ព័ត៌មានជាតិ

ខេត្តកណ្តាលហ៊ុំព័ទ្ធរាជធានីភ្នំពេញ មានច្រកទ្វារព្រំដែនចំនួន ៤ ទំនាក់ទងជាមួយប្រទេសវៀតណាម

បានផុស

២៣ ម៉ោង មុន

នៅ

ថ្ងៃសៅរ៍ ៦ មិថុនា ២០២៦

ដោយ

លោក គួច ចំរើន អភិបាលនៃគណៈអភិបាលខេត្តកណ្តាលបានឱ្យដឹងថា ខេត្តកណ្តាលជាខេត្តយុទ្ធសាស្ត្រដ៏មានសារៈសំខាន់បំផុតមួយ ដែលមានទីតាំងភូមិសាស្ត្រហ៊ុំព័ទ្ធរាជធានីភ្នំពេញ និងដើរតួនាទីជាខ្សែក្រវាត់សេដ្ឋកិច្ច ពាណិជ្ជកម្ម និងភស្តុភារកម្មយ៉ាងរឹងមាំក្នុងការជំរុញ និងកំណើនសេដ្ឋកិច្ចជាតិ។

ខេត្តកណ្តាលមានសក្តានុពលខ្ពស់លើផ្នែក កសិកម្ម ,ឧស្សាហកម្ម នគរូបនីយកម្មសំណង់ ទេសចរណ៍ និងសេវាកម្មជាដើម។

លោក គួច ចំរើន បានលើកឡើងពីភូមិសាស្រ្តខេត្តកណ្តាល ដែលមានព្រំប្រទល់ខាងលិចទល់នឹងខេត្តកំពង់ស្ពឺ ខាងកើតទល់នឹងខេត្តព្រៃវែង ខាងជើងទល់នឹងខេត្តកំពង់ឆ្នាំង និងខេត្តកំពង់ចាម និងខាងត្បូងទល់នឹងខេត្តតាកែវ និងខេត្តអានយ៉ាង ប្រទេសវៀតណាម។

ពាក់ព័ន្ធភូមិសាស្រ្តជាប់ជាមួយប្រទេសវៀតណាម លោក គួច ចំរើន ដែលបានផ្លាស់ប្តូរតំណែងពីអភិបាលខេត្តព្រះសីហនុ មកដឹកនាំនៅខេត្តកណ្តាលបានបញ្ជាក់ថា ខេត្តមានច្រកទ្វារព្រំដែនចំនួន ៤ សម្រាប់ការធ្វើទំនាក់ទំនង និងធ្វើពាណិជ្ជកម្មជាមួយប្រទេសវៀតណាម ក្នុងនោះច្រកទ្វារព្រំដែនអន្តរជាតិមានចំនួន ២ គឺច្រកទ្វារព្រំដែនអន្តរជាតិក្អមសំណ និងច្រកទ្វារព្រំដែនអន្តរជាតិជ្រៃធំ និងច្រកតំបន់ព្រំដែនមានចំនួន២ គឺច្រកទ្វារតំបន់ព្រំដែនព្រែកជ្រៃ-ព្រែកទន្លា និងច្រកទ្វារតំបន់ព្រំដែនព្រែកស្បូវ៕