ដាំទុរេនតាមបច្ចេកទេសត្រឹមត្រូវមួយហិកតា អាចរកចំណូលបាន ៥ម៉ឺនដុល្លារ

ទុរេន គឺ​ជា​ដំណាំ​មាន​សក្តានុពល​សេដ្ឋកិច្ច​ខ្ពស់ ដែល​ទាមទារ​បច្ចេកទេស​ដាំ តាក់តែង​មែក ការកំណត់​ចំនួន​ផ្លែ​ក្នុង​ដើម​នីមួយៗ​តាម​អាយុកាល ការផ្តល់​ជី ទឹក និង​ការមើល​ថែរក្សា ការពារ​ជំងឺ និង​សត្វល្អិត​ចង្រៃ ដោយ​ត្រូវ​យកចិត្ត​ទុកដាក់​ប្រាកដប្រជា​ទើប​ទទួលបាន​ទិន្នផល​ខ្ពស់​។

ជាក់ស្តែងបច្ចុប្បន្នទីផ្សារទុរេន នៅកម្ពុជា ក៏កំពុងមានតម្រូវការខ្ពស់ ពលរដ្ឋខ្មែរចូលចិត្តបរិភោគទុរេន បើទោះជាមានតម្លៃថ្លៃបន្តិចក្តី។ តម្លៃគឺស្របតាមដំណាំដែលពិបាកដាំដុះ និងថែទាំ។

ប្រសិនបើការដាំដុះពុំមានបច្ចេកទេសត្រឹមត្រូវ ការទទួលផលពីដំណាំនេះ ក៏មិនសមប្រកបនោះដែរ។ ប៉ុន្តែបើដាំដុះ​តាមបច្ចេកទេសត្រឹមត្រូវ នឹងទទួលបានទិន្នផលច្រើន និងប្រាក់ចំណូលខ្ពស់។ ជាក់ស្តែងលោក ស៊ឹម សុជាតិ ជាម្ចាស់ចម្ការមួយរូប នៅស្រុកវាលវែង ខេត្តពោធិ៍សាត់ មានដីចម្ការ មិនដល់មួយហិកតាផងដាំដំណាំទុរេននេះ។ ប៉ុន្តែលោកអះអាងថា អាចរកចំណូលបានពីដំណាំទុរេន ប្រមាណជាង ៥ម៉ឺនដុល្លារ ក្នុងមួយឆ្នាំ។

លោក ស៊ឹម សុជាតិ មានបទពិសោធន៍ក្នុងការដាំទុរេនអស់រយៈពេលជាង ១០ឆ្នាំមកហើយ។ អ្នកជំនាញដាំដុះរូបនេះ បានឱ្យដឹងថា ក្នុងមួយឆ្នាំលោកអាចប្រមូលផលទុរេន បានប្រមាណ ១២-១៣តោន គិតជាថវិកាប្រមាណ ៥ម៉ឺនដុល្លារ។ លោកថា ការហុចផលរបស់ទុរេន មិនថមថយនោះទេ ឆ្នាំនេះបានប៉ុណ្ណឹង ឆ្នាំក្រោយៗនឹងកើនទិន្នផលជាបន្តបន្ទាប់ ដោយសារមួយឆ្នាំធំបន្តិចៗ។

លោកបន្តថា ការថែទាំទុរេន គេមើលទៅលើស្លឹក បើស្លឹករឹងមាំ ផលិតផ្លែក៏បានច្រើន។ ស្លឹក ២០០-៣០០ស្លឹក ទើបផលិតផ្លែបានមួយ។ ប្រសិនបើអត់មានស្លឹក ហើយផលិតយកផ្លែ ទុរេននឹងមិនអាយុវែងនោះទេ នឹងស្លាប់ចោល​ម្ចាស់។ ទុរេនមួយដើមអាចទទួលផលបានជាង ២០០គីឡូក្រាម។ នេះជាការបញ្ជាក់របស់លោក ស៊ឹម សុជាតិ។

ទុរេន ពិបាកក្នុងការដាំដុះណាស់ ប្រសិនបើគ្មានបច្ចេកទេស ដាំមិនរស់នោះទេ។ ប្រភពទឹក គឺត្រូវតែមាន ព្រោះទុរេន ត្រូវការទឹកជាចាំបាច់ ប៉ុន្តែបើទឹកជោកជាំខ្លាំងពេក ក៏មិនរស់ដែរ។

ក្រសួងកសិកម្ម បាននិងកំពុងរៀបចំផែនការក្នុងការជំរុញការដាំដុះផ្លែទុរេនដល់ប្រជាពលរដ្ឋ ឲ្យទទួលបានផលខ្ពស់ និងស្របតាមស្តង់ដាគុណភាព ដើម្បីនាំចេញទៅកាន់ទីផ្សារក្រៅប្រទេស ខណៈដែល ថៃ វៀតណាម និងម៉ាឡេស៊ី សម្រុកនាំចេញផ្លែទុរេន ទៅកាន់ទីផ្សារអន្តរជាតិ។ រដ្ឋមន្ត្រីក្រសួងកសិកម្មជឿជាក់ថា នៅថ្ងៃអនាគតកម្ពុជាអាចមាន​លទ្ធភាពគ្រប់គ្រាន់ក្នុងការបង្កបង្កើនផល និងនាំចេញផ្លែទុរេនទៅកាន់ទីផ្សារអន្តរជាតិផងដែរ។

ក្រសួងកសិកម្ម រុក្ខាប្រមាញ់ និង​នេសាទ​នឹងសិក្សា​ពី​លក្ខខណ្ឌ​តម្រូវ​ភូតគាម​អនាម័យ​របស់​ទីផ្សារ​ចិន​បន្ថែមទៀត ដើម្បី​ធ្វើយ៉ាងណា​ជំរុញ​ឱ្យ​ផ្លែ​ទុរេន​របស់​កម្ពុជា​អាច​ទៅកាន់​ទីផ្សារ​ប្រទេស​ចិន​បាន​នាពេល​ឆាប់ៗ​ខាងមុខនេះ​៕

អត្ថបទ៖ សុផល