ព័ត៌មានជាតិ

ខេត្តព្រះសីហនុ ជំរុញបង្កើតរោងចក្រកែច្នៃស្វាយទុំ បញ្ចៀសកកស្ទះពេលប្រមូលផល

បានផុស

២ years មុន

នៅ

ថ្ងៃព្រហស្បតិ៍ ១៦ កុម្ភៈ ២០២៣

ដោយ

លោក គួច ចំរើន អភិបាលនៃគណៈអភិបាលខេត្តព្រះសីហនុបានលើកឡើងថា បច្ចុប្បន្ននេះរដ្ឋបាលខេត្តកំពុងជំរុញលើកទឹកចិត្តឱ្យមានរោងចក្រកែច្នៃផ្លែស្វាយទុំក្នុងស្រុក ដើម្បីជួយស្រូបយកកសិផលរបស់កសិករកុំឱ្យមានបញ្ហាជាប់គាំងរឿងតម្លៃក្នុងរដូវកាលប្រមូលផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១៥ ខែកុម្ភៈ ឆ្នាំ២០២៣ ម្សិលមិញនេះ លោក គួច ចំរើន បានមានប្រសាសន៍ថា ចំពោះបញ្ហាជាប់គាំងរឿងតម្លៃផ្លែស្វាយ ដែលធ្លាក់ថ្លៃនារដូវប្រមូលផលនេះ រដ្ឋបាលខេត្តកំពុងជំរុញទឹកចិត្តឱ្យមានរោងចក្រផលិត និងកែច្នៃផ្លែ ស្វាយទុំនៅក្នុងខេត្ត ដើម្បីអាចជួយដោះស្រាយបញ្ហាទាំងអស់នេះ ប៉ុន្តែលទ្ធផលជាផ្លូវការបែបណានៅមិនទាន់មានជាលក្ខណៈពេញលេញនៅឡើយ។

«នាពេលកន្លងមក កសិករធ្លាប់ជួបនូវហានិភ័យរឿងផ្លែស្វាយ មានន័យថា ដល់រដូវនៃការប្រមូលផល ផ្លែស្វាយតែងតែធ្លាក់ថ្លៃខ្លាំង ព្រោះគ្មានរោងចក្រកែច្នៃ ដើម្បីអាចធានាបាន នៅការនាំយកផលិតផលដែលប្រមូលបានទាំងអស់មកកែច្នៃទៅជាអ្វីមួយ»។

បើតាមលោកអភិបាលខេត្ត ការគាំទ្រឱ្យមានរោងចក្រកែច្នៃកំពុងដំណើរការទៅមុខ ប៉ុន្តែលទ្ធផលនៃការកែច្នៃមានលក្ខណៈអ្វីខ្លះបែបណា វាស្ថិតទៅលើស្ថានភាពជាក់ស្ដែង។

លោក គួច ចំរើន រំពឹងដែរថា សមិទ្ធផលនៃការកែច្នៃផ្លែស្វាយទុំ នឹងអាចសម្រេចបាននៅក្នុងឆ្នាំនេះ ដើម្បីបង្ហាញខ្លួនចូលមកផ្គត់ផ្គង់ទីផ្សារនៅក្នុងស្រុក និងបម្រើដល់ការនាំចេញ។ អ្វីដែលជារឿងសំខាន់មួយទៀត ក៏អាចជួយស្រូបយកកសិផលរបស់ប្រជាកសិករទាំងក្នុងមូលដ្ឋាននិងខេត្តនានា ដែលបានប្រកបរបរដាំដំណាំផ្លែស្វាយ៕

ដោយ៖ ថារី

Related Topics:រោងចក្រកែច្នៃផ្លែស្វាយ លោក គួច ចំរើន