ការវិនិយោគនៅថៃចុះខ្សោយ​ ដោយ​រោងចក្របិទទ្វារច្រើនជាងបើក

បរិយាកាសវិនិយោគរបស់ប្រទេសថៃកំពុងបង្ហាញសញ្ញានៃភាពទន់ខ្សោយ ដោយ​រោងចក្របិទទ្វារច្រើនជាងរោងចក្របើកប្រតិបត្តិការថ្មី ជាលើកដំបូងក្នុងរយៈពេល ២​ ឆ្នាំកន្លះ។ នេះបើតាមការចុះផ្សាយរបស់កាសែត The Nation។

ការិយាល័យក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDC) បាន​ឱ្យដឹងថា ​រោងចក្រចំនួន ១៥៦ បានបិទទ្វារនៅក្នុងត្រីមាសទី១នៃឆ្នាំ ២០២៦ ខណៈ​រោងចក្រថ្មី​ដែលបើកប្រតិបត្តិការមានត្រឹមតែ ១៣៩ ​ប៉ុណ្ណោះ​។ ការបើករោងចក្រថ្មីនេះ ក៏បានធ្លាក់ចុះជិត ៦៤% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដែលឆ្លុះបញ្ចាំងពីការធ្លាក់ចុះនៃទំនុកចិត្តរបស់វិនិយោគិន​។

របាយការណ៍បង្ហាញថា ការងើបឡើងវិញនៃសេដ្ឋកិច្ចរបស់​ថៃនៅតែមិនស្មើគ្នា។ ក្រុមហ៊ុនធំៗ និងមធ្យម បានបន្តពង្រីកប្រតិបត្តិការរបស់ពួកគេ ខណៈ​សហគ្រាសធុនតូច និងមធ្យមជាច្រើន (SMEs) ប្រឈមមុខនឹងការលំបាក ​ហើយ​បិទទ្វារកាន់តែ​ច្រើនឡើងៗ។

ឧស្សាហកម្មដូចជា ការកែច្នៃអាហារ ផ្លាស្ទិក​ គ្រឿងចក្រ គ្រឿងអេឡិចត្រូនិក និងឧបករណ៍អគ្គិសនីនៅតែទាក់ទាញការវិនិយោគ និងបង្កើតការងារ។ ​យ៉ាងណាមិញ អត្ថប្រយោជន៍ភាគច្រើនបានទៅដល់រោងចក្រធំៗ ដោយអាជីវកម្មខ្នាតតូចទទួលបានការគាំទ្រតិចតួច​។

NESDC បាននិយាយថា ហានិភ័យ​សកល​ដែល​កំពុង​បន្ត​កើតមាន រួម​ទាំង​ភាព​តានតឹង​នៅ​មជ្ឈិមបូព៌ា អាច​បន្ត​ប៉ះពាល់​ដល់​វិស័យ​ងាយ​រងគ្រោះ និង​ធ្វើ​​ឱ្យ​​ការ​វិនិយោគ​ថ្មី​នៅ​ក្នុង​ប្រទេស​ថៃ​ថយ​ចុះ។

អ្នកសេដ្ឋកិច្ចបានជំរុញឱ្យរដ្ឋាភិបាលតាមដានសេដ្ឋកិច្ចយ៉ាងដិតដល់ ដោយព្រមានថា ការបិទរោងចក្រកើនឡើងអាចក្លាយជាបញ្ហា​កាន់តែធំ​ ប្រសិនបើភាពមិនប្រាកដប្រជាទូទាំងពិភពលោកនៅតែបន្ត។ ពួកគេក៏បានសម្តែងការព្រួយបារម្ភផងដែរថា SMEs ជាច្រើនកំពុង​លំបានក្នុងការ​ទទួលបានប្រាក់កម្ចី ដែលធ្វើឱ្យអាជីវកម្មខ្នាតតូចពិបាក​នឹង​បន្តប្រតិបត្តិការ​ ​ហើយ​ពង្រីកខ្លួន។​

លើសពីនេះ​ អ្នកជំនាញនិយាយថា SMEs របស់ថៃ កំពុងស្ថិតនៅក្រោមសម្ពាធពីការប្រកួតប្រជែងពីបរទេស ការផ្លាស់ប្តូរ ក្នុងឧស្សាហកម្ម ដូចជាការផ្លាស់ប្តូរទៅបច្ចេកវិទ្យារថយន្តអគ្គិសនី និងបញ្ញាសិប្បនិម្មិត (AI) និង​កម្សោយក្នុងវិស័យដូចជាកសិកម្ម និងសំណង់​ជាដើម​។ ​យ៉ាងណាមិញ អ្នកសេដ្ឋកិច្ចបានកត់សម្គាល់ថា ស្ថានភាពនេះនៅតែត្រូវបានចាត់ទុកថាជា «សញ្ញាព្រមាន» ជាជាងវិបត្តិ ដោយសារការនាំចេញ និងវិស័យ​ការងារទូទៅនៅតែរឹងមាំ៕