Ronaldo បានបំបែកកំណត់ត្រាពិសេសមួយ ក្រោយស៊ុតប៉េណាល់ទី ១ គ្រាប់ទល់ ក្រូអាត យប់មិញ

ខ្សែប្រយុទ្ធ Cristiano Ronaldo បានបំបែកកំណត់ត្រាពិសេសមួយ ក្រោយស៊ុតមួយគ្រាប់ ជួយឱ្យ ព័រទុយហ្គាល់ ឈ្នះ ក្រូអាត នៅវគ្គ ៣២ ក្រុមចុងក្រោយនៃព្រឹត្តិការណ៍បាល់ទាត់ជើងឯកពិភពលោក World Cup 2026។

ក្រុមរហស្សនាមបញ្ចខែល ព័រទុយហ្គាល់ បានកក់កៅអីឡើងទៅកាន់វគ្គ ១៦ ក្រុមចុងក្រោយជាផ្លូវការហើយ បន្ទាប់ពីឈ្នះក្រុម ក្រូអាត នៅវគ្គ ៣២ ក្រុមចុងក្រោយ នាព្រឹកថ្ងៃទី ៣ ខែ កក្កដា ឆ្នាំ ២០២៦ នេះក្នុងលទ្ធផល ២-១។

ខាង ក្រូអាត ជាអ្នករកគ្រាប់បាល់នាំមុខមុនដោយកីឡាករ Ivan Perisic។ បន្ទាប់មក ព័រទុយហ្គាល់ រកបានគ្រាប់បាល់វាយបក ២ គ្រាប់មកវិញ ដោយ Cristiano Ronaldo នៅនាទីទី ៦៨ តាមរយៈបាល់ប៉េណាល់ទី និង Goncalo Ramos នៅនាទីទី ៩០+៤។

ក្រោយរកបានគ្រាប់បាល់មួយគ្រាប់នេះ Ronaldo បំបែកកំណត់ត្រាមួយ ដោយក្លាយជាកីឡាករមានវ័យចំណាស់បំផុតរកបានគ្រាប់បាល់នៅវគ្គចាញ់ធ្លាក់ក្នុងប្រវត្តិសាស្ត្រ World Cup ពោលគឺក្នុងវ័យ ៤១ ឆ្នាំ និង ១៤៧ ថ្ងៃ។

ជាមួយគ្នានេះ Ronaldo ក៏បានបំបែកនូវកំណត់ត្រាមួយទៀតផងដែរសម្រាប់ខ្លួនឯងផ្ទាល់ ដោយគ្រាប់បាល់មួយគ្រាប់នេះ គឺជាគ្រាប់បាល់លើកដំបូង ដែលគាត់រកបាននៅវគ្គចាញ់ធ្លាក់ ក្នុងចំណោមការបង្ហាញខ្លួន ៦ លើកកន្លងមក ដោយគិតទាំងឆ្នាំ ២០២៦ នេះ។

គួរបញ្ជាក់ ថា ជំហានបន្ទាប់ Ronaldo នឹងត្រូវដឹកនាំ ព័រទុយហ្គាល់ ឡើងទៅជួប អេស្ប៉ាញ នៅវគ្គ ១៦ ក្រុម នាយប់រំលងអាធ្រាត្រឈានចូលថ្ងៃទី ៧ ខែ កក្កដា ឆ្នាំ ២០២៦៕

អត្ថបទ៖ សេម កុសល