កម្ពុជាមានក្តីរំពឹងខ្ពស់លើការទាក់ទាញភ្ញៀវទេសចរ និងវិនិយោគិនចំពោះការចាប់ផ្តើមហោះហើរត្រង់របស់ក្រុមហ៊ុន Cambodia Angkor Air នៅខែក្រោយ

ភ្នំពេញ៖​មន្រ្តីរដ្ឋាភិបាលកម្ពុជា និងអ្នកតំណាងវិស័យទេចរណ៍បានលើកឡើងថាការចាប់ផ្តើម​ជើងហោះហើរត្រង់របស់ក្រុមហ៊ុនអាកាសចរណ៍ជាតិ Cambodia Angkor Air ពីព្រលានយន្ត​អន្តរជាតភ្នំពេញទៅកាន់ទីក្រុងញូវដេលីប្រទេសឥណ្ឌានៅ​ខែមិថុនាខាងមុខនេះដើរតួនាទីដ៏​សំខាន់​មិនត្រឹមតែទាក់ទាញភ្ញៀវទេចរឥណ្ឌាប៉ុណ្ណោះទេ ប៉ុន្តែថែមទាំងជំរុញការដោះដូរ​ពាណិជ្ជកម្ម និងវិនិយោគរវាងប្រទេសទាំងពីរផងដែរ។

លោក ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យ​អាកាសចរណ៍ស៊ីវិល​បានថ្លែងប្រាប់កម្ពុជាថ្មីថា ​ក្រុមហ៊ុនអាកាសចរណ៍ក្នុងស្រុករបស់កម្ពុជា ​Cambodia Angkor Air ​បានត្រៀមខ្លួនរួចស្រេចក្នុងការបើកជើងហោះហើររបស់ខ្លួនទៅកាន់ប្រទេសឥណ្ឌា​ចាប់ពីថ្ងៃទី១៦ ខែមិថុនា ឆ្នាំ២០២៤នេះ។ លោកថា ជាមួយគ្នានេះដែរក្រុមហ៊ុនអាកាសចរណ៍ឥណ្ឌា IndiGo ក៏ទទួលបាន​អនុញ្ញាតពីប្រទេសទាំងពីរក្នុងការឱ្យបើកជើងត្រង់ហើរត្រង់មកកម្ពុជា ចាប់ពីខែតុលា ឆ្នាំ​​២០២៤ខាងមុខនេះផងដែរ។

បើយោងតាមលោក ​ចាន់សិរីវុត្ថា៖« ​ចំពោះក្រុមហ៊ុនអាកាសចរណ៍​​ Cambodia Angkor Air នឹងចាប់ផ្តើមបើកការហោះហើរត្រង់ទៅប្រទេសឥណ្ឌា ដោយធ្វើឡើង៣ជើងក្នុងមួយសប្តាហ៍។ ដូច្នេះនៅថ្ងៃទី១៤ មិថុនា ក្រុមហ៊ុននេះនឹងបើកសម្ពោធជើងហោះហើរដំបូងជាផ្លូវការ នៅប្រទេសឥណ្ឌា ដើម្បី​ផ្សព្វផ្សាយបង្ហាញពីកម្មវិធីហោះហើររបស់ខ្លួនទៅកាន់ប្រជាជនឥណ្ឌា»។ ​

សម្រាប់​របស់ក្រុមហ៊ុនអាកាសចរណ៍ IndiGo លោកបានថ្លែងបញ្ជាក់ថា បើតាមផែនការ ក្រុមហ៊ុននេះ នឹងបើកការហោះហើរត្រង់ពី ទីក្រុង​ញូវដេលី មកសៀមរាប ចាប់ពី​ថ្ងៃទី២៧ ខែតុលា ឆ្នាំ២០២៤ ជាមួយនឹងជើងហោះហើរ៧ជើងក្នុងមួយសប្តាហ៍។

លោក ធួន ស៊ីណាន ​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATACC)  ​បានលើកឡើងថា ឥណ្ឌា គឺជាទីផ្សារទេសចរណ៍ដ៏ធំមួយ សម្រាប់ពិភពលោក បន្ទាប់ពីចិន។ លោកថាសម្រាប់ការចាប់ផ្តើមបើកការបើកជើងហោះហើរត្រង់រវាងកម្ពុជា-ឥណ្ឌាបង្ហាញពីសញ្ញាណវិជ្ជមានមួយដើម្បីជំរុញវិស័យទេចរណ៍រវាងប្រទេសទាំងពីរ ជាពិសេសគឺទេចរណ៍វប្បធម៌។​ ​

លោកបានគូសបញ្ជាក់ទៀតថា៖«ជាមួយនឹងចំនួនប្រជាជនដ៏ច្រើនរបស់ប្រទេសឥណ្ឌា កម្ពុជាត្រូវរៀបចំនូវផលិតផលទេចរណ៍នានាដើម្បីទាក់ទាញភ្ញៀវទេចរឥណ្ឌាមកកាន់កម្ពុជា​យើងឱ្យបានច្រើន ជាពិសេសទីកន្លែងស្នាក់នៅ និងអាហារ»។​

លោកបណ្ឌិត David Yuhong Zhan   នាយកប្រតិបត្តិនៃក្រុមហ៊ុន Cambodia Angkor Air បានលើកឡើងថា​ផ្លូវហោះហើរថ្មីនេះមិនត្រឹមតែបំពេញតម្រូវការដែលកំពុងកើនឡើងនៃការតភ្ជាប់ដោយផ្ទាល់រវាងកម្ពុជា និងឥណ្ឌាប៉ុណ្ណោះទេ ប៉ុន្តែថែមទាំងពង្រឹងការយកចិត្តទុកដាក់របស់ក្រុមហ៊ុនក្នុងការផ្តល់ជូនអ្នកដំណើរនូវសេវាកម្ម ភាពងាយស្រួល និងភាពងាយស្រួលដែលមិនអាចប្រៀបផ្ទឹមបាន។

លោកក៏បានបន្ថែមថា « វាជាកិត្តិយសរបស់ខ្ញុំក្នុងការពង្រឹងចំណងមិត្តភាពជាប្រពៃណី​​រវាងប្រជាជនឥណ្ឌា និងកម្ពុជា តាមរយៈសេវាកម្មផ្ទាល់ជាប្រវត្តិសាស្ត្ររបស់យើង! យើងប្តេជ្ញាបង្ហាញ «ស្នាមញញឹមខ្មែរ» យ៉ាងកក់ក្តៅ ដោយផ្តល់នូវការធ្វើដំណើរប្រកបដោយសុវត្ថិភាព និងផាសុកភាព។ ជាមួយ​នឹង​គម្រោង​បើក​ផ្លូវ​ហោះហើរ​ថ្មី​តភ្ជាប់​ខេត្តសៀមរាប​ទៅ​ក្រុងញ៉ូវ​ដេលី និង​រាជធានី​ភ្នំពេញ​ទៅ​ទីក្រុង​ផ្សេង​ទៀត​ក្នុង​ប្រទេស​ឥណ្ឌា​ក្នុង​ពេល​ឆាប់ៗផងដែរ»។ 

ក្នុង​កម្មវិធី​ផ្សព្វផ្សាយអំពីជើងហោះហើរថ្មីនេះ លោក គួង កុយ ឯកអគ្គរាជទូតកម្ពុជាប្រចាំប្រទេសឥណ្ឌា បានគូសបញ្ជាក់អំពី​ការហោះហើរត្រង់នេះនឹងជួយសម្រួលដល់សហគ្រិនឥណ្ឌាក្នុងការវិនិយោគនៅកម្ពុជា៕