ជម្លោះមជ្ឈិមបូព៌ា​បង្កការរំខានខ្លាំងដល់ខ្សែច្រវ៉ាក់​ផ្គត់ផ្គង់ឧស្សាហកម្មគីមីឥន្ធនៈថៃ

ឧស្សាហកម្មថៃ​កំពុងប្រឈមមុខនឹង​ផលរំខានខ្លាំង​ពី​ជម្លោះនៅមជ្ឈិមបូព៌ា ដែលនាំឱ្យមាន​កង្វះខាតវត្ថុធាតុដើមសម្រាប់​ផលិតកម្ម​គីមីឥន្ធនៈ ដូចជាប្រេងឆៅ និងឧស្ម័នធម្មជាតិជាដើម។ នេះបើតាមការចុះផ្សាយរបស់កាសែត The Nation នៅថ្ងៃពុធ (១១ មីនា) នេះ។

ជម្លោះរវាងអ៊ីស្រាអែល សហរដ្ឋអាមេរិក និងអ៊ីរ៉ង់ ​បាន​នាំឱ្យមានការបិទច្រកសមុទ្រហ័រមូហ្ស ដែលរំខានដល់ការដឹកជញ្ជូនប្រេងឆៅ និងឧស្ម័នធម្មជាតិ​ពង្រាវ។ ​ផលប៉ះពាល់លើ​ខ្សែច្រវ៉ាក់ផលិតកម្ម​ក្នុងឧស្សាហកម្មគីមីឥន្ធនៈថៃ ​បណ្តាលឱ្យរោងចក្រ​ក្នុងវិស័យនេះ​ផ្អាកការផលិត ខណៈ​ប្រតិបត្តិករជាច្រើនមានការព្រួយបារម្ភអំពីកង្វះវត្ថុធាតុដើម។

ក្រុមហ៊ុនថ្នាំលាប TOA បាននិយាយថា វត្ថុធាតុដើមមានការខ្វះខាត ដោយស្ដុករបស់ក្រុមហ៊ុនអាចប្រើប្រាស់បានតែ ២០ ថ្ងៃប៉ុណ្ណោះ ហើយរំពឹងថា ប្រតិបត្តិការរបស់ក្រុមហ៊ុននឹង​ធ្លាក់ចុះនៅត្រីមាសទី១ ឆ្នាំនេះ។

ដោយឡែក ក្រុមហ៊ុន មី MAMA បានឲ្យដឹងថា ជ័រប្លាស្ទិកដែល​ប្រើប្រាស់សម្រាប់ការវេចខ្ចប់ ​នឹង​ខ្វះខាត ដែល​បណ្តាលឱ្យផលិតកម្មវេចខ្ចប់របស់​ក្រុមហ៊ុន​មានការរអាក់រអួល។ ជម្លោះ​នៅជម្ឈិមបូព៌ា បានធ្វើឱ្យតម្លៃប្រេងកើន​ឡើង និងបង្កើតសញ្ញាដំបូងនៃកង្វះសម្ភារៈវេចខ្ចប់។

លើសពីនោះទៀតសោត ការបញ្ជាទិញទៅអ្នកផ្គត់ផ្គង់របស់ក្រុមហ៊ុន MAMA ត្រូវបានបដិសេធ ដោយ​បង្កើនការព្រួយបារម្ភថា តម្លៃវេចខ្ចប់អាចឡើងខ្ពស់ ហើយកង្វះសម្ភារៈអាចរំខានដល់ផលិតកម្ម។ ខណៈតម្លៃខ្ពស់អាចទប់ស្កាត់បានបណ្តោះអាសន្ន បញ្ហាធំជាងគឺ ប្រសិនបើ​មិនអាចវេចខ្ចប់បាន​ នោះក្រុមហ៊ុនមិនអាចផលិតមីដើម្បីលក់បាន​ទេ។​​

ចំណែកឯក្រុមហ៊ុនឧស្សាហកម្ម Siam Cement Group (SCC) វិញ បានផ្អាកប្រតិបត្តិការជាបណ្តោះអាសន្ននៅរោងចក្រគីមីឥន្ធនៈរបស់ខ្លួននៅក្រុង Map Ta Phut នៃខេត្តរ៉ាយ៉ង។ ក្រុមហ៊ុនមិនអាចទទួលបានវត្ថុធាតុដើមគ្រប់គ្រាន់​ ដោយសារតែផ្លូវដឹកជញ្ជូនពីមជ្ឈិមបូព៌ា​រងការរំខាន៕

​

​