ផ្សារទំនើបម៉ាក្រូទី៣ នឹងបើកសម្ពោធជាផ្លូវការ​នៅពាក់កណ្តាលខែនេះ

ផ្សារទំនើបម៉ាក្រូ (Makro) ដែលជាមជ្ឈមណ្ឌលចែកចាយផលិតផលទំនិញបោះដុំ និងរាយ នឹងបើកសម្ពោធជាផ្លូវការ នៅថ្ងៃទី ១៤ ខែ ធ្នូ ឆ្នាំ ២០២២ ក្រោមអធិបតីភាពឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។

ក្រុមប្រឹក្សាអភិវឌ្ឍន៍កម្ពុជា CDC បានឱ្យដឹងកាលពីដើមខែឧសភា កន្លងទៅថា CDC បានសម្រេចចេញវិញ្ញាបនបត្រ​ចុះបញ្ជីគម្រោងវិនិយោគលើ ផ្សារទំនើប Makro ដែលមានទីតាំងវិនិយោគស្ថិតនៅ ភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ មានទុនវិនិយោគប្រមាណ ១២លាន ៧សែនដុល្លារអាមេរិក និងអាចបង្កើត​ការងារបានចំនួន ១៦១កន្លែង។

ផ្សារទំនើប ម៉ាក្រូនេះ នឹងក្លាយជាផ្សារទំនើបដ៏ធំមួយ និងមុនគេបង្អស់នៅទីតាំងនេះ ដែលនឹងជំរុញសក្តានុពលតំបន់នេះ ឱ្យកើនឡើងមួយកម្រិតទៀត ពិសេសអាចទាក់ទាញការវិនិយោគផ្សេងៗ មកកាន់តំបន់នេះផងដែរ។

 សូមបញ្ជាក់ថា ផ្សារទំនើបម៉ាក្រូដំបូងគេបង្អស់នៅកម្ពុជា បើកដំណើរការកាលពីចុងឆ្នាំ ២០១៧ បានសាងសង់ឡើង​លើផ្ទៃដីជាង ៥ហិកតា នៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ខណៈសាខាទី ២ អភិវឌ្ឍន៍លើ​ផ្ទៃដីទំហំ ៥ហិកតា ដែលមានទីតាំង នៅផ្លូវជាតិលេខ៦ ភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប។

ក្រោយសម្ពោធផ្សារម៉ាក្រូទី៣ មួយថ្ងៃ ពោលគឺថ្ងៃទី ១៥ ខែ ធ្នូ ផ្សារទំនើបអ៊ីអន៣ ឬអ៊ីអនមានជ័យ នៅផ្លូវសម្តេចតេជោ (ផ្លូវ៦០ម៉ឺត្រ) ក៏បើកដំណើរការជាផ្លូវការផងដែរ៕