ក្រុមហ៊ុន​អាកាសចរណ៍​វៀតណាម​ផ្អាក​អ្នក​បើក​យន្តហោះ៤នាក់​ បន្ទាប់​ពីយន្តហោះ​ប៉៉ះ​គ្នាមុនហោះឡើង​​

ក្រុមហ៊ុនអាកាសចរណ៍វៀតណាម បានផ្អាកអ្នកបើក​យន្តហោះចំនួន៤​នាក់ បន្ទាប់ពីការប៉ះទង្គិចគ្នានៅលើផ្លូវរត់មុនហោះឡើងដែលពាក់ព័ន្ធនឹងយន្តហោះពីររបស់ក្រុមហ៊ុននៅឯអាកាសយានដ្ឋានអន្តរជាតិ Noi Bai ទីក្រុងហាណូយកាលពីថ្ងៃសុក្រសប្ដាហ៍មុន។

យោងតាមការចេញផ្សាយរបស់ ភ្នាក់ងារព័ត៌មាន​ Aviation ASS យន្តហោះដែលបុកគ្នាទាំងពីរនេះមានយន្តហោះ Boeing 787 ធ្វើដំណើរទៅទីក្រុងហូជីមិញ បានបុកកន្ទុយរបស់យន្តហោះ Airbus A321 ដែលកំពុងធ្វើដំណើរឆ្ពោះទៅទីក្រុង Dien Bien ធ្វើឱ្យខូចខាតយន្តហោះទាំងពីរ និងពន្យារពេលជើងហោះហើរសម្រាប់អ្នកដំណើរជាង ៣៨០ នាក់។

អាជ្ញាធរអាកាសចរណ៍ស៊ីវិលវៀតណាម (CAAV) កំពុងស៊ើបអង្កេតឧបទ្ទវហេតុនេះ ដែលបានចាត់ថ្នាក់ហេតុការណ៍នេះថាជាការរំលោភបំពានសុវត្ថិភាពកម្រិត B ដែលជាកំហុសនីតិវិធីធ្ងន់ធ្ងរ។ របាយការណ៍បឋមបង្ហាញថា យន្តហោះ Airbus A321 ប្រហែលជាមិនមានទីតាំងត្រឹមត្រូវទេ នៅចំណុចផ្លូវរត់របស់ខ្លួន។

យន្តហោះទាំងពីរមិនត្រូវបានអនុញ្ញាតឱ្យហោះហើរបន្ទាប់ពីឧបទ្ទវហេតុនោះទេ ហើយយន្តហោះថ្មីត្រូវបានបញ្ជូនដើម្បីដឹកអ្នកដំណើរដែលពន្យារពេល។ ក្រុមហ៊ុនអាកាសចរណ៍វៀតណាម និងមន្ត្រីអាកាសចរណ៍នៅតែពិនិត្យមើលថាតើមានអ្វីខុស តាមរយៈការស៊ើបអង្កេតដាច់ដោយឡែករបស់ពួកគេ៕

អត្ថបទ៖ ប៊ុន​ សុភាព