រាជរដ្ឋាភិបាលអនុម័តគម្រោងវិនិយោគចំនួន៤ បង្កើតការងារជូនពលរដ្ឋជាង ២ពាន់កន្លែង

គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានសម្រេចអនុម័តលើម្រោងវិនិយោគរបស់ក្រុមហ៊ុនចំនួន ៤ មានទំហំទឹកប្រាក់ជិត ២៤ លានដុល្លារ នៅខណ្ឌពោធិ៍សែនជ័យ ក្រុងភ្នំពេញ និងក្នុងខេត្តព្រះសីហនុ។

យោងតាមសេចក្តីប្រកាសរបស់ក្រុមប្រឹក្សាអភិវឌ្ឍកម្ពុជា នៅថ្ងៃ ១៤ មិថុនា នេះ បានឱ្យដឹងថា គម្រោងវិនិយោគរបស់ក្រុមហ៊ុនទាំង៤ នេះនឹងផ្តល់ឱកាសការងារចំនួន ២៣៧៦ កន្លែង ដល់ប្រជាជនខ្មែរ។ ក្រុមហ៊ុនដែលរដ្ឋាភិបាលអនុម័តចុះបញ្ជីមានដូចជា៖

ទី១ ក្រុមហ៊ុន GLDEN SUN FASHION APPAREL CO., LTD មានទីតាំងវិនិយោគស្ថិតនៅអគារលេខ ២៦២ C ផ្លូវលេខ ១៣៦ DT ភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ទុនវិនិយោគប្រមាណ ៥ លានដុល្លារអាមេរិក និងអាចបង្កើតការងារបានចំនួន ៩២៦កន្លែង។

ទី២ ក្រុមហ៊ុន “AMTO CHEMICAL TECHNOLOGY CO., LTD.” គម្រោងបង្កើតរោងចក្រផលិតកាវ ថ្នាំលាប ទឹកថ្នាំ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ១,៧លានដុល្លារអាមេរិក និងបង្កើតការងារបានចំនួនប្រមាណ ១៥០នាក់។

ទី៣ “Kai Feng Wood Products (Cambodia) Co., Ltd.” គម្រោងបង្កើតរោងចក្រផលិតក្តារប៉ាកេ និងក្តាបន្ទះ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ៦,៦លានដុល្លារអាមេរិក និងបង្កើតការងារបានចំនួនប្រមាណ ៣០០នាក់។

ទី៤ “MEI AN LEATHERWARE (CAMBODIA) COMPANY LIMITED” គម្រោងបង្កើតរោងចក្រផលិតកាបូប ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ១០,៥លានដុល្លារអាមេរិក និងបង្កើតការងារបានចំនួនប្រមាណ ១.០០០ នាក់។

សូមបញ្ជាក់ថា រយៈពេល ៥ខែឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគថ្មីៗ និងគម្រោងពង្រីកផលិតកម្មសរុប ចំនួន ៨០គម្រោង ដែលមានទំហំទឹកប្រាក់សរុប ២ពាន់ ៨រយលានដុល្លារអាមេរិក និងបង្កើតឱកាសការងារជូនប្រជាពលរដ្ឋកម្ពុជា រហូតជិត៦ម៉ឺនកន្លែង៕ នាង រតនៈ