ព័ត៌មានអន្ដរជាតិ

អ្នកជំនាញថៃព្រមានថា កិច្ចព្រមព្រៀងរ៉ែកម្រអាមេរិក-ថៃ ប៉ះពាល់ដល់ទំនាក់ទំនងជាមួយចិន

បានផុស

៥ ខែ មុន

នៅ

ថ្ងៃអង្គារ ២៣ ធ្នូ ២០២៥

ដោយ

ជំហានដ៏គួរឱ្យភ្ញាក់ផ្អើលរបស់ថៃ ក្នុងការចុះអនុស្សរណៈនៃការយោគយល់គ្នា (MoU) ជាមួយសហរដ្ឋអាមេរិក លើកិច្ចសហប្រតិបត្តិការរ៉ែដ៏កម្រកាលពីខែតុលា កំពុងគំរាមកំហែងដល់ទំនាក់ទំនងរវាងថៃ និងចិន។ នេះបើតាមការចុះផ្សាយរបស់កាសែតបាងកកប៉ុស្តិ៍នាថ្ងៃអង្គារនេះ (២៣ ធ្នូ) ដោយស្រង់ការព្រមានរបស់អ្នកជំនាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មែនទែនទៅ សហរដ្ឋអាមេរិក និងចិនកំពុងមានជម្លោះគ្នាលើបញ្ហានៃការនាំចេញរ៉ែដ៏កម្ររបស់ចិន ដែលជាផ្នែកមួយនៃភាពតានតឹងផ្នែកពាណិជ្ជកម្ម។ យោធាអាមេរិកពឹងផ្អែកលើរ៉ែដ៏កម្រមួយចំនួន សម្រាប់ប្រើប្រាស់ក្នុងផលិតកម្មយន្តហោះចម្បាំង F-35។ សារព័ត៌មានផ្សេងៗបានរាយការណ៍ថា កិច្ចព្រមព្រៀងរ៉ែកម្ររវាងអាមេរិក និងប្រទេសផ្សេងៗក្រៅពីចិន ដូចជាជាមួយថៃ និងម៉ាឡេស៊ី អាចជួយផ្គត់ផ្គង់រ៉ែសំខាន់ៗទាំងនេះ ដើម្បីគាំទ្រដល់ឧស្សាហកម្មការពារជាតិ ការផលិតរថយន្ត និងបច្ចេកវិទ្យារបស់អាមេរិក។

លោក Somjai Phagaphasvivat អ្នកវិភាគសេដ្ឋកិច្ចនយោបាយថៃ បានប្រាប់បាងកកប៉ុស្តិ៍ថា ចិនទំនងជានឹងយកចិត្តទុកដាក់យ៉ាងខ្លាំងចំពោះកិច្ចព្រមព្រៀងបែបនេះ ខណៈអាមេរិកកំពុងស្វែងរកជម្រើសផ្សេងទៀត ដើម្បីកាត់បន្ថយការពឹងផ្អែកលើចិន។

អនុស្សរណៈនៃការយោគយល់គ្នាអាមេរិក-ថៃ ផ្តល់សិទ្ធិអាទិភាពដល់សហរដ្ឋអាមេរិកក្នុងការចូលរួមនៅទូទាំងខ្សែច្រវ៉ាក់ផ្គត់ផ្គង់រ៉ែសំខាន់ រាប់ចាប់តាំងពីការរុករក និងអភិវឌ្ឍន៍ រហូតដល់ការទាញយក ប៉ុន្តែមិនផ្តល់ឱ្យអាមេរិកនូវសិទ្ធិផ្តាច់មុខនោះទេ។

លោក Somjai បានថ្លែងយ៉ាងដូច្នេះថា៖ «សម្រាប់ចិន បញ្ហានេះមិនត្រឹមតែជាបញ្ហាពាណិជ្ជកម្មប៉ុណ្ណោះទេ ថែមទាំងជាយុទ្ធសាស្ត្រទៀតផង ដោយសាររ៉ែកម្រមានសារៈសំខាន់ចំពោះប្រព័ន្ធអាវុធ និងបច្ចេកវិទ្យាឌីជីថល ដែលជាវិស័យប្រកួតប្រជែងដ៏សំខាន់រវាងមហាអំណាចទាំង២»។

គួរគូសបញ្ជាក់ថា រ៉ែដ៏កម្រមានសារៈសំខាន់សម្រាប់ការផលិតបច្ចេកវិទ្យាទំនើបៗដូចជាស្មាតហ្វូន យានយន្តអគ្គិសនី និងយុទ្ធោបករណ៍។

លោក Somjai បានបន្តថា ការចូលរួមរបស់ថៃជាមួយសហរដ្ឋអាមេរិកក្នុងវិស័យនេះ ពាក់ព័ន្ធទាំងផ្នែកសេដ្ឋកិច្ច និងសន្តិសុខ។

រដ្ឋាភិបាលចាំផ្ទះរបស់លោកនាយករដ្ឋមន្រ្តី អានុទីន ឆានវីរៈគុណ បាននិយាយថា MoU រ៉ែកម្រ គឺជាវិធីសាស្រ្តមួយជំរុញការចរចាពាណិជ្ជកម្មជាមួយអាមេរិកពាក់ព័ន្ធពន្ធ។ ប៉ុន្តែក្រុមអ្នករិះគន់បានលើកឡើងពីក្តីបារម្ភអំពីភូមិសាស្ត្រនយោបាយ និងការគំរាមកំហែងដែលអាចកើតមានចំពោះបរិស្ថាន។

សហព័ន្ធឧស្សាហកម្មថៃ (FTI) ឯណោះវិញ បានព្រមានថា អនុស្សរណៈនៃការយោគយល់គ្នាជាមួយសហរដ្ឋអាមេរិកអាចធ្វើឱ្យប្រទេសថៃប្រឈមនឹងហានិភ័យភាពតានតឹងការទូតជាមួយចិន។

ប្រធាន FTI លោក គ្រៀងក្រៃ ធៀននុគុល មានការព្រួយបារម្ភថា វាអាចអូសទាញប្រទេសថៃឱ្យធ្លាក់ចូលទៅក្នុងសង្គ្រាមពាណិជ្ជកម្មរវាងអាមេរិក និងចិន ដែលប៉ះពាល់អវិជ្ជមានដល់សេដ្ឋកិច្ចថៃ ខណៈថៃកំពុងព្យាយាមធ្វើឱ្យមានតុល្យភាពទំនាក់ទំនងការទូតជាមួយមហាអំណាចទាំង២៕