ថៃ ​មីយ៉ាន់ម៉ា បើកច្រកពាណិជ្ជកម្មព្រំដែនគោកសំខាន់ «ស្ពានម្យ៉ាវ៉ាឌី ទី២» ឡើងវិញ ​

ថៃ និងមីយ៉ាន់ម៉ាបានបើកច្រកទ្វារពាណិជ្ជកម្មព្រំដែនគោក​ «ស្ពានម្យ៉ាវ៉ាឌីទី២»​ ឡើងវិញ ដោយស្តារផ្លូវពាណិជ្ជកម្ម និងដឹកជញ្ជូនផ្លូវគោកដ៏សំខាន់រវាងប្រទេសទាំង២ឡើងវិញ។ នេះបើតាមការចុះផ្សាយរបស់កាសែត The Nation។

​នាយកដ្ឋានជំរុញពាណិជ្ជកម្មអន្តរជាតិថៃ (DITP) ​​បាន​ឱ្យដឹងថា មជ្ឈមណ្ឌលពាណិជ្ជកម្មថៃនៅទីក្រុងយ៉ាហ្គូន​របស់មីយ៉ាន់ម៉ា បានរាយការណ៍ថា ច្រកទ្វារនេះបានបន្តចេញអាជ្ញាប័ណ្ណនាំចូលសម្រាប់ទំនិញថៃ​ទៅ​មីយ៉ាន់ម៉ា។

ស្ពានម្យ៉ាវ៉ាឌីទី២ ត្រូវបានបិទជាបណ្ដោះអាសន្នចាប់តាំងពីថ្ងៃទី ១៨ ខែសីហា ឆ្នាំ ២០២៥​ ដោយ​សារ​តែ​អរិភាព​ប្រដាប់អាវុធក្នុងតំបន់ ហើយបាន​ចាប់ផ្ដើមបើកឡើងវិញដោយកម្រិតលើការចេញចូលកាលពីសប្ដាហ៍មុន។

​នៅថ្ងៃទី២ មិថុនា កាសែតរដ្ឋមីយ៉ាន់ម៉ា Global New Light of Myanmar ​បានប្រកាសជាផ្លូវការអំពីការបើកច្រកពាណិជ្ជកម្មដ៏សំខាន់នេះ។ អាជ្ញាធរបាននិយាយថា ឥឡូវនេះអាជីវកម្មទាំងសងខាង អាចដាក់ពាក្យសុំអាជ្ញាប័ណ្ណនាំចូល និងនាំចេញតាមរយៈស្ពានម្យ៉ាវ៉ាឌីទី២បាន​។

គួរគូសបញ្ជាក់ថា មីយ៉ាន់ម៉ាភាគច្រើននាំចេញផលិតផលកសិកម្ម រួមទាំងចំណីសត្វ ពោត និងខ្ទឹមបារាំង ខណៈ​នាំចូលពី​ថៃ​នូវទំនិញប្រើប្រាស់ ថាមពល អាហារ សម្ភារៈប្រើប្រាស់ប្រចាំថ្ងៃ និងវត្ថុធាតុដើមឧស្សាហកម្ម​ផ្សេងៗ។

ការបិទច្រក​ដឹកទំនិញ​ដ៏សំខាន់ដដែល បាន​រួមចំណែកដល់ការធ្លាក់ចុះនៃពាណិជ្ជកម្មព្រំដែនគោករបស់ថៃនាពេលកន្លងមក ដោយបន្ថែមសម្ពាធពីលើការបិទទ្វារព្រំដែនកម្ពុជា-ថៃ ដែលអូសបន្លាយតាំងតែពីខែមិថុនា ឆ្នាំមុន៕