AMRO៖ ​កម្ពុជា នៅតែរក្សាអត្រាកំណើនសេដ្ឋកិច្ចបានល្អ ដោយសារមូលដ្ឋានរឹងមាំ

លោក Yasuto Watanabe ប្រធានអង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ​បានលើក​ឡើង​ពីឥទ្ធិពលនៃកត្តាប្រឈមថ្មីៗ​ ដែលអាចធ្វើឱ្យសម្ទុះកំណើន​សេដ្ឋកិច្ចកម្ពុជា​មានការ​ថមថយ​ខ្លះៗ ប៉ុន្តែក៏នៅរក្សាបានអត្រាកំណើនល្អ ​ដោយសារមូលដ្ឋានសេដ្ឋកិច្ចរឹងមាំ និងការ​ឆ្លើយ​តប​គោល​នយោបាយមានប្រសិទ្ធភាព។

​លោក Yasuto Watanabe បានលើកឡើង នៅក្នុងជំនួបពិភាក្សាការងារ​ជាមួយលោកស្រី ជា សិរី ទេសាភិបាលធនាគារ​ជាតិនៃកម្ពុជានៅថ្ងៃទី ២៨ មេសា ២០២៦។​

លោកប្រធាន AMRO បានលើកឡើងពីភាពធន់នៃសេដ្ឋកិច្ចកម្ពុជា ក្នុង​បរិការណ៍​ដែលសកល​លោកកំពុងជួបប្រទះកត្តាប្រឈមមួយចំនួនដូចជា ជម្លោះ​ភូមិសាស្រ្តនយោបាយ និង​ការឡើងថ្លៃប្រេងឥន្ធនៈ។ ​លោកក៏បានលើកឡើងពីសារៈសំខាន់នៃការរក្សាបានទំនុកចិត្តលើប្រព័ន្ធធនាគារ ស្ថានភាពគុណភាពឥណទាន និងការអនុវត្តវិធានការមួយចំនួន ផង​ដែរ។

​លោកស្រី ជា សិរី​បានលើកឡើង​ពីគោលនយោបាយរបស់រាជរដ្ឋាភិបាល​ពាក់ព័ន្ធនឹង​ការអភិ​វឌ្ឍវិស័យថាមពលដោយ​ផ្តោតលើប្រភពផ្គត់ផ្គង់គ្រប់គ្រាន់ ​និងថាមពលស្អាត​ ដែលជាកត្តាយ៉ាង​សំខាន់ក្នុងការកាត់បន្ថយផលប៉ះពាល់ពីការកើនឡើងតម្លៃប្រេងឥន្ធនៈ។ លោកស្រីក៏បានលើកឡើងពីអាទិភាពនៃការពង្រីកឥណទានដល់សហគ្រាសខ្នាតតូច និងមធ្យម (SMEs) និងការលើកកម្ពស់ហិរញ្ញវត្ថុប្រកបដោយចីរភាពផងដែរ។

ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) កាលពីពេលថ្មីៗ បានព្យាករថា សេដ្ឋកិច្ចកម្ពុជា នឹងមានកំណើន៤,៩% នៅឆ្នាំ ២០២៦ ដែលលើសពីមធ្យមភាគអាស៊ាន ទោះបីជាមានភាពមិនប្រាកដប្រជាសកលកើនឡើងក៏ដោយ៕