ដឹងថ្ងៃបើកដំណើរការផ្សារទំនើបអ៊ីអន៣ ជាផ្លូវការហើយ

ផ្សារទំនើបអ៊ីអន៣ ឬអ៊ីអនមានជ័យ ស្ថិតនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) បានប្រកាសពីកាលបរិច្ឆេទនៃការបើកដំណើរការហើយ។

តាមរយៈគេហទំព័រផេកផ្លូវការរបស់ផ្សារទំនើបអ៊ីអន៣ បានឱ្យដឹងដូច្នេះថា « ផ្សារទំនើបលក់ទំនិញធំជាងគេនៅកម្ពុជា នឹងធ្វើការបើកដំណើរការអាជីវកម្មនៅថ្ងៃទី១៥ ខែធ្នូ ឆ្នាំ២០២២ ខាងមុខនេះហើយ»។

គម្រោងផ្សារទំនើបអ៊ីអន៣នេះ បានចំណាយថវិកាជិត ៣០០លានដុល្លារ សាងសង់លើផ្ទៃដី ១៨ហិកតា។

បើតាមឯកអគ្គរដ្ឋទូតជប៉ុនប្រចាំកម្ពុជា បានលើកឡើងកន្លងមកថា គម្រោងផ្សារទំនើបអ៊ីអន៣ ជាមជ្ឈមណ្ឌល​លក់ទំនិញចម្រុះ មានទំហំផ្ទៃក្រឡាលក់រាយសរុបចំនួន ១៧០.០០០ម៉ែត្រការ៉េ និងជាផ្សារទំនើបដ៏ធំបំផុត ក្នុងចំណោមផ្សារទំនើបអ៊ីអនចំនួន៣ ក្នុងប្រទេសកម្ពុជា និងធំជាងគេនៅក្នុងតំបន់អាស៊ី។

គម្រោងផ្សារទំនើបអ៊ីអន៣ មានទីតាំងតាមបណ្តោយផ្លូវមហាវិថីសម្តេចតេជោ ហ៊ុន សែន ចម្ងាយប្រមាណ ៤,៥គីឡូម៉ែត្រ ពីស្ពានអាកាសក្បាលថ្នល់។ ទីតាំងនេះ ស្ថិតនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

សូមបញ្ជាក់ថា ផ្សារទំនើបអ៊ីអន១ មានទីតាំងស្ថិតនៅតាមបណ្តោយវិថីសុធារស បានបើកដំណើរការជាផ្លូវការកាលពីឆ្នាំ ២០១៤ ដោយមានទុនចុះបញ្ជី ២០៥លានដុល្លារ លើផ្ទៃក្រឡា ១០៨ ០០០ម៉ែត្រការ៉េ។ ចំណែកផ្សារទំនើបអ៊ីអន២ ត្រូវបានបើកសម្ពោធកាលពីខែ មិថុនា ឆ្នាំ ២០១៨ លើទុនវិនិយោគ ១២០លានដុល្លារ មានក្រឡាផ្ទៃអគារ ១៥១ ០០០ម៉ែត្រការ៉េ។ ដោយឡែកផ្សារ​ទំនើប​អ៊ីអន​ ៣ គ្រោងនឹងសម្ពោធថ្ងៃទី ១៥ ធ្នូ ខាងមុខនេះ ​មាន​អគារ​កម្ពស់​ ៥ ​ជាន់ ​នឹង​ក្លាយជា​មជ្ឈមណ្ឌល​ហាង​លក់​ទំនិញទំនើប ​និង​ធំ​បំផុត​នៅ​ភាគខាងត្បូង​រាជធានី​ភ្នំពេញ ដែលមានហាងចំនួន ២៥០ហាង​។ គម្រោងផ្សារថ្មីនេះ ត្រូវបានបើកការដ្ឋានសាងសង់កាលពីថ្ងៃទី៧ ខែតុលា ឆ្នាំ២០២០៕