គម្រោង​តម្លៃ​​ជិត ៥០០ លានដុល្លារ ទទួល​បាន​ការ​​វិនិយោគ​រយៈពេល ៤ ខែឆ្នាំនេះ

នៅក្នុងរយៈពេល ៤ ខែឆ្នាំ២០២៣នេះ គម្រោងវិនិយោគចំនួន ៥៤ ក្រុមហ៊ុនដែលមានទុនវិនិយោគចំនួន ៤៨០,៦លានដុល្លារ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តដោយផ្តល់ឱកាសការងារជូនប្រជាពលរដ្ឋចំនួន​ ៦៤៣០៥​កន្លែង។

ចំនួននេះបើធៀបទៅនឹងរយៈពេល ៤ ខែដូចគ្នាឆ្នាំ២០២២ កន្លងទៅឃើញថា មានការកើនឡើង​២​គម្រោង​តែទុន​វិនិយោគ​មានការថយចុះដោយ ៤ ខែឆ្នាំមុន CDC បានអនុម័តគម្រោងវិនិយោគចំនួន ៥២ ក្រុមហ៊ុនដែលមាន​ទុនវិនិយោគជាង ២៤៥០ លានដុល្លារនិងផ្តល់ឱកាសការងារជូនប្រជាពលរដ្ឋចំនួន ៣២២៦៤កន្លែង។

យោងតាមរបាយការណ៍ប្រចាំថ្ងៃរបស់ក្រុមប្រឹក្សាអភិវឌ្ឍន៍កម្ពុជា ក្នុងចំណោមគម្រោងវិនិយោគចំនួន ៥៤ ក្រុមហ៊ុន ក្នុងនោះក្នុងខែមករា ឆ្នាំ២០២៣ មានគម្រោងវិនិយោគចំនួន ១០ មានទុនវិនិយោគចំនួន ៩៩,៤ លានដុល្លារផ្តល់ឱកាសការងារ​បាន ១៧១២៩ កន្លែង។ ខែកម្ភៈឆ្នាំ២០២៣ មានគម្រោងវិនិយោគចំនួន ១៧ មានទុនវិនិយោគចំនួន​៩៨,៨​លានដុល្លារ និងផ្តល់ឱកាសការងារជូនប្រជាពលរដ្ឋបានចំនួន ២២៧៨៤កន្លែង។

ខែមីនាឆ្នាំ២០២៣ មានគម្រោងវិនិយោគចំនួន៧មានទុនវិកិយោគចំនួន ៣៣,៧លានដុល្លារ និងផ្តល់ឱកាសការងារជូនប្រជាពលរដ្ឋចំនួន ៦៦៦៩ កន្លែង និងខែមេសាឆ្នាំ២០២៣ មានគម្រោងវិនិយោគច្រើនជាងគេរហូតដល់ ២០ ក្រុមហ៊ុនមានទុនវិនិយោគចំនួន ២៤៧,៧ លានដុល្លារដោយផ្តល់ឱកាសការងារជូនដល់ប្រជាពលរដ្ឋចំនួន ១៧៧២៣ កន្លែង ។

ក្នុងចំណោមគម្រោងវិនិយោគចំនួន ៥៤ មានតែខែមេសាមានគម្រោងវិនិយោគធំៗ និង​ចំណាយទុនច្រើនជាងគេក្នុងនោះរួមមានគម្រោងបង្កើតកសិដ្ឋានចិញ្ចឹមគោពូជនិងគោសាច់ខ្នាតធំនៅស្រុកស្នួល ខេត្តក្រចេះក្នុងទុនវិនិយោគប្រមាណ ៧៣,៤លានដុល្លារ។ គម្រោងវិនិយោគអភិវឌ្ឍន៍រមណីយដ្ឋានទេសចរណ៍លើកោះទទឹង និងសកម្មភាពពាក់ព័ន្ធផ្សេងៗទៀត នៅភូមិកោះស្តេចឃុំកោះស្តេច ស្រុកគិរីសាគរ ខេត្តកោះកុង ក្នុងទុនវិនិយោគប្រមាណ ៣០ លានដុល្លារ។ គម្រោងបង្កើតរោងចក្រកែច្នៃផ្លែស្វាយ នៅភូមិតានៃឃុំជាំសង្កែ ស្រុកភ្នំស្រួច ខេត្តកំពង់ស្ពឺ ក្នុងទុនវិនិយោគប្រមាណ​២៦ លានដុល្លារ គម្រោងបង្កើតរោងចក្រផលិត និងផ្គុំដំឡើងបន្ទះសូឡានៅភូមិក្តាន់រយ ឃុំដំណាក់អំពិល ស្រុកអង្គស្នួលខេត្តកណ្តាល ក្នុងទុនវិនិយោគប្រមាណ ១៥,៦លានដុល្លារ៕

អត្ថបទ៖ សំអឿន