ព័ត៌មានអន្ដរជាតិ

ភាពតានតឹនពាណិជ្ជកម្មអឺរ៉ុប-អាមេរិក កើនឡើងជាថ្មី ក្រោយរដ្ឋបាល ត្រាំ ស្នើដាក់ពន្ធ EU លើបញ្ហាពលកម្មដោយបង្ខំ

បានផុស

១ ខែ មុន

នៅ

ថ្ងៃព្រហស្បតិ៍ ៤ មិថុនា ២០២៦

ដោយ

ភាពតានតឹងពាណិជ្ជកម្មអឺរ៉ុប-អាមេរិកបានកើនឡើងជាថ្មី ដោយគណៈកម្មការអឺរ៉ុបនៃសហភាពអឺរុប (EU) កាលពីថ្ងៃពុធ បានរិះគន់សហរដ្ឋអាមេរិកចំពោះគម្រោងដាក់ពន្ធបន្ថែមថ្មី ១០% លើទំនិញនាំចូលពីប្លុកនេះ ក្រោយរដ្ឋបាលប្រធានាធិបតីអាមេរិក ដូណាល់ ត្រាំ រកឃើញថា ទីក្រុងប្រ៊ុចសែលបានបរាជ័យក្នុងការទប់ស្កាត់ពាណិជ្ជកម្មទំនិញដែលផលិតដោយប្រើកម្លាំងពលកម្មដោយបង្ខំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Olof Gill អ្នកនាំពាក្យរងរបស់គណៈកម្មការអឺរ៉ុប បាននិយាយសេចក្តីថ្លែងការណ៍ថា៖ «គណៈកម្មការនឹងវិភាគដោយប្រុងប្រយ័ត្ននូវការរកឃើញបឋមនៃការស៊ើបអង្កេត ហើយនឹងបន្តចូលរួមជាមួយរដ្ឋបាលអាមេរិក។ ទោះបីបែបនេះក្ដី សហភាពអឺរ៉ុបចាត់ទុកពន្ធគយដែលដាក់ក្រោមករណីនេះ ថាមិនសមហេតុផល»។

ដោយឡែក លោក Bernd Lange ប្រធានគណៈកម្មាធិការពាណិជ្ជកម្មដ៏មានឥទ្ធិពលរបស់សភាអឺរ៉ុបឯណោះវិញ បាននិយាយថា អាមេរិក «កំពុងស្វែងរកមូលដ្ឋានច្បាប់ថ្មីយ៉ាងអន្ទះសារ ដើម្បីរក្សាគោលនយោបាយពន្ធគយរបស់ខ្លួន» បន្ទាប់ពីតុលាការកំពូលរបស់អាមេរិកខ្លួនឯងចាត់ទុកថាខុសច្បាប់។

លោក Lange បានបង្ហោះលើ X ថា៖ «ការចោទប្រកាន់សហភាពអឺរ៉ុបថាមិនបានធ្វើគ្រប់គ្រាន់ប្រឆាំងនឹងកម្លាំងដោយបង្ខំគឺជារឿងមិនសមហេតុផលខ្លាំង។ សហភាពអឺរ៉ុបបានអនុម័តច្បាប់ដ៏តឹងរ៉ឹងបំផុតលើពិភពលោក ប្រឆាំងនឹងផលិតផលដែលផលិតដោយប្រើពលកម្មដោយបង្ខំ»។ លោកបន្ថែមថា ស្ថានភាពនេះមើលទៅដូចជាការប៉ុនប៉ងស្វែងរកលេសផ្នែកច្បាប់ដើម្បីពន្ធ បន្ទាប់ពីពន្ធចាស់ត្រូវបានលុបចោល។

ក្រោយការប្រតិកម្មរបស់អឺរ៉ុប លោក Jamieson Greer តំណាងពាណិជ្ជកម្មសហរដ្ឋអាមេរិកឯណោះវិញ បាននិយាយកាលពីថ្ងៃពុធថា ទាំង EU និងសហរដ្ឋអាមេរិក សុទ្ធតែប្តេជ្ញាអនុវត្តតាមកិច្ចព្រមព្រៀងពាណិជ្ជកម្មរវាងភាគីទាំង២។

គួរគូសបញ្ជាក់ថា EU ស្ថិតក្នុងចំណោមប្រទេសចំនួន ៦០ ដែលការិយាល័យតំណាងពាណិជ្ជកម្មសហរដ្ឋអាមេរិក (USTR) បានស្នើដាក់ពន្ធ ១០ ឬ ១២,៥% កាលពីអង្គារ ក្រោយបើកការស៊ើបអង្កេតតាមមាត្រា ៣០១ លើការអនុវត្តពាណិជ្ជកម្មមិនស្មើភាពក្រោមច្បាប់ពាណិជ្ជកម្មឆ្នាំ ១៩៧៤។ ប្រទេសដែលត្រូវជាប់ពន្ធ ១០% ថ្មីរួមមាន EU កាណាដា អេក្វាឌ័រ ឥណ្ឌូណេស៊ី ម៉ិកស៊ិក ប៉ាគីស្ថាន អាហ្សង់ទីន បង់ក្លាដែស កម្ពុជា អែលសាល់វ៉ាឌ័រ ហ្គាតេម៉ាឡា ឥណ្ឌូណេស៊ី ម៉ាឡេស៊ី តៃវ៉ាន់ និងចក្រភពអង់គ្លេស។

ពេលប្រកាសពីសំណើដាក់ពន្ធ លោក Greer បាននិយាយថា ប្រទេសទាំងនោះបានបរាជ័យក្នុងការដោះស្រាយការនាំចូលទំនិញដែលផលិតដោយប្រើកម្លាំងពលកម្មដោយបង្ខំ ហើយការបរាជ័យនោះ «បង្កើតជាបញ្ហាមួយ ដែលកម្មករអាមេរិកត្រូវបង្ខំឱ្យប្រកួតប្រជែងទូទាំងពិភពលោកលើទីលានដែលមិនស្មើភាពគ្នា»។

មែនទែនទៅ មានការលើកឡើងថា រដ្ឋបាល ត្រាំ បើកការស៊ើបអង្កេតជុំវិញបញ្ហាពលកម្មដោយបង្ខំ ដើម្បីអាចបន្តអនុវត្តពន្ធលើបណ្ដាប្រទេសផ្សេងៗ មុនពេលពន្ធបណ្តោះអាសន្ន ១០% ផុតកំណត់នៅថ្ងៃទី ២៤ ខែកក្កដា ខាងមុខ។ រដ្ឋបាលលោក ត្រាំ បានដាក់ពន្ធបណ្ដោះអាសន្ននោះនៅថ្ងៃទី ២០ ខែកុម្ភៈ ក្រោយតុលាការកំពូលអាមេរិក បានសម្រេចថា ពន្ធដែលលោកដាក់ក្រោមច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧ ដែលរួមបញ្ចូលទាំងពន្ធបដិការនោះ គឺខុសច្បាប់ ហើយត្រូវលុបចេញ៕