង Goncalo Ramos នៅនាទីទី ៩០+៤។

ក្រោយរកបានគ្រាប់បាល់មួយគ្រាប់នេះ Ronaldo បំបែកកំណត់ត្រាមួយ ដោយក្លាយជាកីឡាករមានវ័យចំណាស់បំផុតរកបានគ្រាប់បាល់នៅវគ្គចាញ់ធ្លាក់ក្នុងប្រវត្តិសាស្ត្រ World Cup ពោលគឺក្នុងវ័យ ៤១ ឆ្នាំ និង ១៤៧ ថ្ងៃ។

ជាមួយគ្នានេះ Ronaldo ក៏បានបំបែកនូវកំណត់ត្រាមួយទៀតផងដែរសម្រាប់ខ្លួនឯងផ្ទាល់ ដោយគ្រាប់បាល់មួយគ្រាប់នេះ គឺជាគ្រាប់បាល់លើកដំបូង ដែលគាត់រកបាននៅវគ្គចាញ់ធ្លាក់ ក្នុងចំណោមការបង្ហាញខ្លួន ៦ លើកកន្លងមក ដោយគិតទាំងឆ្នាំ ២០២៦ នេះ។

គួរបញ្ជាក់ ថា ជំហានបន្ទាប់ Ronaldo នឹងត្រូវដឹកនាំ ព័រទុយហ្គាល់ ឡើងទៅជួប អេស្ប៉ាញ នៅវគ្គ ១៦ ក្រុម នាយប់រំលងអាធ្រាត្រឈានចូលថ្ងៃទី ៧ ខែ កក្កដា ឆ្នាំ ២០២៦៕

អត្ថបទ៖ សេម កុសល

The post Ronaldo បានបំបែកកំណត់ត្រាពិសេសមួយ ក្រោយស៊ុតប៉េណាល់ទី ១ គ្រាប់ទល់ ក្រូអាត យប់មិញ appeared first on Kampuchea Thmey Daily.